Alkitab Mobile SABDA
[VER] : [KARO]     [PL]  [PB] 
 <<  Kidung Agung 8 >> 

1Adi turangku sada nande sada bapa min ndai kam, si pernah pepinemken i bas pola nandengku, kuemai kam adi kita jumpa i tengah dalan, janah la lit si merdiatekenca.

2Kurumah nandengku kam kubaba, maka banci iajarindu aku kerna ate keleng. Kubereken man bandu anggur campur rempah, lau buah delima man inemenndu.

3Tanndu si kawes natang takalku, tanndu si kemuhun napu-napu aku.

4O diberu-diberu Jerusalem erpadanlah kam, maka la atendu ngganggu kami si sangana singenan.

Ende-enden si peenemken

5[Diberu-diberu] Ise si reh i bas gurun pasir ah nari? Sicikepen tan ia ras impalna. [Diberu] I teruh batang apel kuingeti kam i je kap inganndu tubuh ndube.

6Ula talangi pusuhndu man ise pe seakatan man bangku ngenca. Ise pe ula cikepndu seakatan aku, ngena ate seri gegehna ras kematen, mecimberu bali rawana ras doni kematen. Apina ndilat-ndilat desken dilah api, gurlah desken api si gara.

7Api si bage la ternimpeti alu lau, banjir pe la ngasup nggedapkenca. Tapi adi lit kalak si ncubaken nukur keleng ate alu kebayakenna, kinilingen saja nge si ialokenna.

8[Turang diberu ndai] Lit turang kami kitik denga polana Kai nge ndia si ibahan kami, kune lit kalak si nungkuni ia?

9Bicara tembok kota min ndai ia, ibahan kami i babona menara pirak. Bicara pintu gerbang min ndai ia, ibide kami ia alu kayu cemara.

10[Diberu] Aku kap tembok, janah polangku kap menarana. Ieteh impalku nge maka adi ras ia dat aku kepuasen ras dame.

11[Dilaki] Lit sada peken anggur Salomo i bas sada ingan, Baal-Hamon gelarna. Piga-piga kalak perjuma newai peken anggur e i bas ia nari, tep-tep kalak nggalar seribu duit pirak.

12Aminna pe Salomo reh alu duitna si meribu-ribu janah si erdahin i bas jumana iupahi dua ratus duit, la diateku pe e; sabap lit kap peken anggurku jine.

13O impal, pedengkehken maka kubegi sorandu i bas peken nari, temanku nggo sikap megiken kam ngerana.

14[Diberu] Mari impalku, pedas kam reh, kiamken bagi belkih tah pe bagi belkih si nguda denga kiamken arah babo deleng-deleng ingan turah rempah-rempah.



 <<  Kidung Agung 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel