Kerehen Kesah Si Badia ipadanken Dibata
1Teopilus si ihamati. I bas kitapku si pemena nggo kusuratken kerna kerina si ibahan Jesus ras si IajarkenNa, tangtangna nari,
2seh ku warina Ia iangkat ku Surga. Ope denga Ia iangkat ku Surga, i bas kuasa Kesah Si Badia IberekenNa pedah-pedah man kalak si nggo IpilihNa jadi rasul-RasulNa.
3Empat puluh wari dekahna kenca KematenNa, icidah-CidahkenNa BaNa man rasul-rasul e alu erbage-bage cara guna mbuktiken maka Ia nggeluh. Tangkas idah rasul-rasul e Jesus, janah ngerana Ia ras rasul-rasul e kerina kerna Kinirajan Dibata.
4Sekali asum Jesus pulung ras rasul-rasul e IberekenNa perentah man rasul-rasul e nina, "Ula tadingken Kota Jerusalem tapi timailah pemere si nggo ipadanken BapangKu, sue ras si nggo Kukataken man bandu.
5Johanes mperidiken alu lau, tapi piga-piga wari nari kam iperidiken alu Kesah Si Badia."
Jesus iangkat ku Surga
6Asum rasul-rasul pulung ka ras Jesus, isungkunna Jesus nina, "O Tuhan, genduari kin atendu manteki kerajan Israel mulihi?"
7Erjabap Jesus man rasul-rasul nina, "Kerna si e BapangKu metehsa; la perlu ietehndu ntah ndigan jadi.
8Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda."
9Kenca IkatakenNa si e iangkat Ia ku Surga i lebe-lebe rasul e nari, jenari lit embun ngeligeni Ia erbahanca lanai Ia idah rasul-rasul e.
10Asum rasul-rasul e natap denga ku langit, kempak Jesus si nggo lawes e, rempet tedis dua kalak dilaki i deherna, uisna mbentar.
11Nina man rasul-rasul e, "O kalak Galilea, ngkai maka kam tedis natap ku langit? Bagi nggo idahndu Jesus iangkat ku Surga, bage ka Ia pagin reh mulihken."
Matias ipilih nggantiken Judas Iskariot
12Kenca bage mulih rasul-rasul e i Uruk Seton nari ku Jerusalem. Uruk e dauhna kira-kira sada setengah kilometer i Jerusalem nari.
13Kenca seh i Jerusalem, lawes ia ku loteng rumah inganna numpang. Kalak enda eme: Petrus ras Johanes, Jakup ras Andreas, Pilipus ras Tomas, Bartolomeus ras Matius, Jakup anak Alpeus, Simon Pejuang ras Judas anak Jakup.
14Tutus atena kerina ras-ras ertoto, ikut pe diberu, bage pe Maria nande Jesus ras senina-senina Jesus.
15I bas sada wari pulung ka ia kerina, teremna lit seratus dua puluh kalak. Asum e tedis Petrus jenari ngerana ia nina,
16"Turang ras senina, arus me jadi kai si isuratken i bas Pustaka Si Badia sue ras si ikataken Kesah Si Badia arah Daud kerna Judas si maba kalak nangkap Jesus.
17Judas sekalak anggota terpukta, erkiteken ia pe nggo ipilih Jesus guna muat bagin i bas dahin enda."
18(Alu duit si idat Judas arah perbahanenna si jahat itukurna sada lambar taneh. I je me ia ndabuh seh mate. Beltekna mburtas ndaraten tukana.
19Kerina anak Kota Jerusalem meteh kerna si e. Emaka i bas cakapna taneh e igelarina "Akeldama" ertina Taneh Dareh.)
20"Sabap lit tersurat i bas Kitap Masmur, 'Terulang min rumahna, ulanai min lit si ngianisa'. Lit ka pe tersurat, 'Igantiken kalak si deban min jabatenna.'
21Erdandanken si emaka arus itambahi sekalak nari teman kami jadi saksi maka Tuhan Jesus nggo keke i bas si mate nari. Si ipilih e arus pe si rusur ngikut Jesus asum Ia erdalan-dalan ras kita.
22Eme mulai i bas paksa Johanes ndilo kalak gelah iperidiken seh ku paksa Jesus iangkat i tengah-tengahta nari ku Surga."
23Emaka iusulken kalak e dua kalak dilaki, eme Jusup si igelari Barsabas (igelari pe ia Justus) ras si Matias.
24Jenari ertoto perpulungen e nina, "O Tuhan ItehNdu kap seh ku pusuh peraten manusia kerina. Perbahan si e Tuhan, tuduhken min man kami si apai ipilih Kam i bas si dua kalak enda,
25lako ngaloken jabaten rasul, guna ndahiken dahin si nggo itadingken Judas, Judas si nggo lawes ku inganna si patut."
26Jenari itikam tanduk kalak eme guna milih sekalak i bas si dua e. Gelar si terpilih eme Matias. Alu bage Matias me bengket ku bas terpuk rasul si sepulu sada kalak.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel