Paulus i Makedoni ras i Akaya
1Piga-piga wari kenca guntar ndai ipepulung Paulus ajar-ajar jenari pegegehina ukur ajar-ajar e. Janah kenca sisalam-salamen, berkat ia ku Makedoni.
2Isiari Paulus taneh e, iajari dingen ipegegehina ukur kalak si nggo tek man Jesus jenari seh ia i Junani, Propinsi Akaya.
3Kenca telu bulan dekahna i je erlayar atena ku Siria. Tapi perbahan ibegina berita maka kalak Jahudi ersura-sura munuh ia, emaka mulihken ia arah Makedoni.
4Ia itemani Sopater anak Pirus si i Berea nari, Aristarkus ras Sekondus duana i Tesalonika nari, Gayus i Derbe nari, Timotius ras dua kalak i Asia nari eme Tikikus ras Tropimus.
5Kalak enda kerina leben berkat janah itimaina kami i Troas.
6Kenca lepas Wari Raya Roti si la erragi erlayar kami i Pilipi nari janah kenca lima wari maka kami seh i Troas dingen jumpa ras teman-teman kami. I Troas pitu wari kami dekahna.
Si perpudina Paulus ku Troas ndahi Perpulungen
7I bas wari Sabtu berngi pulung kami ras-ras guna man ras-ras. Asum si e ngerana Paulus man perpulungen seh mbages berngi, sabap berkat atena pepagina.
8Melala lampu ipasang i bas ruangen i datas loteng ingan kami pulung e.
9Sekalak anak perana gelarna Etikus kundul i jendela. Perbahan dekahna Paulus ngerana, munduk-unduk kal anak perana e. Dungna tunduh ia, jenari ndabuh ia ku teruh i datas tingkat telu nari. Asum iangkat kalak e ia, tapi nggo mate.
10Nusur Paulus ku teruh jenari tungkuk ia, idakepna anak perana e janah nina man kalak si pulung, "Ula aru atendu, ia nggeluh denga nge."
11Kenca bage mulihken Paulus ku datas loteng, icepik-cepikna roti. Jenari man ia ras kalak si nggo tek man Jesus e. Kenca dung man ndekah denga ia ngerana ras perpulungen e, seh terang wari, jenari berkat ia.
12Anak perana e itaruhken perpulungen ku rumahna. Meriah kal ukur perpulungen sabab nggeluh denga ia.
Paulus lawes ku Miletus i Troas nari
13Jenari leben kami berkat ku kapal janah erlayar ku Asos. Ate kami ninggahi Paulus i Asos bagi nggo isuruhna, perbahan ia erdalan arah daraten ku jah.
14Kenca jumpa kami i Asos, ibaba kami ia ku kapal jenari terus erlayar ku Mitilena.
15I Mitilena nari terus kami erlayar janah pepagina ka maka kami seh i bas sada ingan si petala-tala ras Kios. Sada wari nari ka kenca si e seh kami i Samos janah pepagina ka i Miletus.
16Nggo itetapken Paulus maka la ia singgah arah Epesus gelah ula ndekah i Propinsi Asia. Merudu Paulus sabap adi banci seh min atena i Jerusalem asum wari Pentakosta.
Kata-kata perpisahan i bas Paulus nari man Pertua-pertua i Epesus
17Emaka isuruh Paulus sekalak i Miletus nari ku Epesus ngelegi pertua-pertua Epesus.
18Kenca reh pertua-pertua e nina Paulus man bana, "Ietehndu kuga aku nggeluh dingen erdahin tep-tep wari i tengah-tengahndu mulai kin tangtangna seh aku i daerah Asia.
19Alu meteruk ukur kudahi dahin Tuhan. I bas dahin e melala iluhku mambur janah melala percuban man bangku i bas kalak Jahudi nari, si ersura-sura munuh aku.
20Amin bage gia la pernah aku surut nehken si mehuli man bandu. Kuberitaken dingen kuajarken man bandu berita kerna Tuhan Jesus, subuk i lebe-lebe kalak si nterem, bage pe i rumahndu.
21Kuusahaken pe gelah kalak Jahudi bage pe kalak si labo Jahudi jera kempak Dibata, janah gelah tek ia man Tuhanta Jesus Kristus.
22Janah genduari arah penjemba Kesah Si Badia, lawes me aku ku Jerusalem. Labo kueteh kai pagi si jadi man bangku i jah.
23Saja ngenca i bas tep-tep kuta si kudahi ipersingeti Kesah Si Badia man bangku maka penjara ras melala kiniseran nggo nimai aku.
24Tapi labo persoalen man bangku kerna diringku, gelah min banci aku seh ku ujung perlumban dingen kudungi dahin si ibereken Tuhan Jesus man bangku, eme meritaken Berita Si Mehuli kerna lias ate Dibata.
25Nggo kudahi kam kerina guna meritaken Kinirajan Dibata. Janah genduari kueteh maka lanai pagi kita jumpa.
26Perbahan si e, i sendal kukataken man bandu: adi lit pagi kam bene i bas Dibata nari, la aku si salah.
27Sabap man bandu nggo kupeseh kerina sura-sura Dibata.
28Emaka jagailah dirindu dingen jagai pe kerina kalak si nggo itetapken Kesah Si Badia man kepkepenndu. Permakanilah perpulungen Tuhan si nggo ItebusiNa alu engkorbanken DiriNa seh mate.
29Kueteh pe maka kenca aku lawes, reh me serigala si merawa ku tengah-tengahndu si la alang-alangen ncedaken perpulungen e.
30Bage pe i tengah-tengahndu nari keke me kalak si ngajar alu pengajaren si la tuhu. Atena narik kalak si nggo tek man Jesus jadi pengikutna.
31Perbahan si e erjaga-jagalah dingen inget maka telu tahun dekahna kuajari kam sekalak-sekalak suari ras berngi alu iluh mambur.
32Janah genduari kuendesken kam ku bas pengepkepen Dibata dingen ku bas Kata lias AteNa, si Ngasup mpegegehi kam dingen mereken pasu-pasu man bandu, eme pasu-pasu si nandangi IberekenNa man kalak si nggo IpilihNa.
33La pernah aku ersura-sura gelah ibereken man bangku pirak ntah emas ntah uis.
34Kam pe ietehndu nge maka tanku enda nge erdahin guna keperlunku ras teman-temanku.
35I bas si enda kerina, nggo kucidahken si man usihenndu. Kita arus mejingkat erdahin guna nampati kalak musil. Ingetlah kata si ikataken Tuhan Jesus nina, 'Malemen kap ate mere asangken ngalo.'"
36Kenca dung Paulus ngerana erjimpuh ia ras kalak e kerina dingen ertoto man Dibata.
37Tangis kalak e kerina, idakepina dingen iemaina Paulus.
38Ceda kal atena perbahan ikataken Paulus maka lanai pagi ia jumpa. Jenari itaruhken kalak e Paulus ku kapal.
<< Kisah Para Rasul 20 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel