Paulus lawes ku Jerusalem
1Kenca kami sirang ras kalak ndai, terus kami erlayar ku pulau Kos. Pepagina seh kami i pulau Rodus, janah i Rodus nari lawes kami ku Patara.
2I Patara lit sada kapal muatna berkat ku Penike. Inangkihi kami kapal e, jenari berkat kami erlayar.
3Kenca teridah pulau Kiprus arah kawes iterusken kami erlayar ku Siria. Singgah kami arah Tirus sabap muaten kapal e ibongkar i je.
4Nusur kami i datas kapal nari, jenari idahi kami kalak si nggo tek man Jesus. Sada minggu dekahna kami ras kalak si nggo tek e. Bekas pengajari Kesah Si Badia alu mesek-sek nina kalak si nggo tek e man Paulus, "Ula kam lawes nangkeng ku Jerusalem."
5Tapi kenca seh paksana kami berkat, iterusken kami perdalanen kami. Kerina kalak e ras ndeharana bage pe anak-anakna ikut naruhken kami ku darat kuta. I tepi lawit ras-ras kami erjimpuh ertoto man Dibata.
6Jenari kenca kami sisalam-salamen, nangkih kami ku kapal janah kalak e mulihken ku rumah.
7I Tirus nari erlayar kami ku Ptolomais. I Ptolomais idahi kami senina-senina si sada kiniteken janah i je kami sada wari.
8Pepagina berkat ka kami, janah seh kami i Kesarea. I Kesarea bengket kami ku rumah Pilipus. Dahin Pilipus meritaken Berita Si Mehuli. Ia me salah sada i bas si pitu kalak si nggo ipilih i Jerusalem. I rumahna eme kami kesilang.
9Lit empat kalak anak Pilipus si nguda-nguda si nggo biasa ernubuat.
10Kenca piga-piga wari kami i kuta e, reh sekalak nabi i Judea nari gelarna Agabus.
11Idahina kami, jenari ibuatna benting Paulus. Iiketkenna ku nahena ras ku tanna jine jenari nina, "Nina Kesah Si Badia: empu benting enda iiket kalak Jahudi pagi bagenda i Jerusalem janah iendeskenna pe ia man si labo kalak Jahudi."
12Megi kata enda ipindoken kami alu mesangat ras perpulungen gelah ula min lawes Paulus nangkeng ku Jerusalem.
13Tapi ngaloi Paulus nina, "Ngkai maka kam tangis? Ngkai maka ilemahkenndu semangatku arah pertangisndu e. Aku nggo sikap labo saja iiket i Jerusalem, tapi pe ersedia aku ibunuh i je erkite-kiteken Tuhan Jesus."
14La kami ngasup ngendik-ngendik Paulus gelah ula ia lawes ku Jerusalem, emaka ningkami, "Peraten Tuhanlah jadi."
15Kenca piga-piga wari dekahna kami ringan i Kesarea, ersikap kami jenari berkat ku Jerusalem.
16Ikut pe ras kami piga-piga kalak anggota perpulungen Kesarea. Ia me si naruhken kami ku rumah Menason. I je me kami kesilang. Menason enda asalna i Kiprus nari. Ndekah me ia tek man Jesus.
Paulus ndahi Jakup
17Kenca seh kami i Jerusalem, ialo-alo perpulungen kami alu meriah ukur.
18Pepagina Paulus ras kami lawes ndahi Jakup. Pertua-pertua i bas perpulungen Jerusalem e pe reh ku je.
19Paulus ngataken mejuah-juah man kalak si pulung e. Jenari iturikenna sada-sadai kerina si nggo ibahan Dibata arah pendahinna i tengah-tengah kalak si labo kalak Jahudi.
20Kenca ibegi kalak ndai kai si ituriken Paulus, ipujina Dibata. Jenari nina man Paulus, "O senina, nehenlah maka nggo meribu-ribu kalak Jahudi i Jerusalem enda tek man Jesus janah kerina ia patuh man Undang-undang Musa.
21Nggo ibegina kerna kam maka iajarindu kerina kalak Jahudi si ringan i negeri si deban gelah nadingken Undang-undang Musa. Nggo ibegina maka ikatakenndu man kalak e gelah ula isunatken anak-anakna ntah pe gelah ula ngikutken adat kalak Jahudi.
22Dage genduari, kai nge arus sibahan? Kugapa pe nggo ietehna maka kam nggo seh i jenda.
23Emaka ula simbakndu kai si ikataken kami man bandu. I jenda lit empat kalak si gedang bukna perbahan lit padanna man Dibata.
24Ras kalak e kam ngikuti cara pembersihen rikutken aturen agama janah galari biaya persembahen kalak e gelah banci igunting bukna. Alu bage la tek kalak Jerusalem enda nandangi berita si nggo ibegina kerna kam, sabap kam jine ngikuti Undang-undang Musa.
25Tapi nandangi si labo kalak Jahudi, si nggo tek man Jesus, nggo kap mbarenda sibahan surat man bana gelah ula ipanna pangan si nggo ipersembahken man berhala-berhala, bage pe gelah ula ipanna dareh tah asuh-asuhen si mate la igeleh, janah gelah ula ia erlagu la mehuli."
26Emaka pepagina lawes Paulus ras si empat kalak e janah ras ia ngikuti acara pembersihen dirina rikut acara agama Jahudi. Jenari lawes ia ku Rumah Pertoton guna pebetehken ndigan warina idungi pembersihen e dingen ndigan ipersembahken persembahenna sekalak-sekalak.
Paulus itangkap i Rumah Pertoton
27Tapi asum jangka si pitu wari e nandangi dung, piga-piga kalak Jahudi si reh i Propinsi Asia nari ngidah Paulus i bas Rumah Pertoton. Iajuk-ajukna kalak si nterem e, jenari itangkapna Paulus.
28Alu sora si megang nina, "O kalak Israel! Mari sampati kami! Enda me jelmana si ngajari kalak si nterem i japa pe guna ngelawan bangsanta ras ngelawan Undang-undang Musa bage pe ngelawan Rumah Pertoton enda! Janah genduari nggo ibabana pe kalak perbegu ku bas Rumah Pertoton enda! Keliamen ibahanna ingan si Badia enda!"
29(Si enda ikataken sabap nggo idahna Paulus gawah-gawah i kuta e ras Tropimus kalak Epesus. Iakapna maka nggo ibaba Paulus ia ku Rumah Pertoton e.)
30Emaka guntar kuta e; kiamen anak kuta e reh. Itangkapna Paulus dingen isarenna ndarat i bas Rumah Pertoton e nari, janah minter ikuncina pintun Rumah Pertoton.
31Asum irencanakenna munuh Paulus, lit piga-piga kalak nehken berita man puanglima Roma. Iberitakenna maka lit kegujuhen i bas kuta e.
32Emaka minter ibuatna sada rombongen perajurit ras piga-piga kalak perwira, jenari alu pedas kiam ia ku tengah jelma si nterem e. Asum idah kalak si nterem puanglima ras perajurit-perajurit e, ngadi ia mekpeki Paulus.
33Ideheri puanglima e Paulus, itangkapna janah isuruhna perajurit-perajurit ngiket Paulus alu dua rante. Jenari nungkun puanglima e nina, "Ise kin enda, janah kai kin nggo ibahanna?"
34Kerina kalak si nterem e ngaloi alu sora si megang, lit si ngataken bagenda lit si ngataken bagah. Perbahan gejekna jelma si nterem e lalap la ieteh puanglima e kai si tuhuna si nggo jadi. Emaka isuruhna prajuritna mbaba Paulus ku bas markas.
35Kenca seh i tangga terpaksa iangkat perajurit-perajurit e Paulus perbahan nggo ngganas kal kalak si nterem e.
36Kerina kalak si nterem e ngayakisa janah serko ia kerina alu sora si megang, "Bunuhlah ia!"
Paulus mbela dirina
37Asum Paulus nandangi ibaba perajurit e bengket ku markas, ngerana ia man puanglima e nina, "Banci aku ngerana man bandu?" Ngaloi puanglima e nina, "Ietehndu cakap Junani?
38Jadi la dage kam kalak Mesir si mbaru enda erbahan pemberontaken dingen si kiam ras empat ribu kalak penghianat si ersenjata ku taneh si melungun?"
39Ngaloi Paulus nina, "Aku kalak Jahudi, kutangku i Tarsus, eme kuta si terberita i Kiliki. Mindo aku man bandu gelah banci min aku ngerana man kalak si nterem enda."
40Ibere puanglima e Paulus ngerana. Emaka tedis ia i tangga. Ibahanna tanda alu tanna gelah ula gejek kalak si nterem. Kenca teneng kalak si nterem e, ngerana Paulus i bas cakap Jahudi nina,
<< Kisah Para Rasul 21 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel