Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 26 >> 

Paulus mbela dirina i lebe-lebe Raja Agripa

1Nina Agripa man Paulus, "Genduari banci kam ngerana guna mbela dirindu." Kenca Paulus ngangkat tanna guna mereken penghormaten man anggota sidang, ibenakenna ngerana nina,

2"O Raja Agripa, megah kal kuakap sabap sendah banci aku ngerana i lebe-lebendu mbela diringku nandangi kerina pengadun kalak Jahudi.

3Terlebih-lebih megah kuakap sabap ietehndu kal alu payo adat istiadat kalak Jahudi ras persoalen-persoalenna. Emaka kupindoken gelah megenggeng kam megiken aku.

4Kerina kalak Jahudi meteh kerna kegeluhenku mulai kitik-kitikku nari. Ietehna kerina lagu langkahku ras perbahanenku subuk asum aku i kutangku bage pe asum aku i Jerusalem.

5Ndekah me ietehna maka aku masuk golongen si tutusna kal ersembah man Dibata i bas agama Jahudi, eme golongen Parisi. Janah adi bage atena banci pe iturikenna kerna aku.

6Janah genduari iadili aku i jenda perbahan erpengarapen aku nandangi padan si ibahan Dibata man nininta nai.

7Eme padan si iarapken bangsa si sepulu dua suku. Em sabapna maka isembahna Dibata suari ras berngi. Janah perbahan pengarapen enda me, o raja, maka aku iaduken kalak Jahudi.

8O kam kerina si pulung i jenda, ngkai kin iakapndu maka la mungkin ipegeluh Dibata mulihi kalak si nggo mate?

9Aku jine nai erpengakap maka tugasku kal kuakap ngelawan pengaruh gelar Jesus kalak Nasaret e.

10Janah nggo pe kudalanken i Jerusalem alu kuasa si ibereken imam-imam si mbelin man bangku. Nterem kalak si nggo tek man Jesus kutangkap janah kutamaken ku bas penjara. Janah asum kalak e iukum mate, aku me sekalak si setuju i bas pembunuhen e.

11Megati kalak si nggo tek man Jesus e kusiksa i bas rumah-rumah persembahen. Kupaksaken gelah ipersokenna kinitekenna man Jesus. Janah perbahan segatna ateku ngenehen kalak si nggo tek man Jesus e, kuayaki pe ia seh ku kuta-kuta i darat taneh Jahudi guna niksaisa."

Ituriken Paulus kerna ia jera

12"Guna si e kap maka lawes nai aku ku Damaskus alu kuasa ras perentah imam-imam si mbelin.

13Tapi o Raja Agripa, sanga ciger wari aku i tengah dalan, rempet kuidah sinalsal nusur i langit nari terangen asa matawari. Isalsalina aku ras teman-temanku si sada dalanen.

14Kerina kami ndabuh ku taneh janah kubegi sora erlebuh man bangku i bas cakap Jahudi, 'O Saul, Saul ngkai maka Aku isiksandu? Isiksandu kap dirindu bagi nukuli pergalah si entelap.'

15Jenari ngaloi aku, 'Ise kin Kam Tuhan?' Erjabap Tuhan, 'Aku kap Jesus, si isiksandu.

16Tapi kekeken janah tediskenlah! Kucidahken diringKu man bandu guna milih kam jadi si erdahinKu ras saksingKu. Gelah iturikenndu man kalak si deban kai si nggo idahndu sendah, eme kerna Aku, bage pe gelah iturikenndu kai si Kucidahken pagin man bandu.

17Kupulahi kam pagi i bas tan bangsa Israel nari ras i bas kalak si deban si labo kalak Jahudi si Kusuruh idahindu.

18Pemedakken matana gelah itadingkenna si gelap guna bengket ku bas si terang. Bage pe gelah itadingkenna kuasa Iblis jenari reh ku Dibata. Gelah erdandanken tek ia man bangKu, Kualemi dosa-dosana. Bage pe gelah ialokenna ingan, eme ingan si patut ialoken kalak si ipilih Dibata.'"

Ituriken Paulus pendahinna

19"Janah bage me, o Raja Agripa, kupatuhi pengenehenen si kualoken i bas Dibata nari e.

20Mula-mula kuajari kalak Jahudi si i Damaskus jenari si i Jerusalem ras si i belang-belang taneh Judea, bage pe kalak si labo kalak Jahudi gelah kerina jera dingen reh ku Dibata. Kuajari pe ia gelah icidahkenna arah perbahanen si mehuli maka ia nggo jera.

21Perbahan si enda me maka itangkap kalak Jahudi aku asum aku i Rumah Pertoton, janah ibunuhna pe atena aku.

22Tapi seh i bas wari enda aku tetap isampati Dibata. Erkiteken si e tedis aku i jenda nuriken kerna Jesus man kerina manusia subuk man kalak si mbelin bage pe man kalak si meteruk. Kai si kuturiken e bali nge ras si nggo leben ituriken nabi-nabi ras Musa.

23Eme: Mesias e arus ngenanami kiniseran seh mate, janah Ia me si tangtangna ipegeluh Dibata i bas si mate nari, gelah arah KekekenNa e banci IcidahkenNa terang keterkelinen subuk man kalak Jahudi bage pe man kalak si deban si labo Jahudi."

24Asum Paulus ngerana denga nina Pestus man bana alu sora si megang, "Nggo mehado kam e Paulus! Pemetehndu si melala e erbahanca kam nggo mehado!"

25Tapi ngaloi Paulus nina, "O Pestus si mehamat, aku labo mehado. Kai si kukataken enda tuhu-tuhu nge, janah jore-jore nge ukurku ngerana enda.

26O Raja Agripa, tentu ietehndu kerina persoalen enda, emaka pang aku ngerana man bandu. Tek aku maka labo lit sada pe i bas e langa ibegindu, sabap kerina enda labo terjadi i tengah kerangen si terbuni.

27O Raja Agripa, tek nge kam man kai si ikataken nabi-nabi? Kueteh nge maka tek kam."

28Ngaloi Raja Agripa man Paulus nina, "Iakapndu kin maka i bas paksa si kentisik enda banci aku ibahanndu jadi kalak Kristen?"

29Ngaloi Paulus nina, "Pertotonku man Dibata gelah i bas paksa si kentisik tah ndekah denga gia, kam ras kerina si megiken aku sendah banci jadi bali ras aku, seakatan rante enda."

30Jenari tedis raja, gubernur bage pe Bernike ras kerina kalak si kundul ras ia i je.

31Muatna ndarat ngerana ia sapih-sapih ia nina, "Labo lit perbahanenna si salah si sue ras ukumen mate ntah ukumen penjara."

32Jenari nina Agripa man Pestus, "Si tuhuna nggo banci ia ibebasken adi la min ndai ituntutna hakna maka Kaisar mutusken perkarana."



 <<  Kisah Para Rasul 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel