Dosa (Mat 18:6-7, 21-22; Mrk 9:42)
1Jenari nina Jesus man ajar-AjarNa, "La banci lang ndabuh kalak ku bas dosa arah erbage-bage dalan; tapi andiko cilaka kal si arah ia dalanna maka kalak ndabuh ku bas dosa.
2Ulin me irakuti batu penggilingen i bas kerahungna jenari iambekken ia ku lawit asangken kalak si kitik enda ibabaina erdosa.
3Jagailah dirindu! Adi erdosa seninandu, ajarkenlah ia. Janah adi robah ia, alemilah.
4Bage pe adi ersalah ia pitu kali sada wari nandangi kam, janah tep-tep ersalah, reh ia ndahi kam, janah nina, 'Aku nggo robah, arus maka ialemikam ia.'"
Kiniteken
5Emaka nina rasul-rasul e man Tuhan, "Pegegehi min kiniteken kami."
6Ngaloi Tuhan, "Adi lit kinitekenndu sengkebuah sabi lah gia, banci ikatakenndu man batang ara enda, 'Meruahlah kam, suanken bandu i bas lawit!', janah minter pe ikutkenna katandu e."
Kewajipen sekalak suruh-suruhen
7"Adi sekalak i bas kam lit suruh-suruhenna sangana nenggala ntah pe ermakan biri-biri. Mulih kenca ia i juma nari, minter kin idilondu ia man?
8Tentu lang! Tapi nindu, 'Pesikap nakanku; erbenting kibul kam janah elai aku. Kenca aku elah, emaka banci kam man.'
9Ikatakenndu kin bujur man suruh-suruhenndu adi idalankenna kerina kewajipen e?
10Bage pe kam; adi nggo idalankenndu kerina kewajipenndu, nindulah, 'Kami enda suruh-suruhen si la erguna, kewajipen kami ngenca idalanken kami.'"
Ipepalem Jesus sepuluh kalak si gadamen
11I bas perdalanen Jesus ku Jerusalem, mentas Ia arah perbatasen Samaria ras Galilea.
12Asum bengket Ia ku bas sada kuta, reh sepuluh kalak gadamen njumpai Ia. Si sepuluh kalak enda tedis i dauh-dauh nari,
13janah alu megang sora erlebuh ia nina, "O, Jesus! O, Tuhan! Mekuah min atendu kami."
14Kenca idah Jesus kalak e nina, "To lawes, cidahken badanndu man imam." I tengah dalan nggo malem penakit kalak enda ndai.
15Sekalak i bas si sepuluh kalak e, kenca idahna maka nggo mejelis kulana, mulihken, ia, ipujina Dibata alu sora megang.
16Erjimpuh ia i lebe-lebe Jesus janah ikatakenna bujur. Kalak si mulihken enda e me kalak Samaria.
17Emaka nina Jesus, "Ma sepuluh kalak kin si malem ndai? I ja siwah kalak nari?
18Ngkai maka kalak si lain bangsa enda ngenca mulihken ngataken bujur man Dibata?"
19Jenari nina Jesus man bana, "Kekeken to mulihken; kinitekenndu nggo erbahanca kam malem."
Kerehen kuasa Dibata (Mat 24:23-28, 37-41)
20Piga-piga kalak Parisi nungkun man Jesus kerna ndigan kin rehna Kerajan Dibata e. Erjabap Jesus, "Kinirajan Dibata labo reh alu tanda-tanda si banci iidah manusia.
21Emaka labo beluh kalak ngatakenca, 'Enda kap, mari nehen ku jenda,' ntah pe, 'Ah, adah i jah kap Ia.' Sabap Kinirajan Dibata e nggo kap i bas kam."
22Jenari nina man ajar-AjarNa, "Reh me pagi paksana maka mesikel kam ngidah sada wari i bas wari-wari Anak Manusia si isuruh Dibata, tapi la banci idahndu.
23Ikataken kalak me pagi man bandu, 'Nehenlah, i jenda kap Ia!', ntah, 'I jah kap Ia!' Tapi ola kam ku je ngenehenca.
24Sabap kerehen Anak Manusia persuruhen Dibata i bas warina, bali kap ras kilap si erbinar i langit ngencer i tampukna nari seh seh ku tampukna si deban.
25Tapi ope denga reh warina e, la banci lang maka InanamiNa lebe melala kiniseran dingen itulak bangsa si genduari enda Ia.
26Bagi sanga Nuah nai, bage me pe pagi kerna kerehen Anak Manusia persuruhen Dibata e.
27Kerina kalak, man, minem, sereh bage pe empo, seh warina Nuah bengket ku bas perahuna. Jenari reh banjir si mbelin janah kerina kalak mate gedap.
28Bage me pe tupung paksa Lut. Kerina kalak man, minem, erbinaga, nukur, nuan-nuan bage pe mbangun rumah.
29Tapi i bas warina Lut nadingken Sodom, ipesusur Dibata me udan api ras kertah i langit nari si erbahanca jelma si nterem mate.
30Bage me pe pagi jadi i bas warina Anak Manusia persuruhen Dibata ncidahken DiriNa.
31Ise pagi paksa si e kundul-kundul pekesahken i darat, olanai ia bengket ku rumah muat erta-ertana; bage pe kalak si i juma olanai ia mulihken ku rumah ngelegi erta-ertana.
32Ingetlah ndehara Lut!
33Ise si mpertahanken kegeluhenna, ia kebenen geluhna si tuhu-tuhu; tapi kalak si kebenen geluhna, si tuhuna ia nggo mpertahanken kegeluhenna si tuhu-tuhu.
34Kukataken pe man bandu, i bas berngi si e pagi lit dua kalak medem i bas sada ingan medem: sekalak ibuat, sekalak nari itadingken.
35Dua kalak diberu sanga nutu, sekalak ibaba sekalak nari itadingken."
36(Dua kalak dilaki si i juma: sekalak ibaba, sekalak nari itadingken.)
37Emaka nungkun ajar-ajar man Jesus nina, "I ja e pagi jadi Tuhan?" Erjabap Jesus, "I ja lit bangke, i je pulung perik-perik si man bangke."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel