Ipepalem Jesus sekalak si pangpangen (Mat 9:1-8; Luk 5:17-26)
1Kenca lepas piga-piga wari mulihken Jesus ku Kapernaum. Minter mbar berita maka Ia i rumah.
2Emaka nterem jelma rehen seh maka rumah ndai nggo picet. I lebe-lebe pintun pe nterem jelma. Sanga Jesus ngajar,
3reh empat kalak dilaki ngelanja sekalak si pangpangen.
4Perbahan picetna rumah, lanai lit dalan naruhken si pangpangen e man Jesus. Emaka italangi si empat kalak ndai tarum rumah ningtangken ingan Jesus. Kenca talang, itantanna kalak si pangpangen e ras tilamna ku teruh.
5Ngidah belinna kiniteken kalak enda nina Jesus man si pangpangen ndai, "O, anakKu, dosandu nggo ialemi."
6Piga-piga guru agama si kundul i je nungkun i bas ukurna,
7"Ngkai maka bage kal pangna Ia ngerana? Ia encekuraki Dibata. Ise pe labo ngasup ngalemi dosa, seakatan Dibata."
8Minter ieteh Jesus perukuren kalak enda, emaka nina Jesus man bana, "Ngkai maka bage perukurenndu?
9Sukahen kin ngatakenca man kalak si pangpangen enda, 'Dosandu nggo ialemi,' asangken, 'Kekeken, angkat tilamndu, erdalanlah?'
10Kucidahken pe man bandu, maka lit kuasa i bas Anak Manusia persuruhen Dibata guna ngalemi dosa i doni enda." Emaka nina Jesus man kalak si pangpangen ndai,
11"Kukataken man bandu, kekeken, angkat tilamndu, jenari mulihlah ku rumahndu!"
12Sanga si e minter ia keke i lebe-lebe jelma si nterem, janah iangkatna tilamna jenari berkat ia. Mamang kal ate kalak ngidahsa. Emaka ipujina Dibata nina, "Langa pernah idah kami kejadin si bagenda!"
Idilo Jesus si Lewi (Mat 9:9-13; Luk 5:27-32)
13Lawes ka Jesus ku tepi Dano Galilea. Kalak si nterem reh ndahi Ia. Emaka IbenakenNa ngajar.
14Kenca Jesus erdalan ka i bas ingan si ndai nari, IdahNa sekalak pengalo cuke, gelarna Lewi anak Alpeus, kundul i bas kantorna. Emaka nina Jesus man bana, "Ikutken Aku." Minter keke Lewi ikutkenna Jesus.
15Sekali jadi, man Jesus ras ajar-AjarNa i rumah Lewi. Nterem pengalo cuke ras kalak perdosa reh ngikutken Jesus. Janah nterem i bas kalak e nari man nemani Jesus ras ajar-AjarNa.
16Piga-piga guru agama kalak Parisi ngidahsa. Emaka isungkunna ajar-ajar Jesus nina, "Ngkai maka Ia man dingen minem ras pengalo cuke bage pe ras kalak perdosa e?"
17Penungkunen enda ibegi Jesus emaka IjabapNa, "Kalak sakit nge si perlu dokter, labo kalak sehat. Aku reh labo guna ndilo kalak si bujur akapna bana tapi guna ndilo kalak perdosa."
Kerna erpuasa (Mat 9:14-17; Luk 5:33-39)
18Sekali jadi sanga ajar-ajar Johanes Peridiken ras kalak Parisi erpuasa, reh kalak nungkun man Jesus nina, "Ngkai maka ajar-AjarNdu la erpuasa, sedangken ajar-ajar Johanes Peridiken ras kalak Parisi erpuasa?"
19Erjabap Jesus nina, "Metunggung kin akapndu adi temue i bas kerja erdemu bayu erpuasa? Tentu lang. Sanga ia ras si empo denga tentu la ia erpuasa.
20Tapi lit masana maka sirang ia ras si empo. I bas paksa si e pagi erpuasa ia.
21La lit kalak ngerangkapi uis si nggo buruk alu uis si mbaru. Sabap adi bage ibahanna maka reh belangna rigat uis si buruk ndai.
22Bage pe labo itamaken kalak lau anggur si mbaru ku bas guci kuling-kuling si nggo male, gelah ola pecah guci ndai. Sabap adi bage ibahanna sia-sia anggur ras guci ndai. Si mehulina min anggur si mbaru itamaken ku bas guci si mbaru!"
Penungkunen kerna wari Sabat (Mat 12:1-8; Luk 6:1-5)
23Sekali jadi, sanga wari Sabat kalak Jahudi, Jesus ras ajar-AjarNa mentas arah juma gandum. Janahna erdalan iputikken ajar-ajar ruhi gandum e.
24Emaka nina kalak Parisi man Jesus, "Nehenlah! Ajar-AjarNdu ngelanggar Undang-undang agamanta. Ibahanna kai si la banci ilakoken i bas wari Sabat."
25Ngaloi Jesus, "Langa kin pernah iogendu kuga perbahanen Daud sanga ia ras teman-temanna i bas kepiceten ras kelihen?
26Kejadin e paksa Abiatar jadi Imam si Mbelin. Bengket Daud ku bas rumah Dibata janah ibuatna roti si ipersembahken man Dibata. Rikutken Undang-undang imam-imam ngenca banci man roti e. Tapi e me ipan Daud janah iberekenna pe man teman-temanna."
27Tole nina Jesus man kalak ndai, "Wari Sabat iaturken guna manusia. Labo manusia guna wari Sabat.
28Jadi Anak Manusia si isuruh Dibata pe erkuasa nandangi wari Sabat."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel