Mazmur 139 (KARO)

[VER] : [KARO] [PL] [PB]

<< Mazmur 139 >>

Kai pe ieteh dingen ikelengi Dibata

1I bas Daud nari. O TUHAN, nggo IujiNdu aku, janah IetehNdu kerina kerna aku.

2Kerina si kubahan IetehNdu, i dauh-dauh nari nggo IetehNdu isi pusuhku.

3Idahndu aku, subuk aku sanga erdahin ntah ngadi, kerina si kubahan IetehNdu kap.

4Ope denga pe aku ngerana, nggo leben IetehNdu kai ateku kubelasken.

5IkelewetiNdu aku; alu KuasaNdu IkawaliNdu aku.

6Mbagessa PenandaiNdu kerna aku, lanai terjaka perukurenku si e.

7Ku ja aku lawes maka aku pulah i bas Kam nari? Ku ja kukiamken maka aku ndauh i bas adep-AdepenNdu nari?

8Adi nangkih aku ku langit, nggo Kam i je, adi aku medem i bas doni kematen, Kam pe i je.

9Kune aku kabang kempak matawari pultak, ntah ringan aku i bas ingan si ndauh i matawari ben,

10i je pe aku ItaruhkenNdu, i je pe TanNdu nge si negu-negu aku.

11Aminna kupindoken maka ikeleweti gelap aku, ntah terang si lit i sekelewetku jadi berngi,

12tapi gelap e pe labo man BaNdu gelap, dingen berngi ersinalsal man BaNdu bagi suari, suari ntah berngi seri saja nge man BaNdu.

13Kam si njadiken tep-tep bagin i bas badanku, IbentukNdu aku i bas bertin nandeku.

14Kupuji Kam erkiteken KinirejinenNdu, mejin dingen la iangkai PerbahanenNdu tendingku enggejapken si e kerina.

15Tupung tulan-tulanku ijadiken, alu megermet isusun i bas bertin nandeku, asum reh belinna aku i je alu la ise pe metehsa, i je pe IdahNdu nge aku.

16Ope denga aku tubuh pe nggo aku ItandaiNdu, kerina wari-wari geluhku nggo isuratken i bas KitapNdu, ope denga wari-wari geluhku e ibenaken pe.

17O Dibata, andiko serana ngukuri PerukurenNdu, PerukurenNdu metahatsa kuakap nangkelisa.

18Adi kubeligai, buen kap e asangken kersik. Kune keke aku, ras Kam denga nge aku.

19O Dibata IbunuhNdu min kalak jahat, janah kalak si nggit ngamburken dareh, nadingken aku min.

20Ibelasken kalak perkatan si jahat kerna Kam, jahat rananna kerna Kam dingen ijurukenna pe GelarNdu.

21O TUHAN, nembeh kal ateku man kalak si ernembeh ate man BaNdu, ciga ateku man kalak si ngelawan Kam.

22Nembeh ateku man bana lanai teralang, emaka imbangku nge ia kuakap.

23Pepayolah aku o Dibata, tandailah pusuhku, uji dingen datkenlah perukurenku.

24Pepayolah ntah mawen lepak dalan si kudalani, jenari babailah aku arah dalan si tetap rasa lalap.

<< Mazmur 139 >>

Bahan Renungan: SH - RH - ROC