Pertoton mindo gelah ikawali
1Ende-enden anak Korah.
2O Dibata, nggo ibegi kami turi-turin si ituriken nini-nini kami, kerna perbahanen si mbelin si nggo IlakokenNdu i bas paksa si nggo lepas.
3Kam jine si pelawessa bangsa-bangsa si deban, gelah BangsaNdu banci ngiani negerina. Bangsa-bangsa si deban IcilakakenNdu, tapi BangsaNdu IpelepasNdu reh teremna.
4Iingani GangsaNdu negeri e labo perban pedang, labo perban gegehna jine maka ia menang, tapi erkiteken kuasa dingen GegehNdu, perban tetap ia itemanindu, si encidahken maka ia IkelengiNdu.
5Kam kap rajangku dingen Dibatangku, si mereken kemenangen man BangsaNdu.
6Alu KuasaNdu italuken kami musuh kami i bas GelarNdu iperjati kami musuh kami.
7Sabap labo kami ernalem man panah kami, pedang kami labo mereken kemenangen man bangsa kami.
8Tapi Kam kap si nggo engkelini kami i bas imbang-imbang kami nari. Kalak si ernembeh ate man kami, IjurukenNdu ia.
9Emaka gedang-gedang wari Kam ipuji kami, dingen asa lalap kami ngataken bujur man BaNdu.
10Tapi genduari ItulakNdu kami, IpelepasNdu kami italuken. Lanai Kam erperang radu ras tentera kami.
11IpelepasNdu kami ielis-elis imbang si ngerampasi erta kami.
12IpelepasNdu kami igeleh bali ras biri-biri, IhuntakkenNdu kami itengah bangsa-bangsa.
13IdayakenNdu BangsaNdu alu la meherga, arah tukurna nari la lit untungndu sitik pe.
14Teman-teman kami ngidah PerbahanenNdu man kami, i uru-uruna dingen itawa-tawaina kami.
15IbahanNdu maka kami jadi pertawa-tawan i tengah bangsa si deban, ngupir ia janah igombangina kami.
16Gedang-gedang wari kami ipandangi, lalap mela iakap kami,
17megiken penguru-nguru janah kata megombang, si luar i bas imbang dingen kalak si ernembeh ate man kami.
18Kerina e nggo nindih kami, aminna pe la kami lupa man bandu, janah la ilanggar kami perpadanen si IbahanNdu ras kami.
19Labo kami la patuh, labo la iikutken kami perentah-PerentahNdu.
20Tapi ItadingkenNdu kami i bas gelap mesangat; i tengah-tengah rubia-rubia si meliar.
21Adi lanai kami nembah Kam o Dibata kami, tapi ertoto man dibata-dibata si deban,
22tentu nggo IetehNdu, sabap IdahNdu kap terus ku bas perukuren kami si terbuni.
23Erdandanken Kam nge maka kami tetap iancam kematen, kami ipeseri ras biri-biri si man gelehen.
24Kekeken! Ngkai maka Kam tunduh, Tuhan? Tedisken! Ula rasa lalap kami ItulakNdu.
25Ngkai maka Kam cebuni? Ngkai maka Kam lupa kiniseran ras kesusahen kami?
26Ampar getem kami i babo taneh, terdang i bas abu erkiteken talu. <44:27> - Rehlah Kam nampati kami, kelini min kami erkiteken keleng AteNdu si tetap.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel