Alkitab Mobile SABDA
[VER] : [KARO]     [PL]  [PB] 
 <<  Mazmur 77 >> 

Pengapul tupung paksa kesusahen

1Masmur Asap.

2Alu sora megang kulebuh Dibata, alu sora megang erlebuh aku, jenari IbegikenNa aku.

3Tupung mesera, ertoto aku man Tuhan. Gedang-gedang berngi kudadaken tanku ertoto, tapi la jumpa aku pengapul.

4Adi kuinget me Dibata, ndehereng aku, adi kuukuri, reh getemna pusuhku.

5TUHAN erbahanca matangku la tertunduh gedang-gedang berngi, aru kal ateku seh maka lanai kal aku beluh ngerana.

6Kuinget wari-wari si nggo lepas, kuukurken tahun-tahun si nai.

7Tupung paksa berngi rukur-rukur aku; dingen nungkun-nungkun i bas ukurku.

8"Rasa lalap nge ndia kami itulak Tuhan? Lanai nge ndia AteNa mekuah ngenen kami?

9IngadikenNa kin ndia ngkelengi kami? La ndia itepatina PadanNa?

10Nggo kin ndia lupa Dibata ngkelengi kita? Nembeh ndia Ia, maka lanai mekuah AteNa kita?"

11Emaka ningku, "Si ceda kal ate, eme, adi Dibata si Meganjangna lanai erkuasa."

12Kuinget me perbahanen-PerbahanenNdu, o TUHAN, kuinget PerbahanenNdu si mejin i bas paksa-paksa si nai.

13Kuinget-inget kerina PerbahanenNdu, kuukuri PerbahanenNdu si mbelin.

14O Dibata, badia kap kerina PerbahanenNdu, la lit dibata si deban si seri belinna ras Kam.

15Kam kap Dibata si ngelakoken tanda kuasa si mbelin, IcidahkenNdu KuasaNdu i tengah-tengah bangsa-bangsa.

16Salu GegehNdu IpulahiNdu BangsaNdu, kesusuren Jakup ras Jusup.

17Ngidah kam, o Dibata, lau jadi gentar, lawit si mbagesna pe nggirgir.

18Embun nurcurken udan, lenggur erdegur i langit nari, kilap erkencir ku jah ku jenda.

19Lenggur erdegur, kilap ernala nerangi doni, doni enda mundu-undu dingen nggirgir.

20Kam erdalan i babo galumbang, IbentasiNdu lawit si mbelang, tapi la tereteh BekasNdu. <77:21> - Bali ras permakan, IbabaiNdu BangsaNdu, si ipinpin Musa ras Harun.



 <<  Mazmur 77 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel