Alkitab Mobile SABDA
[VER] : [KARO]     [PL]  [PB] 
 <<  Mazmur 9 >> 

Pengataken bujur sabap kemulian Dibata

1Masmur Daud.

2O TUHAN, alu bulat ukurku, kukataken bujur BaNdu. Kuturiken kerina tanda kuasa si nggo IbahanNdu,

3Meriah ateku i bas TUHAN emaka rende aku. O Dibata si Mada Kuasa, rende aku muji Kam.

4Imbang-imbangku kiam adi idahna Kam; gulingen ia kerina jenari mate.

5Kam kap Hakim si bujur, IbelaNdu kinibujurenku.

6IukumNdu bangsa-bangsa kalak jahat IkernepkenNdu, gelarna pe lanai iinget kalak.

7Imbang-imbang kami nggo lesap rasa lalap; kota-kotana nggo IradaskenNdu, tuhu-tuhu nggo ilupaken kalak ia.

8Tapi TUHAN kap raja rasa lalap; guna nghakimi IpajekkenNdu kursi KinirajanNdu.

9IperentahNa doni enda alu benar; alu adil, IhakimiNa bangsa-bangsa.

10TUHAN kap ingan cilinggem man kalak si itindih ingan erlinggem tupung paksa kiniseran.

11O TUHAN, kerina kalak si nandai Kam, ernalem man BaNdu; si ndahi Kam la kap ItadingkenNdu.

12Rendelah muji TUHAN, si merentah i Sion! Turiken man bangsa-bangsa kerna kai si nggo IlakokenNa!

13Inget Dibata kap kalak si mesera perserkona IdengkehNa; si ngamburken dareh IukumNa.

14O TUHAN, mekuah min AteNdu, nehenlah kiniseranku erkiteken imbang si ernembeh ate bangku. TUHAN, pulahi min aku i bas gerbang kematen nari,

15maka banci aku tedis i adep-adepen kalak Jerusalem gelah kuturiken man bana perbahanenndu si terpuji ersurak-surak aku erkiteken keterkelinen si rehna i bas Kam nari.

16Bangsa-bangsa engkali lubang, ia jine ndabuh ku bas, ia jine jertuh kena sidingna.

17Nggo ipetangkas TUHAN DiriNa arah KeputusenNa si adil. Janah kalak jahat isidingi alu perbahanenna jine.

18Kerina kalak jahat nulak TUHAN kap, kematen kap sikerajangenna.

19Kalak si mesera iakapna labo lalap ilupaken, pengarapen kalak musil labo bene asa lalap.

20Marilah o TUHAN! Ula pediat kalak ngelawan Kam! Babalah bangsa-bangsa ku adep-AdepenNdu janah hakimilah ia. <9:21> - O TUHAN, bahan maka mbiar ia kerina; pebetehken man bana maka manusia si ermasap-masap nge ia.



 <<  Mazmur 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel