Tembok kota Jerusalem ipajekken ka mulihi
1Si menaken dahin e Imam si Mbelin Eliasip ras teman-temanna imam si deban. Ipekenana mulihi Pintu Gerbang Biri-biri, jenari itangkuhkenna, janah pintu-pintu gerbangna ipasangna i bas inganna. Itangkuhkenna tembok e seh ku Menara Seratus ras Menara Hananel.
2Anak kuta Jeriho majekken bagin si sembelahna. Sakkur anak Imri majekken bagin si sembelahna ka.
3Terpuk Hassenaa majekken Pintu Gerbang Ikan. Itamakenna beloti-belotina ras pintu-pintuna, jenari ipasangna eruk-erukna ras ingan namaken eruk-eruk e.
4Meremot, anak Uria, kempu Hakkos, majekken bagin si sembelahna. Mesullam, anak Berehia, kempu Mesesabel majekken bagin si sembelahna ka. Sadok anak Baana majekken bagin si sembelahna.
5Anak kuta Tekoa majekken bagin si sembelahna, tapi kalak si meherga i bas kuta e la nggit ndahiken dahin si mberat si niendekesken pengawas-pengawas man bana.
6Joyada anak Pasea ras Mesullam anak Besodeya pekena Pintu Gerbang Jesana. Itamakenna beloti-belotina janah ipasangna eruk-erukna ras ingan namaken eruk-eruk e.
7Melatia i Gibeon nari, Jadon i Meronot nari, ras anak kuta Gibeon ras kuta Mispa majekken bagin si sembelahna, seh ngayak rumah gubernur Eprat Barat.
8Ussiel anak Harhaya, sekalak tukang emas, majekken bagin si sembelahna ka. Hanania, sekalak tukang minak wangi, majekken bagin si sembelahna seh ngayak Tembok si Mbelang.
9Repaya anak Hur, si merentah setengah daerah Jerusalem, majekken bagin si sembelahna.
10Jedaya anak Harumap majekken bagin si sembelahna ka, eme bagin si deher ras rumahna. Hattus anak Hasabneya majekken bagin si sembelahna.
11Malkiya anak Harim ras Hassup anak Pahat Moap majekken bagin si sembelahna ras Menara Ginuhur.
12Sallum anak Hallohes, si merentah daerah Jerusalem si sebelah nari, majekken bagin si sembelahna. (Anak-anakna si diberu ikut nampati i bas dahin e.)
13Hanun ras kalak si ringan i kota Sanoa pekena Pintu Gerbang Baluren. Itamakenna pintu-pintu gerbangna i bas inganna, ipasangna eruk-erukna ras ingan namaken eruk-eruk e, janah ipekenana tembok e 440 meter gedangna, seh ku Pintu Gerbang Sampah-sampah.
14Malkiya anak Rahap, si merentah daerah Bet Hakkerem, pekena Pintu Gerbang Sampah-sampah. Itamakenna pintu-pintu gerbangna i bas inganna, janah ipasangna eruk-erukna ras ingan namaken eruk-eruk e.
15Sallum anak Kolhose, si merentah daerah Mispa, pekena Pintu Gerbang Ulu Lau. Ibahanna tarum pintu gerbang e, ipasangna pintunna, bage pe eruk-erukna ras ingan namaken eruk-eruk e. I Kolam Sela ipajekkenna tembok sebelah peken raja, seh ngayak tangga Kota Daud.
16Nehemia anak Asbuk, si merentah setengah daerah Betsur, majekken bagin si sembelahna, seh ku kuburen Daud, ras ku kolam, janah seh ka ku asrama tentera.
Gelar-gelar kalak Lewi si mpekena tembok e
17Kalak Lewi si tersena arah teruh enda pekena piga-piga bagin tembok si tersinget i jenda. Rehum anak Bani majekken bagin si sembelahna; Hasabia, si merentah setengah daerah Keila, majekken bagin si sembelahna i bas gelar daerah e;
18Bawi anak Henadad, si merentah daerah Keila si setengah nari, majekken bagin si sembelahna;
19Eser anak Jesna, si merentah Mispa, majekken bagin si sembelahna, i lebe-lebe ingan nimpan senjata, seh ku suki tembok e;
20Baruh anak Sabbai majekken bagin si sembelahna, seh dalan bengket ku bas rumah Imam si Mbelin Eliasip;
21Meremot, anak Uria, kempu Hakkos, majekken bagin si sembelahna, seh ku ujung dingding rumah Eliasip.
Gelar imam-imam si mpekena tembok e
22Imam-imam si tersena arah teruh enda pekena piga-piga bagin tembok si tersinget i jenda. Imam-imam si asalna i daerah sekelewet Jerusalem nari majekken bagin sembelahna;
23Benyamin ras Hassup majekken bagin si sembelahna, eme si i lebe-lebe rumahna; Asaria, anak Maaseya, kempu Anania, majekken bagin si sembelahna, eme si i lebe rumahna;
24Binnui anak Henadad majekken bagin si sembelahna, mulai i bas rumah Asaria nari seh ku suki tembok e;
25Palal anak Usai majekken bagin si sembelahna, mulai i bas suki tembok e ras menara istana si arah gugung deherken kesain pengawal; Pedaya anak Paros majekken bagin si sembelahna, terus ku sada ingan arah kenjulu deherken Gerbang Lau ras menara si engkawali Rumah Pertoton. (Si enda inganna deherken bagin kota e si nigelari Opel; i je me ringan kalak si erdahin i bas Rumah Pertoton e.)
26(Neh 3:25)
Kalak si deban si ikut i bas dahin e
27Anak kuta Tekoa majekken si sembelahna, eme bagin kalak enda si peduaken, mulai i lebe-lebe menara si engkawali Rumah Pertoton e seh ku tembok deherken Opel.
28Anak terpuk imam-imam majekken bagin si sembelahna, mulai i bas Pintu Gerbang Kuda nari terus ku Utara, sekalak-sekalak majekken tembok i lebe-lebe rumahna.
29Sadok anak Immer majekken bagin si sembelahna, si i lebe-lebe rumahna. Semaya anak Sekanya, si ngurus Pintu Gerbang Timur, majekken bagin si sembelahna.
30Hanania anak Selemia, ras Hanun, anak Salap si peenemken, majekken bagin si sembelahna, bagin kalak enda si peduaken. Mesullam anak Berehia majekken bagin si sembelahna, eme si i lebe-lebe rumahna.
31Malkiya, sekalak tukang emas, majekken bagin si sembelahna, seh ku gedung si ipake perbinaga ras kalak si erdahin i bas Rumah Pertoton, eme si sebaleng ras Pintu Gerbang Mipkad, deherken kamar si lit i datas suki tembok Barat Laut.
32Tukang emas ras perbinaga majekken bagin si pendungina, mulai i bas suki ndai nari seh ku Kerabangen Biri-biri.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel