1Jenari kuperdiateken ka kerina kinilabujuren si jadi i bas pertibi enda. Kalak si itindih tangis tapi la lit sinampatisa. La lit sekalak pe nampati erkiteken belinna kuasa si nindih e.
2Morah ateku nandangi kalak si nggo mate, sabap ulin kap sikerajangenna asangken kalak si nggeluh denga.
3Tapi simalemna kal atena eme kalak si langa tubuh, sabap langa idahna kejahaten si ilakoken i bas pertibi enda.
4Kueteh maka nterem manusia seh kal iakapna latihna erdahin erkiteken mecimberu ia ngidah ulih latih temanna saja. Kerina e sia-sia nge desken nangkap angin.
5Ikataken kalak maka si motu ngenca kundul cirempu, janah igengkenna mate la man.
6Banci jadi payo nge katana e, tapi ulin me la mbue erta, tapi teneng nggeluh asangken duana tan erbentuas erdahin tapi desken nangkap angin.
7Lain asangken si e lit denga ka nge si sia-sia i bas kegeluhen enda.
8Lit kalak nggeluh sisada-sisada, la lit anak la lit seninana. Tapi aminna bage pe, latih kal iakapna erdahin dingen la pernah puas pusuhna ngenen ertana. Guna ise kin ia erdahin alu curcur panasna, janah itulakna kerina kesenangen? E pe sia-sia nge, dingen kalak si bage me si nggeluh i bas kiniseran.
9Ulin dua kalak asangken sekalak-sekalak, sabap adi dua kalak erdahin mbelang bekasna.
10Kune sekalak guling banci sekalak nari nampati. Tapi sisada-sisada ngenca, kenca guling ise nari si nampatisa.
11I bas berngi paksa mbergeh dua kalak si rembak medem banci mereken las man si debanna, tapi uga perbahan kalak erbahanca melas badanna adi ia sisada ngenca?
12Dua kalak erdalan banci ia ras-ras ngelawan adi lit si nerang ia, tapi adi sekalak ngenca menukah nalukenca. Tinali si ipiuh telu mesera ngeretapkenca.
13Kalak musil banci jadi raja, janah sekalak tabanen banci nangkih ku das kinirajan. Tapi adi kenca metua raja e la nggit ngaloken nasehat perban motuna, maka la ia ulin asangken sekalak anak perana si musil tapi pentar.
14(Pkh 4:13)
15Rukur aku kerna kerina manusia i bas doni enda, jenari kueteh maka lit nge sekalak anak perana si nggantiken raja pagi.
16Banci jadi maka la terbeligai teremna rayat si iperentah raja, tapi kune ia lanai jadi raja labo lit sekalak pe si ngataken bujur kerna kai si nggo ilakokenna. Emaka kerina nge sia-sia desken nangkap angin.
<< Pengkhotbah 4 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel