Alkitab Mobile SABDA
[VER] : [KARO]     [PL]  [PB] 
 <<  Roma 8 >> 

Nggeluh rikutken aturen Kesah Dibata

1Tapi genduari ukumen lanai perlu idalani kalak si lit i bas persadan ras Kristus Jesus.

2Kesah, si biakna kin mereken kegeluhen man kalak si lit i bas persadan ras Kristus Jesus, nggo mulahi kam i bas biak dosa ras kematen nari.

3Kai si la ngasup Undang-undang erbahanca erdandanken biak kula manusia kote, nggo ibahan Dibata. Nggo iukum Dibata dosa si rurat i bas biak kula manusia alu nuruh AnakNa jine si reh bagi rupa manusia si erdosa guna naluken dosa.

4Si enda ibahan Dibata gelah kita, si lanai nggeluh rikutken sura-sura ukur manusia tapi rikutken Kesah, banci ndalanken perentah si mehuli si lit i bas Undang-undang e.

5Sabap kalak si nggeluh rikutken sura-sura ukur manusia, pusuhna ikuasai sura-sura e. Kalak si nggeluh rikutken sura-sura Kesah, pusuhna ikuasai sura-sura Kesah.

6Adi kalak si pusuhna ikuasai sura-sura ukurna mate kap; tapi adi kalak si pusuhna ikuasai Kesah Dibata nggeluh me ia dingen malem atena.

7Pusuh si ikuasai sura-sura ukur manusia ermusuhen kap ras Dibata; sabap pusuh si bage la ngikutken Undang-undang Dibata, janah la kin ngasup pe ngikutken Undang-undang e.

8Kalak si nggeluh rikutken sura-sura ukur manusia la banci ngena ate Dibata ibahanna.

9Kam labo nggeluh rikutken sura-sura ukur manusia, tapi kam nggeluh rikutken sura-sura Kesah adi tuhu kin Kesah Dibata ringan i bas kam. Kalak si la lit Kesah Kristus i bas ia, la ia sikerajangen Kristus.

10Tapi adi Kristus ringan i bas kam, maka amin arus gia kulandu mate erdandanken dosa, tendindu nggeluh kap erkiteken Dibata nggo ngerembakken kam kempak DiriNa.

11Adi Kesah Dibata si nggo mpekeke Jesus i bas si mate nari ringan i bas kam, maka Dibata si nggo mpekeke Kristus i bas si mate nari e la banci lang mereken geluh si mbaru man kulandu si arus mate e, arah KesahNa si ringan i bas kam e.

12Dage o senina-senina, tuhu rutang kita; tapi labo guna nggeluh rikutken sura-sura ukur manusia.

13Sabap adi nggeluh kam rikutken sura-sura ukur manusia, kempak kematen kap perlawesndu. Tapi adi ibunuhndu perbahanen-perbahanen biak kulandu alu Kesah Dibata, maka nggeluh me kam.

14Kasa kai kalak si itegu-tegu Kesah Dibata, anak-anak Dibata kap.

15Sabap Kesah si ibereken Dibata man bandu labo erbahanca kam jadi budak si mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erdandanken si e banci kita ngerana man Dibata, "O Bapa! O Bapa kami!"

16Kesah Dibata ikut ersaksi ras tendinta ngataken maka kita anak-anak Dibata kap.

17Dage adi kita anak-anak Dibata tentu sialoken nge kai si nggo isikapken Dibata guna anak-AnakNa. Janah kita pe ikut dat bagin i bas kai si nggo isikapken Dibata man Kristus e; sabap adi dat bagin kita i bas KiniseranNa, dat bagin ka me pe kita i bas KemulianNa.

Pengarapen anak-anak Dibata

18Rikutken perkiranku maka kiniseran si inanami kita genduari labo kai kal pe e adi ibandingken ras kemalemen ate si pagin ipetangkas Dibata man banta.

19Kerina si nggo ijadiken Dibata tertima-tima alu ate metedeh ndigan Dibata mpetangkas kemulian anak-anakna.

20Sabap kerina si ijadiken Dibata e nggo lanai erguna, labo erkiteken sura-surana jine, tapi erkiteken bage me sura-sura Dibata. Amin bage gia lit arapen.

21Sabap i bas sada wari pagi ibebasken Dibata me kerina si nggo IjadikenNa e i bas perbudaken si erbahanca ia kernep, gelah ia merdeka janah ngenanami kebebasen dingen kemulian ras kerina anak-anak Dibata.

22Sabap ieteh maka seh paksa si genduari enda kerina si nggo ijadiken Dibata kelsehen ras-ras dingen seh kal akapna suina desken sekalak pernanden si nandangi mupus.

23Janah labo e saja, tapi kita pe si nggo ngaloken Kesah selaku jaminen i bas pemere-pemere Dibata si nandangi IberekenNa man banta, kelsehen nge nimai Dibata ndungi pengangkatenta jadi anak-AnakNa, eme nebusi badanta.

24Sabap alu erpengarapen nge maka kita nggo ikelini; tapi adi nggo iidah kai si iarapken lanai bo e pengarapen. Sabap ise kin ngarapken kai si nggo idahna?

25Tapi adi erpengarapen kita nandangi kai si langa idah, sitimai e alu saber.

26Bage me pe Kesah Dibata reh nampati kita, kita si kote enda. Sabap la sieteh kuga arusna kita ertoto; Kesah eme ertoto kerna kita man Dibata alu kelsehen si la terbelasken.

27Dibata si ngidah pusuh peraten manusia, meteh kai sura-sura Kesah; sabap Kesah e mindo man Dibata guna anak-anak Dibata, janah sue ras peraten Dibata.

28Sieteh maka i bas kai pe Dibata erdahin guna kiniulin man kalak si erkeleng ate man BaNa, eme kalak si nggo ipilih Dibata arah sura-SuraNa.

29Kalak si nggo itandai Dibata arah lebe nai, nggo ItetapkenNa gelah bali ras tempas AnakNa, Jesus Kristus, gelah Anak e jadi sintua i tengah-tengah seninana si nterem.

30Emaka nggo ipilih Dibata kalak si nggo ItetapkenNa e; kalak si nggo IpilihNa e nggo IperembakNa ras DiriNa; janah kalak si nggo IperembakNa ras DiriNa e nggo IpermuliakenNa.

Arah Jesus Kristus teridah keleng ate Dibata man banta

31Adi bage, kuga dage ninta kerna si enda kerina? Adi Dibata temanta, ise kin ngasup ngelawan kita?

32AnakNa kal pe la ItahanNa, tapi IendeskenNa AnakNa e man gunanta kerina. Adi AnakNa kal pe IberekenNa man banta, tentu IberekenNa nge kai pe man banta radu ras AnakNa e.

33Ise kin pang ngaduken kalak si nggo ipilih Dibata? Dibata jine mutuskenca maka ia la ersalah!

34Dage ise banci ngukumsa? Kristus Jesus nge ngenca! Tapi Ia jine nggo mate guna kita, nggo nggeluh mulihi, janah nggo merentah ras Dibata guna kita! Kristus Jesus pagi jadi pembelanta i lebe-lebe Dibata.

35Ise kin ngasup nirangken kita i bas keleng ate Kristus nari? Banci kin kiniseran nirangkenca, ntah kepiceten, penganiayan, kurang pangan tah uis, ancamen, ntah kematen?

36Bagi lit tersurat i bas Pustaka Si Badia, "Erkite-kiteken Kam me maka gedang-gedang wari kami ibunuhi kalak. Bali kami iakapna ras biri-biri si nandangi igeleh."

37Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta.

38Sabap aku nggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin.

39Subuk kai pe si i babo doni tah si i teruh doni, la lit kai pe i bas kerina si nggo ijadiken Dibata si ngasup nirangken kita ras keleng ate Dibata, eme keleng ate si CidahkenNa i bas Kristus Jesus Tuhanta.



 <<  Roma 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel