Malekat ras ukumen si perpudina
1Kenca bage, kuidah ka sada tanda si mbelin dingen si erbahanca ate mamang i langit. Lit pitu malekat mbaba pitu mara e me mara si pendungi, sabap enda me tanda pernembeh ate Dibata si perpudina.
2Jenari lit kuidah tempa-tempa bagi lawit kaca singgur ras api. Kuidah pe kalak si nggo menang ngelawan rubia-rubia ras patungna e, bage pe menang ngelawan kalak si gelarna itandai alu numbur. Kalak si nggo menang enda tedis i tepi lawit kaca e janah njemak kulcapi si nggo ibereken Dibata man bana.
3Iendekenna ende-enden Musa, suruh-suruhen Dibata e, dingen ende-enden Anak Biri-biri nina, "O Tuhan, Dibata si Mada Kuasa, seh kal belinna PerbahanenNdu si erbahanca ate mamang. O Raja kerina bangsa, seh kal adilna ras payona si IdalankenNdu.
4Ise kin si la erkemalangen man BaNdu o Tuhan? Ise kin si la nggit muji GelarNdu? Kam kap ngenca Badia. Reh me kerina bangsa nembah i lebe-LebeNdu, sabap kerina ia nggo ngidah PerbahanenNdu si adil."
5Janah kuidah talang Rumah Pertoton i Surga, janah i bas lit kemah ingan Papan Batu Perpadanen.
6Malekat si pitu si maba ukumen si pitu ndai ndarat i bas Rumah Pertoton e nari. Uisna kain si bersih erkilat-kilat janah sada gendit emas ililetken i bas tentenna.
7Jenari sada i bas mahluk si empat e mereken pitu mangkuk emas man malekat si pitu e, e me mangkuk emas si dem pernembeh ate Dibata, e me Dibata si nggeluh rasa lalap.
8Rumah Pertoton e dem asap kemulian dingen Kuasa Dibata. Ise pe la banci bengket ku bas Rumah Pertoton e adi langa keri mara si pitu si ibaba malekat si pitu e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan