Dua diberu perdosa si ersenina
1Kata TUHAN seh man bangku nina,
2"O manusia si ermasap-masap, sekali jadi lit kap dua diberu si ersenina.
3Tupung singuda-nguda denga ia, sangana ia tading i Mesir, nggo icemarkenna bana ras dilaki, jenari jadi diberu perdenggal ia.
4Sintua gelarna Ohola (ia nggambarken Samaria) janah agina gelarna Oholiba (ia nggambarken Jerusalem). Kuempoi ia duana, janah duana mupus.
5Aminna Ohola nggo jadi ndeharangku, tetap denga ia jadi diberu perdenggal itami-tamina kal dilaki si ngena atena si i Assur nari e.
6Dilaki-dilaki e, eme serdadu-serdadu si erseragam ungu, puanglima-puanglima ras pegawai-pegawai si erpangkat meganjang; kerina ia perwira-perwira tentera si erkuda si mejile rupana.
7Ras perwira-perwira Assur eme Ohola erlua-lua. Janah erkite-kiteken kerincuhenna, iliamina bana alu nembah man berhala-berhala Assur.
8Ia tetap jadi diberu perdenggal bagi si ilakokenna nai i Mesir, i ja icemarkenna dirina ras dilaki mulai i bas paksa singuda-nguda mbaru mbelin denga pe, ia nggo ipedemi ras ibahan kalak bagi diberu perdenggal.
9Erkiteken si e Kuendesken ia man dilaki atena jadi si i Assur nari e.
10Itangtangi kalak ndai uisna seh manjang-anjang, jenari ibunuhna alu pedang. I japa pe diberu-diberu encakapken nasipna si la mehuli e.
11Agina, Oholiba ngidah si enda ndai kerina. Tapi amin bage gia maciken denga ka nge lagu langkahna dingen keleken kerincuhenna erlua-lua asangken Ohola.
12Ia pe jadi atena nandangi puanglima-puanglima ras perwira-perwira tentera kuda Assur, eme anak-perana anak-perana si mejile rupana, si erpaken seragam mejile.
13Kuidah seh kal macikna lagu langkah Oholiba, bali macikna ras lagu langkah kakana.
14Reh dekahna reh macikna lagu langkah Oholiba. Leketkal matana ngidah gambar-gambar si iukir i bas dingding si icet alu rupa megara. Gambar-gambar ndai eme gambar perwira-perwira Babilon si ergenditken gendit si mejile ras topina pe metunggung kal.
15(Yeh 23:14)
16Kenca idahna gambar-gambar e, dem minter pusuhna alu kerincuhen, emaka isuruhna piga-piga persuruhen ku Babilon.
17Reh kalak ndai i Babil nari, medem ia ras Oholiba. Megasgas kal kalak ndai man bana, janah mesangat kal pencemarkenna ia, seh maka kedungenna ciga ate Oholiba man kalak Babil e.
18Kenca bage alu terang-terangen ipetangkasna man jelma si nterem maka ia sekalak diberu si perlua-lua, janah ibahanna kulana jadi dedehen kalak. Erkiteken si e ciga kal ateKu ngenehen ia, bali cigana ateku ngenehen kakana.
19Reh dekahna reh rusurna ia erlua-lua, bali ras si ibahanna nai tupung ia singuda-nguda denga, i ja ia jadi diberu si pendahinna erlua-lua i Mesir.
20Merincuh kal ia medem ras dilaki si bali ras ringki kuda belinna kerincuhenna.
21(O Oholiba, iulihindu kepeken lagu langkahndu si nggesuh sanga kam singuda-nguda denga, i ja dilaki-dilaki bangsa Mesir ngguro-nguroken kam ras encemarken kengudanndu.)"
Dibata ngukum Oholiba
22"Dage o Oholiba, Aku, TUHAN si Erdolat, nehken katangKu man bandu. Genduari nggo leja kam nandangi dilaki-dilaki atendu jadi ndube; tapi Kubahan maka nembeh atena man bandu janah Kubabai gelah ikelewetina kam.
23Kupepulung kerina kalak Babil, Kaldea, Pekod, Soa, Koa ras kerina kalak Assur e. Kubaba man bandu puanglima-puanglima, kalak si erpangkat meganjang, perwira-perwira tentera kuda si nguda denga dingen mejile rupana e.
24Iserangna me kam i utara nari alu tenterana si nterem, alu gereta perang ras gereta perbekalen. Alu make ampang-ampang ras topi waja, ikepungna me kam. Kuendesken kam ku bas tanna, gelah iadilina kam rikutken undang-undangna.
25Erkiteken nembeh ateKu man bandu, Kupelepas ia ngelakoken perbahanen si kejam man bandu. Ikeretna igungndu, cupingndu, janah anak-anakndu ibunuhna. Anakndu dilaki ras diberu isarenkenna i bas kam nari, kenca bage itutungna geluh-geluhen.
26Uisndu isintapkenna seh kam manjang-anjang, jenari ibuatna permatandu.
27Alu bage Kupengadi me kerincuhenndu erlua-lua ras lagu langkahndu si nggesuh si nggo ilakokenndu mulai kin paksa kam i Mesir denga pe mbarenda. Lanai bo pagi diatendu ngenehen berhala-berhala, lanai kam teringet pe kerna Mesir."
28Bagenda nina TUHAN si Erdolat, "Kuendesken me kam kempak kalak si ciga dingen nembeh atendu.
29Janah erkiteken nembeh atena man bandu, iangkatna me kerina barang-barang si nggo latih akapndu encarikenca, tapi itadingkenna kam manjang-anjang desken sekalak diberu perlua-lua, maka mela akapndu. Kerincuhenndu si macik dingen pendahinndu erlua-lua e nge
30maka jadi si enda man bandu. Kam jadi diberu perlua-lua man kerina bangsa-bangsa janah iliamindu dirindu alu berhala-berhalana.
31Iusih-usihndu lagu langkah kakandu, janah erkiteken si e ukumenndu pe bali Kubahan."
32Nina TUHAN si Erdolat tole, "Kam arus minem tare cangkir kakandu, cangkir si mbages dingen galang. Isina dem alu kata penguru-nguru ras isak-isak, si arus ialokenndu i bas kerina kalak nari.
33Cangkir kakandu Samaria, isina kebiaren ras kecedan. Kenca iinemndu isina seh keri, melimber akapndu janah mabuk kam. Janah alu pecah-pecah cangkir e, ilukaindu tentendu." Bagenda me nina TUHAN si Erdolat.
34(Yeh 23:33)
35Nina TUHAN si Erdolat, "Erkiteken ilupakenndu janah itundalkenndu Aku, la banci la kam ngenanami kiniseran erkiteken kerincuhenndu si macik dingen pendahinndu erlua-lua."
Ukumen Dibata man duana diberu si ersenina e
36Nina TUHAN bangku, "O manusia si ermasap-masap, nggo kin kam sikap ngadili Ohola ras Oholiba? Turikenlah man bana kerna perbahanenna si nggesuh.
37Erlua-lua dingen munuh ia; erlua-lua ia ras berhala-berhala janah ibunuhna anak-anakku si ipupusna.
38Tapi labo terjeng e saja. Iliamina ka pe Rumah PertotonKu janah la iperdiatekenna Sabat si nggo Kutetapken.
39I bas wari ia munuh anak-anakku jadi persembahen man berhala-berhala, i bas wari e ka nge ia reh ku Rumah PertotonKu ngeliamisa.
40La erngadi-ngadi isuruhna kalak ngundang dilaki-dilaki i bas ingan si ndauh nari, emaka reh dilaki e ndahi ia. Emaka ridi ia duana, ipejile-jilena bana janahna make perhiasen-perhiasen si meherga.
41Kenca bage kundul ia i das ingan medem si mejile. I lebe-lebena lit meja si dem alu pangan-pangan si ntabeh, bage pe kumenen ras minak saitun si Kubereken man bana.
42Jenari terbegi me sora kalak ersurak ersenang-senang rassa. Kalak ndai iundang i gurun pasir nari. Itamakenna gelang i bas tan diberu e duana, bage pe mahkota si mejile i bas takalna.
43Ningku i bas ukurKu, 'Uga maka nggit denga kalak enda medem ras diberu si nggo melus perbahan erlua-lua rusur dahinna?'
44Pegancih-gancih idahina Ohola ras Oholiba, diberu perlua-lua si nggesuh e.
45Kalak bujur tentu ngukum diberu e duana erdandanken erlua-lua dingen munuh, sabap diberu e duana tuhu kin perlua-lua ras pemunuh."
46Erkiteken si enda me maka ikataken TUHAN si Erdolat, "Dilolah nterem jelma pebiar-biar ras ngerampok diberu e.
47Suruh jelma si nterem e menterisa alu batu ras nakilsa alu pedang, janah munuhi anak-anakna, ras enciluk rumahna.
48I belang-belang negeri e kusasapken kerina perbahanen si nggesuh e, gelah jadi sada pertenget man kerina diberu-diberu maka ula erlua-lua bagi diberu si dua e.
49Janah kam o Ohola ras Oholiba, Kuukum me kam erdandanken perlangkahndu si macik e bage pe erdandanken dosandu nembah man berhala-berhala. Jenari ietehndu me maka Aku kap TUHAN si Erdolat."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel