Pendilo gelah jera
1Nina TUHAN, "O kalak Israel, adi atendu jera, banci kam reh mulihken ndahi Aku. Adi iambengkenndu gana-gana si ciga ateKu dingen patuh man bangKu,
2emaka banci kam ersumpah i bas gelarKu. Emaka kerina bangsa-bangsa mindo pasu-pasu man bangKu, jenari ipujina Aku."
3Nina TUHAN kempak kalak Juda ras kalak Jerusalem, "Tenggalai jumandu si langa i tenggalai; ula kam nuan i tengah rambah duri.
4Cikep perpadanenndu ras Aku TUHAN, o kalak Juda ras Jerusalem, jenari endesken dirindu man bangKu. Adi la bage, gurlah me pernembehKu erkiteken perbahanenndu si jahat, janah la lit sekalak pe si ngasup nimpetisa."
Juda nandangi iserang
5Embuslah terompet i belang-belang negeri enda, erlebuh alu megerning asa gangna. Turiken man kalak Jerusalem ras Juda, maka kiam ia ku kota-kota si lit bentengna.
6Dalani ku Sion kiamken ula pelawen-lawen, gelah kam terkelin. Reh me cilaka i Utara nari ibaba TUHAN cilaka si maba kecedan si mbelin.
7Desken singa si luar i bas inganna cebuni nari, si encedai bangsa-bangsa nggo reh. Reh me ia ngkernepken Juda, maka kerina kota Juda runtuh, lanai lit sekalak pe i je si enggeluh.
8Emaka pakelah uis guni, jenari tangis ngandunglah, erkiteken pernembeh ate TUHAN si gurlah, lalap la nimpet nandangi Juda.
9Nina TUHAN, "I bas wari e pagi kerina raja-raja ras pegawai-pegawai bene kal ukurna, imam-imam tumpat ukurna, nabi-nabi kemamangen."
10Emaka ningku, "O TUHAN si Mada Kuasa, IpertakikenNdu kal kap kalak Jerusalem enda! Nindu maka dame nge i je, tapi pedang nge i bas kerahungna."
11Seh me paksana ikataken man kalak Jerusalem maka angin melas nggo rembus i gurun pasir nari. Angin e labo angin si lumang-lumang, si erguna ngangini page,
12tapi angin si ersiu-siu si rehna i bas TUHAN nari. TUHAN jine kap si ndabuhken ukumen man BangsaNa.
Musuh ngepung Juda
13Nehenlah, ena me reh musuh desken embun. Gereta perangna bali ras angin kalinsungsung. Kudana teren asangken rajawali. Bene me kita! Cilaka kal kita!
14O Jerusalem, bersihken min pusuhndu i bas si jahat nari, gelah kam terkelin. Asa kai nari dekahna kam muniken sura-sura si jahat?
15Dengkehkenlah berita si ibaba anak kuta Dan ras deleng-deleng Eperaim. Ia reh maba berita kebiaren.
16Ia reh mereken kata persirangen man Jerusalem maka musuh nggo reh i bas ingan si ndauh nari. Musuh-musuh e erlebuh i bas kota-kota Juda,
17jenari ikepungna Jerusalem desken kalak si ngiani juma, erkiteken pendudukna nggo ngelawan TUHAN. TUHAN kap si ngerana.
18O Juda, si enda kerina jadi bandu erkiteken lagu langkah dingen perbahanenndu jine. Bene me kam dingen pagit akapndu seh ku bas pusuhndu.
Ceda ate Jeremia erkiteken bangsana
19Mesui! Lanai tertahan suina! Pusuhku! Pusuhku debet-debet la teralang. Lanai tersinikken nari; kubegi sora terompet, sora surak-surak peperangen.
20Cilaka reh si ayak-ayaken; kerina negeri nggo radas. Kerina kemah kelayap i bas sengkumirep saja; kire-kire meribak mecaing-caing.
21Asa kai nari dekahna kuidah panji perang? Asa kai nari dekahna kubegi sora terompet?
22Nina TUHAN, "BangsangKu seh kal kap motuna; Aku la itandaina. Bagi danak-danak si bodoh la lit pengertinna. Ngelakoken kejahaten pentar ia, tapi erbahan si mehuli la itehna."
Pengenehenen Jeremia kerna cilaka si nandangi reh
23Kutatap doni enda kerina nggo rontang; dingen terulang. Kutare ku langit lanai lit i je terang.
24Kupernehen kempak deleng-deleng, mugur-ugur kerina, kutatap ku uruk-uruk, mundu-undu kap ia.
25Kutatap lanai lit kuidah manusia i je, Perik-perik pe nggo kabangen kerina.
26Taneh mehumur nggo jadi gurun pasir; kota-kotana nggo meruntuhen, erkiteken pernembeh ate TUHAN si gara.
27(Nggo ikataken TUHAN maka kerina doni enda jadi taneh mesawang tapi la keri kal iradasken.)
28Doni enda dem ate ceda, langit jadi gelap. TUHAN si nggo ngerana, janah la erkusur UkurNa. Nggo ItetapkenNa UkurNa, janah ndigan pe lanai Ia nggit surut.
29Erkiteken sora kalak pemanah ras si ngersak kuda, kerina kalak kiam. Lit si kiam ku kerangen, lit deba nangkih ku das batu galang. Kerina kota lume itadingken, lanai lit kalak si tading i je.
30O Jerusalem, nggo cilaka me kam. Ngkai maka ipakendu uis megara? Ngkai maka ipakendu permata janah icelakndu matandu? Ipetikndu bandu guna si sea-sea; si ngena atendu nggo nulak kam, jenari ibunuhna atena kam.
31Kubegi sora nderkuh bali ras sora diberu sanga mupus. Randih-andih bagi diberu tangtangna mupus, sora tangis Jerusalem mengkap-engkap; idudurkenna tanna jenari nina, "Nggo aku cilaka. Reh me ia munuh aku."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel