Moap ikernepken
1Enda me kata TUHAN si Mada Kuasa, Dibata nu Israel kerna Moap, "O andiko kalak Nebo, nggo kernep kal kotandu. Kiryataim nggo talu, benteng-bentengna si enteguh nggo meruntuh, juru kal iakap kalak si ringan i je.
2Kemulian Moap nggo bene, Hesbon nggo italuken musuh, erpekat kalak engkernepken Moap, Kota Madmen nggo melungun nggo reh tentera nalukenca.
3Dengkehkenlah! Nderkuh kalak Horonaim. Nggo kernep! Nggo meripuk!
4Moap nggo kernep, dengkehken perserko danak-danak.
5Begiken danak-danak kesi-kesi; gedang-gedang dalan ku Luhit: sora tangis kalak si itindih, gedang-gedang dalan ngincuah ku Horonaim.
6Nina kalak enda, 'Kiamken, kelini, kelini kesahndu! Kiamken bagi kelede kerangen si meliar!'
7O, Moap ernalem kam kempak gegeh dingen kebayakenndu, tapi genduari irebut me kam. Dewandu Kemos iangkut me ku pembuangen, ikut ras pengulu-pengulu ras imam-imamna.
8La lit sada kuta pe pulah, kerina iradasken subuk berneh-berneh entah taneh kendit. Aku TUHAN kap si nggo melasken ranan enda.
9Pajekken sada batu kubur man Moap, nandangi ikernepken me ia. Kota-kotana jadi batu si ergun-gun, lanai ise pe si tading i je."
10(Cilakalah kalak si ndahiken dahin TUHAN alu ukur la si tutus. Cilakalah kalak si la nampul dingen munuh!)
Kota-kota Moap ikernepken
11Nina TUHAN, "Moap nai-nai nari tetap aman, la pernah iangkut tertaban. Moap desken lau anggur si teneng kap, la pernah iuseken ku guci si deban emaka la sambar-sambar bauna, nanamna pe tetap gelgel.
12Emaka genduari nggo seh paksana Aku nuruh kalak nguseken Moap desken anggur. Ipelumena me guci anggur e, jenari idampeskenna maka meripuk.
13Emaka erkadiola Moap kempak dewana Kemos, bali ras tupung Israel erkadiola kempak Betel dewa penalemenna.
14O kalak Moap, ngkai maka ikatakenndu kam pahlawan-pahlawan tentera si mbisa pang iuji i bas perang?
15Moap ras kota-kotana nggo kernep, anak peranna si terpilih nggo igelehi. Aku kap Raja, TUHAN si Mada Kuasa, Aku kap si nggo melasken ranan enda.
16Cilaka man Moap nandangi reh me, keruntuhenna nggo ndeher.
17O kam kalak si ndeher rassa, tangislah Moap, o kam kerina si meteh kinibelinen gelarna. Katakenlah: Kuasana nggo meripuk, kemulian dingen gegehna lanai lit.
18O kam kalak si tading i Dibon, nusurlah i bas inganndu si mehamat nari, kundulkenlah i bas abu taneh. Si engkernepken Moap nggo ndeher, benteng-bentengna jadi meruntuh.
19O kam si tading i Arur tedislah kam nimai i tepi dalan sungkuni kalak si kiam sungkuni ia kerna kai si nggo jadi.
20Bagenda me jabapna, 'Moap nggo guling, tangisilah nggo mela kal iakapna. Momokenlah i gedang-gedang Lau Arnon, maka Moap nggo kernep!'
21Pengukumen nggo reh man kota-kota si lit i taneh kendit i deleng-deleng eme: Holon, Jahas, Mepat,
22Dibon, Nebo, Bet-Diblataim,
23Kiryataim, Betgamul, Betmeon,
24Keriot ras Besrah. Ukumen nggo reh ku kerina kota-kota Moap, subuk ndeher entah ndauh.
25Kuasa Moap nggo pecah, gegehna nggo bene. Aku TUHAN kap si nggo melasken ranan enda."
Moap ipeteruk
26Nina TUHAN, "Bahan maka mabuk Moap, erkiteken ia ngelawan Aku. Erguling-guling ia i bas utahna jine. Tawa kalak ngenehenca.
27O Moap ingetndu kang, uga kam nai nguru-nguru kalak Israel? Ngupir kam ngenenca tempa-tempa ia nggo itangkap gerombolan penamun.
28O kam kalak si tading i Moap, tadingkenlah kutandu! Laweslah dingen tadinglah i bas lingling batu. Jadilah bali ras nderapati si rasar i bas embang.
29Lanai kap tanggung megombangna Moap. Nggo Kubegi uga megombangna ia, sombong, beluh iakapna bana, seh kal iakapna ganjangna bana.
30Aku TUHAN, Kueteh kap uga ia gombangna. Rananna meganjang la erguna janah pengelakona la erpepah.
31Emaka ngandung Aku erkiteken kerina kalak Moap, ras kerina kalak si tading i Kir Heres.
32Serko Aku guna Sibma lebihen asangken perserkongKu man kalak Jaser. O kota Sibma, kam bali kap ras batang anggur si dahan-dahanna njoler ngepar Lawit Mati seh kempak Jaser. Tapi genduari nggo kernep kal kerina buahndu tupung paksa perlego.
33Kemalemen ate ras keriahen nggo ibuat negeri Moap si mehumur nari. Aku si erbahanca maka lau anggur lanai maler i bas pengeriken nari. Lanai lit kalak si ngerik anggur janah ersurak perban riahna.
34O kalak Hesbon ras Eleale, serkoken. Perserkona terbegi seh ku Jahas. Kalak si i Soar pe megisa, terus kempak Horonaim ras Eglat-Selisia. Lau anak Nimrim pe nggo kerah.
35Lanai Kubere kalak Moap mereken persembahen gelehen i bas ingan-inganna ersembah. Lanai ia Kubere nggeleh persembahen man gana-ganana. Aku TUHAN kap si nggo melasken ranan enda.
36Emaka ceda ateKu ngenen kalak Moap, ras man kalak Kir Heres, bali ras gogona ate kalak si erbahan lagu tangis-tangis alu ngembus surdam. Sabap kebayakenna nggo lesap kal kerina.
37Kerina ia nggo itakal tabuken, janggutna nggo icukurna. Kerina ia nggo nggarusi tanna, dingen tep-tep kalak nggo make uis guni tanda ate ceda.
38Kerina ingan ngada-ngada i datas rumah kalak Moap, kerina tanah lapang ingan jelma si nterem la lit kalak la rate ceda. Sabap nggo Kudampesken Moap bali ras guci si lanai ipake kalak.
39Moap nggo getem! Tangisken! Nggo bene kemulian Moap. Nggo meruntuh ia, kerina bangsa sekelewetna nguru-nguru ia. Aku TUHAN kap si nggo melasken ranan enda."
Lanai lit dalan pulah man Moap
40TUHAN erpadan sada bangsa nangkis Moap desken rajawali engkimbangken kabengna.
41Kerina kota ras benteng-bentengna italuken. I bas paksa e, tentera Moap gentar bali ras sekalak pernanden mupus.
42Ikernepken me Moap janah lanai ia jadi sada bangsa sabap brontak ia ngelawan aku.
43Kebiaren, lubang, siding itogeng man kalak Moap. TUHAN kap si ngerana enda.
44Kalak si kiam atena i bas kebiaren nari, ndabuh ia ku lubang. Kalak si atena ngelompati lubang kena siding ia. Sabap TUHAN nggo netapken sada paksa guna ngukum Moap.
45Pengongsi-pengongsi si lanai ergegeh icubakenna ndatken pengkawali i kota Hesbon, kota si pernah iperentah Raja Sihon, tapi kota e nggo meseng. Api nggo engkernepken perdempaken ras takal kalak Moap si pet erperang e.
46Mekuah kal ate ngenen Moap. Kalak si nembah man Kemos nggo kernep. Anakna si dilaki ras diberu nggo iangkut tertaban.
47Tapi i bas wari-wari si reh ibahan TUHAN ka nge maka Moap makmur ka mulihi. Enda me kerina si ikataken TUHAN kerna Moap.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel