Jeremia erkhotbah i bas Rumah Pertoton
1TUHAN nuruh aku ku pintu gerbang Rumah Pertoton; arah eme bangsa Juda bengket ersembah. IkatakenNa man bangku maka tedis aku i je meritaken man bangsa e kai si ikataken TUHAN si Mada Kuasa, Dibata Israel man bana nina, "Ubahlah lagu langkah ras perbahanenndu, emaka Kupediat kam terus ringan i jenda.
2(Yer 7:1)
3(Yer 7:1)
4Ulanai itekindu ranan penipu si ngatakenca, 'Terkelin kap kita! Enda kap Rumah Pertoton TUHAN, enda kap Rumah Pertoton, enda kap Rumah Pertoton TUHAN!'
5Ubahlah lagu langkahndu, ulanai perusur-usur perbahanenndu. Bahanlah si bujur sapih-sapih kam,
6ulanai idehkenndu kalak asing, anak-anak melumang ras diberu balu-balu. Ulanai iamburkenndu dareh kalak si la ersalah i bas negeri enda. Ulanai kam nembah man dibata-dibata si deban si erbahanca kam ceda.
7Adi kam robah, Kubere kam terus ringan i jenda, i bas negeri si nggo Kubereken jadi sikerajangen nini-ninindu rasa lalap seh rasa lalap.
8Nehenlah! Pengarapenndu itamakenndu man ranan si la tuhu.
9Kam nangko, munuh, erlua-lua, melasken sumpah si la tuhu, nutung persembahen man Baal, nembah man dibata si la itandaindu.
10Ilakokenndu kerina si ciga ateKu e, kenca bage reh kam dingen tedis i adep-adepenKu, i bas Rumah PertotonKu, jenari nindu, 'Terkelin kap kita!'
11Iakapndu kin maka RumahKu e ingan penamun? Nggo Kuidah kerina kai si ibahanndu.
12Laweslah ku Silo, ingan si pemena Kupilih man inganKu isembah. Nehenlah kai si Kubahan man ingan e erkiteken dosa-dosa bangsangKu Israel.
13Nggo ilakokenndu kerina dosa si enda, aminna pe nggo Kuulih-ulihi ngerana man bandu, tapi la kam nggit megikenca. Adi Kulebuh kam la kam ngaloi.
14Emaka kai si nggo Kubahan kempak Silo, Kubahan ka me kempak Rumah PertotonKu, penalemenndu e. I jenda i bas ingan si nggo Kubereken man nini-ninindu ras man bandu seri perbahanenKu bagi si Kubahan man Silo.
15Kupelawes kam i adep-adepenKu nari, bali ras pemelawesKu sima-simandu Israel. Aku kap TUHAN si nggo ngerana man bandu."
Israel la patuh
16Nina TUHAN, "O Jeremia, ula ertoto guna bangsa enda. Ula kam erlebuh entah ertoto guna ia, ula sekseki Aku, sabap labo kam Kubegiken.
17La kin idahndu kai si ibahanna i bas kota-kota Juda ras i gedang-gedang dalan Jerusalem?
18Anak-anak pepulung ranting, dilaki-dilaki pegara api, diberu-diberu erbahan cimpa guna ipersembahken man dibata-dibata si igelarina Kemberahen Langit. Ipirpirkenna pe lau anggur kempak dibata si deban, gelah arah e mesui ateKu ibahanna.
19Tapi ateKu kin mesui? Lang! Bana jine nge ijurukenna dingen ia nge si erbahanca akapna mela.
20Dage Aku TUHAN si Erdolat Kukuseken me pernembeh ateKu si gara ku Rumah Pertoton e. Kukuseken e ku babo manusia ras ku asuh-asuhenna, ku batang-batang kayu, ras ku ulih jumana. NembehKu bali ras api si gurlah si la ise pe ngasup nimpetisa.
21O bangsangKu, deba persembahenndu itutungndu i babo batar-batar, deba banci ipan kam. Tapi Aku TUHAN ngatakenca maka labo lit lainna bicara kerina geu ipanndu.
22Tupung nini-ninindu ndarat i Mesir nari labo perentah-perentah kerna persembahen tutungen si Kubereken entah aturen-aturen kerna persembahen si deban.
23Tapi perentah si Kubereken eme maka patuh man bangKu, gelah Aku jadi Dibatana dingen ia jadi bangsangKu. Kukataken man bana maka ia nggeluh rikutken si nggo Kuperentahken, alu bage si mehuli jadi man bana.
24Tapi la ia patuh, la diatena pe. Alu merawa ilakokenna rikutken ate-atena, dingen sura-surana si jahat nge iikutkenna. Lagu langkahna reh jahatna, labo reh ulina.
25Menaken kin tupung nini-ninindu ndarat i Mesir nari seh ngayak paksa enda la erngadi-ngadi. Kusuruh persuruhenKu nabi-nabi ku tengah-tengahndu.
26Tapi ise pe la lit si erdiate. Ise pe la lit megikenca. Tapi reh kam ngelawan lebihen asa nini-ninindu nai.
27Emaka, o Jeremia, kam me melasken kerina ranan enda man bangsangKu, tapi labo kam idengkehkenna. Ilebuh kam ia tapi labo kam diatena pe.
28Turikenlah man bana maka bangsana la ngikutken Aku TUHAN Dibatana; la ia erlajar arah ukumen si ialokenna. Kesetian lanai lit i bas ia. Si e kerina lanai sitik pe icakapken."
Dosa si ilakoken i Baluren Hinnom
29"Erceda atelah, o kalak Jerusalem; pangkaslah bukndu, ambekkenlah. Endekenlah ende-enden ate ceda i datas ancuk-ancuk deleng, erkiteken Aku TUHAN sangana keke rawangKu, nggo Kutulak bangsangKu.
30Kalak Juda nggo ngelakoken si jahat. Iamparkenna gana-ganana si ciga ateKu i bas Rumah Pertoton, nggo iliamina e.
31I Baluren Hinnom ipajekkenna batar-batar si ibahanna gelarna Topet, gelah banci ipersembahkenna anakna si diberu ras si dilaki i datas api si gara. La lit perentahKu man bana lako erbahan bage -- labo lit sitik pe e i bas ukurKu.
32Janah seh me paksana ingan e lanai igelari Topet entah Baluren Hinnom, tapi Baluren Penggelehen, sabap i je ikuburina jelma erkiteken lanai lit ingan si deban ingan ngkuburkenca.
33Bangke-bangke e ipangani perik-perik dingen rubia-rubia si meliar janah ise pe la lit si nggurbasa.
34Negeri e jadi taneh mesawang. I kota-kota Juda dingen i dalan-dalan i Jerusalem lanai Kubahan lit i je sora surak-surak dingen sora keriahen. Lanai lit i je sora pesta erdemu bayu si meriah.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel