Alkitab Mobile SABDA
[VER] : [KARO]     [PL]  [PB] 
 <<  Yesaya 9 >> 

1Tapi negeri e labo lalap i bas kepiceten.

Raja si reh pagin

Daerah si iani suku Sebulon ras Naptali, nai igombang-gombangi; tapi denggo ipehaga, mulai i Lawit Tengah nari ku kenjulu, ku daerah si lit arah lepar Lau Jordan, ingan bangsa-bangsa si deban.

2Bangsa si nggeluh i bas kegelapen nggo ngidah sinalsal si erkinar. Kalak si ringan i bas awih-awih kematen nggo isalsali terang si harhar.

3Nggo IberekenNdu keriahen si mbelin, o TUHAN, malem atena IbahanNdu. Meriah ukurna ngidah PerbahanenNdu, bali ras kalak si ermeriah ukur tupung paksa peranin, tah pe asum mbagi-mbagiken barang rampasen.

4Sabap nggo IambekkenNdu babanna si mberat, nggo IpenggelkenNdu lanja-lanja si erbanca mesui barana. Bangsa e nggo ItalukenNdu, bangsa si alu kejam nindas BangsaNdu, nggo ItalukenNdu ia bagi tentera Midian nai.

5Sepatu tentera si reh nerang BangsaNdu, bage pe uisna si megara erkiteken dareh, isuluh keri ipan api.

6Sekalak anak nggo tubuh man banta, anak dilaki ibereken banta. Ia me pagi jadi peminpinta. Ia igelari: "Penampat si meganjangna". "Dibata si Mada Kuasa". "Bapa si Rasa Lalap". "Raja Dame".

7Kuasana tetap reh belangna; janah kerajanna lalap lit i bas dame. Ia jadi gancih Raja Daud. Ia merentah erpalasken kebenaren ras kebujuren, genduari nari seh rasa lalap. Si enda kerina jadi sabap bage kap sura-sura TUHAN si Mada Kuasa.

Israel iukum TUHAN pagi

8Ukumen nggo idabuhken Tuhan man kerajan Israel, man kerina kesusuren Jakup.

9Kerina kalak Israel, kerina kalak si ringan i kota Samaria, metehsa maka Tuhan me si mereken ukumen e. Genduari alu megombang ras meganjang ukur nina,

10"Rumah gedung batu bata nai nggo runtuh tapi isambari kami pagi alu gedung batu. Balok-balok kayu meranti nggo itabah, tapi isambari kami alu kayu si deban si ndauh ulin asa si e."

11TUHAN nggo nuruh musuh ngelawan bangsa Israel.

12Nggo nganga babah Siria arah Timur bage pe Pilisti arah Barat lako nelen Israel. Amin bage gia pernembeh ate TUHAN langa ngadi; IawatkenNa denga TanNa lako ngukum bangsa e.

13Bangsa Israel langa jera; aminna pe TUHAN si Mada Kuasa nggo ngukum ia, tapi lalap ia langa mulih kempak TUHAN.

14Erkiteken si e i bas sada wari saja iukum TUHAN kerina peminpin-peminpin Israel ras rayatna. Ikeret TUHAN takalna ras ikurna.

15Takalna eme kap tua-tua ras kalak si mehaga, janah ikurna eme kap nabi-nabi si mereken pengajaren si papak.

16Peminpin-peminpin bangsa enda ngguluti kap perasatna, ibabaina rayatna papak.

17Erkiteken si e la ibere Tuhan sada pe anak perana pulah, janah diberu balu-balu ras anak melumang la AteNa mekuah, perban kerina lanai mbiar man Dibata, lagu langkahna la mehuli, nggo jahat kerina si ibelaskenna. Tapi amin bage pe, pernembeh ate TUHAN langa ngadi, IawatkenNa denga TanNa lako ngukum bangsa e.

18Kejahaten bangsa e desken api gara si ngeradasken rambah ras peren erduri. Apina gurlah desken api kerangen meseng, janah cimberna erdipul ku das.

19Erkiteken bage nembehna ate TUHAN si Mada Kuasa, ukumen si IbahanNa gurlah desken api i belang-belang negeri e, janah si jadi rantingna eme bangsa e jine. La lit sada pe si erkuah ate man seninana.

20I belang-belang negeri e, kasa kai jumpa barang-barang si terpan minter ijerngemna jenari ipanna; tapi bage gia lalap nge melihe akapna. Erkiteken si e anakna jine pe ipanna!

21Kalak Manase ras kalak Eperaim si perang-perangen sapih-sapih ia jenari ras-ras ia nerang Juda. Tapi amin bage pe pernembeh ate TUHAN langa ngadi; IawatkenNa denga TanNa lako ngukum bangsa e.



 <<  Yesaya 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel