1(
Sekalak diberu terdat erlua-lua
Kenca bage mulih jelma si nterem e ku rumahna sekalak-sekalak, tapi Jesus lawes ku Uruk Seton.
2Pepagina mulihken Jesus ku Rumah Pertoton. Kalak si nterem pe reh ka ndahi Ia. Kundul Jesus jenari IbenakenNa ngajar.
3Paksa Ia ngajar e reh guru-guru Undang-undang ras kalak Parisi. Ibabana sekalak diberu si itangkapna asum diberu e erlua-lua. Isuruhna diberu e tedis i lebe-lebe jelma si nterem e.
4Jenari nina man Jesus, "Diberu enda itangkap kami asum ia erlua-lua.
5I bas Undang-undangta isuruh Musa maka diberu si bagenda arus ibenteri alu batu seh mate. Tapi kam, kuga nindu?"
6Kalak enda nungkun guna ncubai Jesus; atena gelah lit dalan ngaduken Jesus. Tapi mungkuk Jesus, IsuratiNa taneh alu jari-JariNa.
7Lalap igegehi kalak ndai nungkun. Perbahan si e jurgak Jesus, jenari nina, "Apai kam si langa pernah erdosa, ialah lebe mentersa."
8Kenca bage mungkuk ka Jesus, IsuratiNa ka taneh.
9Megi jabap Jesus enda lawesen kalak ndai sekalak-kalak, mulai i bas si metuana nari, seh maka Jesus nari ngenca i je ras diberu ndai.
10Jurgak Jesus jenari nina man diberu e, "I ja kalak ndai kerina o bibi? La kin lit sekalak pe ngukum kam?"
11Erjabap diberu e, "Sekalak pe lang, Tuan!" Nina Jesus man bana, "Adi bage, Aku pe la kam Kuukum. Mulihlah olanai bahan si la ngena ate Dibata.")
Jesus me kap terang doni
12Ngerana ka Jesus man kalak si nterem e nina, "Aku kap terang doni. Ise ngikutken Aku, ialokenna me terang si mereken kegeluhen, janah lanai ia erdalan i bas gelap."
13Ngaloi kalak Parisi man Jesus, "Kam ngerana kerna DiriNdu jine, emaka labo tuhu KesaksinNdu e."
14Ngaloi Jesus, "Aminna gia kerna diringKu Aku ngerana, tuhu nge si Kukataken enda, sabap Kueteh nge i ja nari Aku janah ku ja Aku lawes. Tapi kam la ietehndu i ja nari Aku janah ku ja Aku lawes.
15Isalahindu kalak rikutken pengakap manusia; tapi Aku la ise pe Kusalahken.
16Bicara Kuadili pe kalak, bujur nge keputusenKu e. Sabap i bas si e labo Aku sisada; Bapa si nuruh Aku ras Aku kap.
17I bas Undang-undangndu lit kap tersurat maka adi lit dua kalak seri katana, tuhu me si ikatakenna e.
18Bage me Aku ngerana kerna diringKu janah Bapa si nuruh Aku pe ngerana kerna Aku."
19Nungkun kalak ndai, "I ja kin BapaNdu?" Erjabap Jesus, "Labo itandaindu Aku, janah BapangKu e pe labo itandaindu. Adi itandaindu Aku, BapangKu e pe itandaindu nge."
20Kerina si enda ikataken Jesus asum Ia ngajar denga i bas Rumah Pertoton deherken peti ingan nusun persembahen. Tapi labo ise pe nangkap Ia sabap paksana langa seh.
Jesus labo reh i doni nari
21Tole nina Jesus man kalak ndai, "Aku lawes me; idaramindu pagi Aku, tapi mate me kam i bas dosandu. Kam labo banci lawes ku inganKu e."
22Emaka sisungkun-sungkunen kalak Jahudi si erkuasa nina, "Munuh BaNa nge AteNa, maka nina, 'Kam labo banci lawes ku inganKu e?'"
23Nina Jesus, "Kam asalndu i jenda, i teruh enda; tapi Aku reh i datas nari. Kam reh i doni enda nari; tapi Aku labo i doni enda nari.
24Perbahan si e Kukataken man bandu maka mate me kam i bas dosa-dosandu. Tuhu mate me kam i bas dosa-dosandu adi la kin kam tek maka 'Aku me Aku.'"
25Jenari nungkun kalak e, "Ise kin Kam?" Erjabap Ia, "Kai kin si nggo Kukataken man bandu tangtangna nari!
26Melala si arus Kukataken kerna kam janah melala pe si arus Kuadili. Ingetlah! Si nuruh Aku e Dibata si tuhu-tuhu kap janah si Kukataken man doni enda, e me si Kubegi i bas Ia nari."
27La iangka kalak emaka Jesus ngerana kerna Bapa.
28Emaka nina Jesus, "Kenca ipeganjangkenndu Anak Manusia persuruhen Dibata e, ietehndu me maka, 'Aku me Aku.' Alu bage maka nggo iangkandu maka kerina si kukataken e labo sada pe Kubahan bagi ate-ateKu, tapi kai si iajarken Bapa man bangKu, e me si Kukataken.
29Si nuruh Aku ras Aku kap. Labo ItadingkenNa Aku sisada sabap tetap nge Kudalanken si ngena AteNa."
30Asum Jesus ngerana kerna si enda nterem kalak tek man BaNa.
Jesus labo i doni enda nari
31Jenari ngerana Jesus man kalak Jahudi si nggo tek man BaNa e nina, "Adi tetap atendu tutus ngikutken si nggo Kuajarken, tuhu-tuhu me kam ajar-ajarKu.
32Itandaindu me Dibata si tuhu-tuhu, janah Ia jine si mbebasken kam."
33Nina kalak ndai, "Kami kesusuren Abraham kap. Langa pernah kami jadi budak kalak. Kuga maka nindu, 'Bebas me kam?'"
34Ngaloi Jesus, "Kukataken man bandu: Ise erbahan si la ngena ate Dibata, ia nggo jadi budak dosa.
35Sekalak budak labo lalap jadi anggota keluarga, tapi sekalak anak tetap kap jadi anggota keluarga.
36Adi Anak e mbebasken kam maka tuhu-tuhu me kam nggo bebas.
37Kueteh nge kam kesusuren Abraham. Amin bage gia kerina kam ersura-sura munuh Aku, sabap la ialokenndu kai si Kuajarken.
38Aku ngerana rikutken kai si ikataken BapangKu man bangKu. Tapi kam, ibahanndu kai si ikataken bapandu."
39Ngaloi kalak ndai, "Bapa kami Abraham kap." Nina Jesus, "Adi tuhu-tuhu kin kam anak Abraham bali nge perbahanenndu ras Abraham nai.
40Kerina si nggo pernah Kubahan e me mpetangkas man bandu kebenaren si Kualoken i bas Dibata nari. Amin bage gia ibunuhndu ka nge atendu Aku. Si Abraham nai labo bage perbahanenna!
41Kam, perbahanen bapandu nge iusih-usihndu." Ngaloi kalak ndai, "Sada ngenca Bapa kami, e me Dibata. Janah kami me AnakNa si tuhu-tuhu."
42Nina Jesus, "Adi tuhu-tuhu kin Dibata Bapandu, tentu keleng atendu Aku, sabap Aku reh i bas Dibata nari janah genduari Aku ringan i jenda. Aku reh labo erdandanken kuasangKu, tapi Ia nge si nuruh Aku.
43Ngkai maka la iangkandu si Kukataken e? E me erdandanken la kam ngasup ngaloken katangKu.
44Bapandu si Iblis nge janah tuhu-tuhu kam anakna. Sura-sura si Iblis e nge si ikutkenndu. Nai nari Iblis pemunuh kap. La pernah ikapitina si benar, sabap la lit si benar i bas ia. Adi erbual ia biakna nge, sabap ia perbual dingen bapa kerina kalak si perbual.
45Tapi perbahan Kukataken man bandu si tuhuna kerna Dibata, la kam tek man bangKu.
46Apai kin kam ngasup mereken keterangen maka Aku erdosa? Dage adi kebenaren kerna Dibata nge Kukataken man bandu ngkai maka la kam tek man bangKu?
47Kalak si reh i bas Dibata nari ibegikenna kap kata Dibata. Tapi kam labo i bas Dibata nari, emaka la kam nggit megikenca."
Jesus nggo lit ope denga lit Abraham
48Jenari ngaloi kalak Jahudi e man Jesus nina, "Ma tuhu dage si ikataken kami e? Kam kap kalak Samaria si setanen."
49Nina Jesus, "Aku labo setanen. Aku mpehaga BapangKu, tapi igombangindu Aku.
50Aku labo ndarami dalan gelah Aku ipehaga. Tapi lit kap sada si mpehaga Aku, dingen si ngataken maka Aku benar.
51Kukataken man bandu: Ise si ngikutken katangKu ndigan pe la ia mate."
52Nina kalak Jahudi e man Jesus, "Genduari nggo ieteh kami maka tuhu-tuhu Kam setanen! Abraham bage pe kerina nabi-nabi nggo mate. Tapi nindu, 'Ise si ngikutken katangKu asa-ndigan pe la ia mate.'
53Bapa kami Abraham nggo mate. Ma labo ikatakenndu maka belinen Kam asaken Abraham? Bage pe kerina nabi-nabi nggo mate. Ise kin iakapndu BaNdu?"
54Erjabap Jesus, "Labo lit gunana adi Kupujiken bangKu. Si mujiken Aku e me BapangKu, si ikatakenndu Dibatandu.
55Tapi si tuhuna labo Ia itandaindu. Aku, Kutandai kap Ia. Adi Kukataken maka la Ia Kutandai, perbual me Aku bagi kam. Tapi Kutandai kap Ia janah Kuikutken KataNa.
56Bapandu, Abraham, ermeriah ukur nimai waringKu; wari e nggo idahna, emaka meriah iakapna."
57Nina kalak Jahudi e man Jesus, "UmurNdu pe langa lit lima puluh tahun nggo ka IdahNdu Abraham?"
58Erjabap Jesus, "Kukataken man bandu: Situhuna ope denga Abraham tubuh, Aku nggo lit."
59Ibuat kalak Jahudi e batu, atena menteri Jesus; tapi cebuni Jesus, jenari lawes Ia nadingken Rumah Pertoton e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel