Kota Jeriho italuken
1Pintu gerbang kota Jeriho terus-terusen itutup janah ijaga gelah bangsa Israel la banci bengket. Sekalak pe la banci bengket ntah pe nadingken kota e.
2Nina TUHAN man Josua, "Kubereken Jeriho ku bas tanndu, rikutken ras rajana ras kerina tenterana si merawa.
3Kam ras tenterandu la banci la erdalan i bas barisen ngkeleweti kota e sekali sada wari.
4Pitu kalak imam, sekalak-sekalak maba terompet, arus erdalan arah lebe Peti Perpadanen. I bas wari si pepituken kam ras tenterandu arus erdalan ngkeleweti kota e pitu kali janah imam-imam ngembus terompet ndai.
5Kenca bage arus iembusna erbahan sada sora si nggedang. Kenca ibegindu si e, kerina kalak si nterem la banci la minter ersurak alu sora megang, jenari tembok kota tentu runtuh. Kenca bage kerina tentera e bengketlah terus ku bas kota e."
6Idilo Josua imam-imam janah ikatakenna man bana kerina, nina, "Buatlah Peti Perpadanen e, janah pitu kalak i bas kam nari erdalan arah lebe, maba terompet."
7Jenari isuruhna tenterana mulai erdalan i bas barisen engkeleweti kota e, alu pengawal-pengawal si ersenjata erdalan leben asa Peti Perpadanen TUHAN.
8Emaka, sue ras kai si iperentahken Josua, pengawal-pengawal si ersenjata mulai erdalan leben asa imam-imam si ngembus terompet. Pudi si reh imam-imam si ngelanja Peti Perpadanen, iikuti pengawal si ersenjata. Gedang-gedang dalan erkata me terompet ndai.
9(Yos 6:8)
10Tapi nggo iperentahken Josua tenterana gelah ula ersurak, janah la banci ngerana sengkebabah pe, seh iberekenna perentah.
11Emaka isuruhna me kalak ndai ngelanja Peti Perpadanen TUHAN ngkeleweti kota e sekali. Kenca bage mulihken ka ia ku ingan erkemah janah erberngi i je.
12Pepagina lampas, keke Josua. Janah enda me pedua kaliken imam-imam ras tentera erbaris ngkeleweti kota e alu uruten si seri ras wari si pemena eme: lebe pengawal si ersenjata; jenari pitu kalak imam si ngembus pitu terompet; kenca e imam-imam si ngelanja Peti Perpadanen TUHAN, pengawal-pengawal si ersenjata si arah pudi. Gedang-gedang dalan erkata me terompet ndai.
13(Yos 6:12)
14I bas wari si peduaken e erdalan ka ia ngkeleweti kota e sekali janah kenca si e mulih ku ingan erkemah. Bagenda me perbahanna enem wari dekahna.
15I bas wari pepituken, nggo kenca terang keke ia kerina jenari erdalan ia ngkeleweti kota e bagi si nggona. I bas wari me ngenca kota e i kelewetina pitu kali.
16Nggo kenca dem pitu kali ikelewetina, ope denga iembus imam-imam terompet, iperentahken Josua tenterana ersurak, jenari nina, "Nggo ibereken TUHAN man bandu kota e!
17Kota e ras kerina si lit i je la banci la ihancurken tuhu-tuhu jadi sada persembahen man TUHAN. Rahap, diberu si pencarinna erlua-lua e, ras kerina keluargana ngenca itadingken, sabap ibunikenna mata-matanta.
18Tapi la banci kai pe ibuatndu si arus ihancurken, adi ibuatndu, tentu kesusahen ras cilaka ku ingan bangsa Israel erkemah.
19Kerina si ibahan i bas pirak, emas, tembaga, ntah pe besi, arus iserapken man TUHAN. Si e arus itamaken ku bas perbendeharan TUHAN."
20Jenari iembus imam-imam me terompet e. Kenca ibegi jelma si nterem sora terompet e, minter ia ersurak kerina alu sora megang, jenari minter runtuh tembok e. Emaka kerina tentera e terus lawes ku das uruk, bengket ku bas kota e ngkuasaisa.
21Ibunuhna alu pedangna tep-tep kalak si lit i bas kota e, dilaki ras diberu, nguda ntah metua. Lembu, biri-biri, ras kalede pe ibunuhi kalak ndai.
22Ikataken Josua man si dua kalak si jadi mata-mata mbarenda, nina, "Laweslah ku rumah diberu, si pencarinna erlua-lua e jenari baba ia ras keluargana ndarat, sue ras si nggo ipadankenndu man bana."
23Emaka lawes ia jenari ibabana Rahap ndarat, ikut pe ras bapana ras nandena, turangna, ras kerina keluargana. Ibabana ia kerina, keluargana ras budak, ku bas ingan si aman deher ingan bangsa Israel erkemah.
24Kenca bage icilukna kota e, itutungna seh kendit kerina, radu ras asa kai si lit i je, seakatan barang-barang si ibahan i bas emas, pirak, tembaga, ras besi nari. Si e kerina ibuatna jenari itamakenna ku bas perbendeharan TUHAN.
25Tapi ipelepas Josua Rahap, diberu si pencarinna erlua-lua e nggeluh, ras kerina kade-kadena, sabap nggo ibunikenna mata-mata si dua kalak si nggo isuruh mbarenda ku Jeriho. (Kesusuren Rahap nggo ringan i Israel seh wari enda.)
26Tupung e ersumpah Josua nina, "Ise si ncubakenca pekena kota Jeriho bene me anakna sintua. Janah ise si erbahan pintu gerbang bene me anakna si nguda."
27Dage, itemani TUHAN me Josua, janah mbar berita kerna ia i belang-belang negeri e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel