Kota Ai italuken ras ikernepken
1Nina TUHAN man Josua, "Baba kerina tentera e ras kam jenari laweslah nangkeng ku Ai. Ula kam mbiar janah ula aru atendu. Kubereken man bandu kemenangen ngelawan raja Ai; rayatna, kotana, ras tanehna jadi sikerajangenndu.
2Uga perbahanndu man Jeriho ras rajana bage me arus ibahanndu pe man Ai ras rajana, tapi sekali enda banci ibuatndu barang-barangna ras lembuna man sikerajangenndu. Ersikap gelah banci iserangndu kota e rempet i pudi nari."
3Emaka ersikap Josua ras kerina tenterana berkat ku Ai. Ipilihna telu puluh ribu kalak tentera si mbisana jenari isuruhna lawes berngi-berngi.
4Iperentahkenna nina, "Cebuni lah kam i pudi kota ah, tapi ula ndauhsa i jenari; sikaplah nerangsa katawari pe.
5Aku ras tenterangku reh ndeheri kota e. Sanga kalak Ai reh ndarat ngelawan kami, minter kami mulih jenari kiam, bali ras si ibahan kita i bas si pemena mbarenda.
6Tentu iayakina kami seh maka ibabai kami ia ndauh i bas kota e nari. Iakapna kami kiam nadingken ia, bagi si ibahan kita mbarenda.
7Kenca bage ndarat kam i bas inganndu cebuni nari jenari taluken kota e. TUHAN Dibatandu si mereken kota e man bandu.
8Kenca ibuatndu kota e, ciluklah, sue ras si ipedahken TUHAN. Enda me perentah man bandu."
9Emaka isuruh Josua kerina lawes, jenari lawes ia ku inganna cebuni janah itimaina i je, arah Barat Ai, kelang-kelang Ai ras Betel. I bas berngi e Josua tading i bas ingan erkemah.
10Pepagina lampas erpagi-pagi, keke Josua jenari ipepulungna tenterana. Kenca e ia ras peminpin-peminpin Israel minpin tentera e ku Ai.
11Tentera si ras ia e lawes kempak dalan bengket ku bas kota e jenari ipajekkenna kemahna arah Utara, kelang-kelangna ras Ai lit sada baluren.
12Ibuatna kira-kira lima ribu kalak jenari isuruhna cebuni arah Barat kota, kelang-kelang Ai ras Betel.
13Tentera e iatur guna erperang, si nteremna tading i bas ingan erkemah arah Utara kota e. Si debanna arah Barat. I bas berngi e Josua ringan i baluren e.
14Tupung idah raja Ai tentera Josua, minter iperangina kalak Israel i bas ingan si mbarenda ka, alu la meteh maka ia nandangi iserang i pudi nari.
15Josua ras tenterana mpekulah-kulah mundur jenari kiam ku daerah gurun pasir.
16Kerina dilaki si lit i bas kota Ai nggo idilo ngayakisa, janah asum iayakina Josua, terus ia erdauhna i kota e nari.
17Tep-tep dilaki si lit i bas kota Ai lawes ngayaki kalak Israel, janah kota e talang itadingken la lit ise pe si mpertahankenca.
18Kenca bage nina TUHAN man Josua, "Angkat lembingndu, pepinter ujungna kempak Ai, sabap Kubereken kota e ku bas kuasandu." Ibahan Josua bagi si ikataken man bana,
19janah minter kenca iangkatna tanna, tentera si cebuni ndai pedas-pedas keke, kiam ku bas kota e jenari italukenna. Minter icilukna kota e.
20Asum itulihken kalak Ai ku pudi, iidahna cimber nangkih ku das. Lanai lit dalanna lompat, sabap kalak Israel si ndai kiam ku taneh si mesawang genduari nggo erkusur nerang ia.
21Asum idah Josua ras tenterana maka tentera si debanna ndai nggo muat kota e, janah nggo meseng, erkusur ia kerina jenari mulai ibunuhina kalak Ai.
22Kalak Israel si i bas kota e genduari reh ku berneh ikut i bas pertempuren e. Idah kalak Ai maka ia nggo ikepung bangsa Israel, janah kerina ia mate ibunuh. La lit sada pe si pulah, la lit si tading,
23seakatan raja Ai. Ia itaban jenari ibaba man Josua.
24Kerina musuh e ibunuh kalak Israel i taneh si mesawang ku ja ia nggo ndai iayak-ayak kalak Ai. Kenca bage mulihken ia ku kota Ai emaka ibunuhna kerina kalak si lit i je.
25Lembing tetap ipepinter Josua kempak kota Ai janah lalap la ipesusurna seh tep-tep kalak si lit i je nggo ibunuh. Kerina kalak kota Ai si ibunuh i bas wari e lit sepulu dua ribu dilaki ras diberu.
26(Yos 8:25)
27Lembu ras barang-barang si deban si itaban i bas kota e ibuat bangsa Israel jadi sikerajangenna, sue ras si nggo ipedahken TUHAN man Josua.
28Iciluk Josua kota Ai janah ipelepasna runtuh. Seh sendah pe bage denga nge.
29Igantungna raja Ai i bas sada batang kayu, janah ipelepasna maitna gantung i je seh berngi. Kenca matawari sundut iperentahken Josua gelah mait raja Ai ibuat, jenari ibenterken ku dalan i pintu gerbang kota e. Itamburina mait e alu batu si ergun-gun, si lit denga i je seh sendah.
Undang-undang ioge i Deleng Ebal
30Jenari ipajekken Josua i Deleng Ebal sada batar-batar ingan persembahen man TUHAN, Dibata Israel.
31Ibahanna e sue ras pedah si nggo ibereken Musa, suruh-suruhen TUHAN, maka kalak Israel, bagi si ikataken i bas Undang-undang Musa, "Sada batar-batar ingan persembahen ibahan i bas batu nari si langa ibar-bar alu alat-alat besi." I babo batar-batar e ipersembahkenna persembahen tutungen man TUHAN, janah ibahanna pe persembahen persadan.
32I je, alu ipernehen bangsa Israel, ibahan Josua i babo batu sada salinen Undang-undang si nggo isuratken Musa.
33Bangsa Israel, ras peminpin-peminpin, pegawai-pegawai, ras hakim-hakimna, bage pe kalak asing si lit i tengah-tengahna, tedis arah kawes ras arah kemuhen Peti Perpadanen TUHAN, ngala ku imam-imam kalak Lewi si ngelanja Peti e. Jelma si nterem e tedis, setengah mpudiken Deleng Gerisim janah setengah nari mpudiken Deleng Ebal. Musa suruh-suruhen TUHAN e nggo mereken pedah man bana kerina guna ngelakoken si enda, adi nggo seh paksana ia ngaloken pemasu-masun.
34Jenari alu sora megang, iogeken Josua Undang-undang e kerina, subuk pasu-pasu ras sumpahna, sue ras si tersurat i bas kitap Undang-undang.
35Tep-tep perentah Musa iogeken Josua man kerina perpulungen e, subuk man diberu ras anak-anak, bage pe kalak pertandang si ringan i tengah-tengahna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel