1Enda me berita i bas TUHAN nari si seh man Sepanya tupung Josia anak Amon jadi raja i Juda. (Sepanya eme kesusuren Raja Hiskia arah Amaria, Gedalya, ras Kusi.)
Wari ukumen i bas TUHAN nari
2Nina TUHAN, "Kukernepken ateKu kerina si lit i doni,
3manusia, bage pe nurung, perik-perik ras rubia-rubia si debanna. Kalak jahat Kudabuhken. Kerina manusia Kukernepken, janah la lit sada pe itadingken. Aku TUHAN, nggo melasken katangKu.
4Kuukum kerina kalak si ringan i Jerusalem ras kerina kalak Juda. Kumasapken kerina si lit denga tading kerna sembah-sembahen Baal, seh maka lanai lit ise pe ngingetsa imam-imam perbegu si erdahin guna Baal e.
5Kukernepken kerina kalak si lawes ku tarum rumah lako nembah matawari, bulan ras bintang-bintang. Jenari Kukernepken pe kalak si nembah dingen ersumpah patuh man bangKu, tapi kenca bage ersumpah ka ia i bas gelar Dewa Milkom.
6Kukernepken kerina kalak si nggo surut dingen lanai ngikutken Aku, kerina kalak si la reh man bangKu tah pe mindo penegu-negu i bas Aku nari."
7Wari TUHAN nggo ndeher; Ia nggo sikap nehken ukumen; dage siniklah i adep-AdepenNa. TUHAN nggo sikap nggeleh BangsaNa desken asuh-asuhen persembahen.
8Nina TUHAN, "I bas wari penggelehen e, Kuukum kerina pegawai, anak-anak raja, ras kerina kalak si ndalanken adat bangsa si deban.
9Kuukum kerina kalak si nembah bagi perbegu bage pe kerina kalak si nangko ras munuh ndemi rumah tuanna alu barang-barang rampasen."
10"I bas wari e," nina TUHAN, "ibegindu me sora nderkuh i Pintu Gerbang Nurung i Jerusalem. Ibegindu me sora ngandung i bas bagin si mbaru i bas kota e dingen sora erderak-derak si megang i das uruk-uruk.
11Ngandung dingen nderkuhlah kam adi ibegindu si enda, kam si ringan arah berneh kota, erkite-kiteken mate me kerina perbinaga.
12I bas paksa e Kugargari kota Jerusalem alu maba lampu. Kuukum kerina kalak si la akapna lit man kebiarenna, si ngerana i bas ukurna nina, 'Kai pe labo ibahan TUHAN, subuk si mehuli tah si jahat.'
13Kalak si bage, irampasi kebayakenna, rumahna iradasken. Lanai ndigan pe ia ringan i bas rumah si ipajekkenna, lanai ndigan pe iinemna lau anggur i bas kebun anggur si isuanna."
14Wari TUHAN si mbelin nggo ndeher -- nggo seh kal deherna janah pedas me ia reh! Wari e wari si pagit kap, i ja serdadu si merawana pe nderkuh perban biarna!
15Wari e wari pernembeh ate si gara, wari kiniseran ras aru ate, wari kerontasen ras kemasapen, wari si geltem dingen gelap, mbiring dingen meremang,
16wari si gejek erkiteken sora terompet-perang ras surak-surak perang tentera si nerang kota-kota si erbenteng dingen ermenara meganjang.
17Nina TUHAN, "Kubahan kecedan si bage nandangi manusia, seh maka kerina kalak terdadap-dadap bagi kalak pentang. Sabap nggo erdosa ia man bangKu, emaka genduari iamburken me darehna bagi lau, janah maitna ampar-ampar seh macik i babo taneh."
18I bas warina TUHAN encidahken pernembeh AteNa si gara, kerina pirak ras emasna pe labo ngasup engkelinisa. Kerina doni keri ikernepken api pernembeh ate TUHAN. IkerikenNa rempet tep-tep kalak si ringan i doni.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel