1Saul adhabu ka Yonatan pottrana, ban ka sakabbinna ponggabana ja’ salerana mateyana Daud. Tape Yonatan ce’ taresnana ka Daud,
2daddi pas abala kantha reya ka Daud, "Sampeyan epateyana sareng rama; te-ngate. Lagguna gu-laggu sampeyan nyare pangeteggan, pas ja’ kalowaran.
3Kaula entara ka talon asarengnga rama manjengnga e seddi’anna pangetegganna sampeyan. Kaula pas tor-matora ka rama parkara maksodda se mateyana sampeyan. Ponapa hasella se acaca ganeka bi’ kaula sampeyan ebala’ana."
4Yonatan pas acaca sabarang se bagus parkara Daud, atorra, "Rama, ampon Daud ja’ kantos kaneyaja. Daud ta’ gadhuwan sala pa-ponapa ka panjennengngan; la’-mala’ sabaligga, Daud bannya’ jasana ka panjennengngan.
5Abandha nyabana e bakto mate’e Goliyat, sarengngan PANGERAN ampon apareng kamennangan se raja ka ommat Isra’il kalaban parantara’annepon Daud gapaneka. Sampeyan dibi’ ngoladi parkara gapaneka, ban e bakto gapaneka panjennengngan perak. Daddi, aponapa samangken panjennengngan me’ nganeyaja’a oreng se ta’ gadhuwan sala ka panjennengngan sareng mateyana Daud ta’ kalaban badha sabappepon?"
6Saellana meyarsa dhabuna Yonatan, Saul pas apangrasa, daddi pas asompa kalaban asmana PANGERAN ja’ Daud ta’ epateyana.
7Yonatan laju adikane Daud sarta nyareta’agi pa-apa se edhabuwagi ban ramana. Daud pas ebakta ka Saul, ban molae dhari jareya Daud daddi pangladinna Saul pole akantha dha’-adha’na.
8Saellana jareya Isra’il aperrang ban Filistin pole. Daud nyerrang sarta makala oreng Filistin, sampe’ oreng Filistin padha buru kabbi.
9E settong are Saul teppa’na agi-lenggi e dalemma sambi ngastane tombak. O-tao Saul edhatengnge pole bi’ erroh jahat se eotos PANGERAN. E bakto jareya Daud teppa’na amaen calempongnga.
10Saul ngoddi ngaceddagi tombak jareya ka Daud se badha e seddi’na geddhung. Tape Daud nyese, daddi tombagga naccek ka geddhung. Daud pas buru nyare salamet.
11E malem jareya Saul makon reng-oreng nyendhemme compo’na Daud, maksodda mateyana Daud kalagguwanna gu-laggu. Tape Mikhal rajina mator ka Daud, "Mon ba’na ta’ buru malem reya, lagguna tanto ba’na epate’e."
12Daud epatoron dhari candhela bi’ Mikhal, pas terros buru.
13Saellana jareya Mikhal mondhut arcana dibana roma tatanggana pas esaba’ e pasareyanna Daud. E bagiyan cethagga epobuwi bantal dhari buluna embi’, arca jareya pas esapo’e.
14E bakto otosanna Saul napa’ ka jadhiya mega’a Daud, Mikhal adhabu, "Daud songkan."
15Tape bi’ Saul reng-oreng jareya epakon abali pole, epakon ngabas dibi’. Dhabuna Saul, "Giba dha’ enna’, maske ban katedhunganna, bi’ sengko’ epateyana."
16Para otosan jareya maso’ ka dhalem romana Daud, o-tao se badha e jadhiya coma arca se esaba’ e katedhungan, epobuwi bantal buluna embi’ e bagiyan cethagga.
17Dhabuna Saul ka Mikhal, "Ba’na me’ ce’ tegana nepo sengko’ kantha reya! Ba’na me’ nolonge maburu tang moso!" Saodda Mikhal, "Kaula epateyana mon ta’ poron nolonge se buruwa."
18Saellana Daud buru, pas meyos ka kalenggiyanna Samuwel e Rama, sarta notorragi sabarang se elampa’agi Saul ka salerana. Daud ban Samuwel pas meyos ka Nayot terros alenggi e jadhiya.
19Tape badha oreng se abala ka Saul ja’ Daud badha e Nayot e seddi’na Rama.
20Daddi Saul ngerem reng-oreng otosan esoro nangkep Daud. Tape para otosan jareya nemmo bi-nabbi se padha akompol e jadhiya atangdang rak-oragan abareng, epimpin Samuwel. Para otosanna Saul jareya ekobasae Errohna Allah, pas padha noro’ atangdang ban rak-oragan.
21E bakto Saul meyarsa kabar jareya, pas makon reng-oreng laenna, tape reng-oreng jareya noro’ atari ban rak-oragan keya. Saul ngotos oreng pole katellokaleyanna, tape para otosan jareya padha bai ban otosan en-laenna.
22Daddi Saul pas meyos dibi’ ka Rama. Sanapa’na ka somor se raja e Sekhu, laju mareksane badha e dhimma Samuwel ban Daud, oreng e jadhiya abala ja’ badha e Nayot.
23Saul terros ka jadhiya, tape pas ekobasae Errohna Allah keya, daddi pas noro’ atangdang ban rak-oragan e salanjangnga parjalanan ka Nayot.
24Sanapa’na ka jadhiya, rasoganna laju ebukka’ pas atangdang sarta rak-oragan e adha’na Samuwel, Saul pas robbu ka tana, abangkang sampe’ saare samalem. (Jareya asal molana badha parebasan se amonye, "Apa Saul daddi nabbi keya?")
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel