1Ta’ abit saellana jareya oreng Filistin makalowar tantarana nyerrangnga Isra’il. Akhis adhabu ka Daud, "Tantona ba’na ngarte ja’ ba’na ban reng-orengnga kodu aperrang nolonge sengko’."
2Saodda Daud, "Tanto saos. Dhaggi’ junandalem tanto ngoladi dibi’ ponapa se bisa elakone abdidalem kaangguy junandalem." Dhabuna Akhis, "Nyaman, mon kantha jareya! Bi’ sengko’ ba’na epadaddiya tang pangawal pribadhi."
3Samuwel la seda, etangese oreng sanagara Isra’il sarta esareyagi e Rama, kotthana dibi’. Sabellunna jareya sakabbinna dhukon tebbak ban dhukon arwah bi’ Saul la eojuk dhari Isra’il.
4E bakto tantara Filistin akompol ban akemah e seddi’na kottha Sunem, Saul makompol oreng Isra’il, pas padha akemah neng e Gunong Gilboa.
5E bakto ngoladi tantara Filistin, pas arassa ce’ tako’na.
6Daddi Saul pas nyo’on petodu ka PANGERAN, tape PANGERAN ta’ apareng jawaban, e dhalem mempe otabana kalaban aguna’agi Urim ban Tumim otabana kalaban parantara’anna bi-nabbi.
7Daddi Saul adhabu ka ba-ponggabana, "Kassa’ nyareyagi dhukon arwah babine’, sengko’ entara menta petodu ka dhukon jareya." Saodda reng-oreng jareya, "Neng e En-Dor badha."
8Saul pas nyamar terro ta’ etemmowa oreng; pas meyos eerengngagi oreng kadhuwa, napa’ ka bengkona dhukon babine’ jareya e bakto malem. Dhabuna Saul, "Olokkagi arwahna oreng se bi’ sengko’ esebbuda nyamana, menta sopaja arwah jareya aramallagi apa se bakal kadaddiyana."
9Saodda babine’ jareya, "Tantona sampeyan oneng ja’ Rato Saul ngojuk dhari Isra’il sadajana dhukon tebbak ban dhukon arwah. Aponapa sampeyan me’ entar ka kaula, dhaggi’ kaula epega’ pas epate’e."
10Saul pas asompa, dhabuna, "Demi Allah se odhi’, sengko’ ajanji ka ba’na ja’ ba’na ta’ kera eokom polana reya."
11Babine’ jareya atanya, "Arwahepon pasera se epadhatengngagiya sareng kaula?" Saodda Saul, "Arwahna Samuwel."
12E bakto nangale’e Samuwel, babine’ jareya acerreng, ngoca’ ka Saul, "Aponapa junandalem me’ co-ngoco abdidalem? Ropana junandalem ka’dhinto Rato Saul."
13Dhabuna rato ka babine’ jareya, "Ella, ja’ tako’! Apa se etangale’e ba’na?" Babine’ jareya nyaot, "Abdidalem nengale erroh kalowar dhari dhalem bume."
14"Kantha apa robana?" dhabuna Saul. Saodda, "Oreng lalake’, ampon towa. Ngangguy juba." Saul pas ngarte ja’ jareya Samuwel, daddi pas asojut ngormat ka Samuwel.
15Dhabuna Samuwel ka Saul, "Arapa’a ba’na me’ aganggu sengko’? Arapa sengko’ me’ elok-olok ka dunnya pole?" Saodda Saul, "Abdina ce’ bingongnga polana eserrang oreng Filistin, mangkana Allah ampon ta’ marduli ka abdina. Abdina atanya, Allah ta’ kasokan nyaodi kalaban parantara’annepon para nabbi otaba e dhalem mempe. Daddi abdina nyo’ona tolong ka panjennengngan, ngereng parenge petodu ponapa se kodu elakone abdina."
16Dhabuna Samuwel, "Apa gunana ba’na madhateng sengko’ mon PANGERAN la ta’ parduli ka ba’na sarta amoso ka ba’na?
17Se elampa’agi PANGERAN ka ba’na reya la mare edhabuwagi ka sengko’ sabbanna. PANGERAN la mondhut karaja’an Isra’il dhari ba’na, eparengngagi ka Daud.
18Ba’na ta’ atoro’ dhabuna PANGERAN, ta’ endha’ mate’e sakabbinna oreng Amalek ban dhi’-andhi’na. Jareya sababba arapa sateya ba’na me’ epakantha reya bi’ PANGERAN.
19Ba’na ban reng-oreng Isra’il laenna bakal gaggarra ka tanangnga oreng Filistin. Lagguna ba’na ban na’-ana’na ba’na bakal akompola ban sengko’; la’-mala’ tantara Isra’il bakal epassra’agiya ka tanangnga oreng Filistin kabbi bi’ PANGERAN."
20Saul pas robbu ngenjer e tana padha ban se etappor kelap, sabab ce’ takerjadda ngedhing dhabuna Samuwel se kantha jareya. Ban pole badanna ce’ lempona, sabab saare samalem ta’ adha’ar pa-apa.
21Dhukon babine’ gella’ nyemma’e Saul, pas nangale’e ja’ Saul katako’an, daddi babine’ jareya ngoca’, "Guste, abdidalem ampon ajalannagi kasokanna junandalem kalaban abandha nyaba.
22Daddi, abdidalem nyo’ona jugan kasokana junandalem ngabbuli parnyo’onan abdidalem; ngereng dha’ar sakone’ tateddhan se esadhiya’agiya abdidalem sopaja junandalem kengenga nerrossagi parjalanan."
23Saul nolak sarta adhabu ja’ ta’ adha’ara. Tape saellana epaksa keya bi’ ba-ponggabana, Saul atoro’, pas jaga dhari tana, laju alenggi e lencak.
24Babine’ gella’ pas duliyan nyambelli budhu’na sapena se lempo, ngala’ teppong pas ebanteng, ekagabay roti se ta’ eragi’i.
25Saellana jareya kakanan gella’ eangka’agi ka Saul ban ka ba-ponggabana, kabbi pas padha ngakan. Saellana jareya Saul ban reng-orengnga pas mangkat e malem jareya keya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel