1Saellana pettong bulan abidda Petthe Parjanjiyan jareya badha e Filistin,
2oreng Filistin pas ngolok mam-imamma sarta kang-tokang seher, pas atanya, "Epakadi ponapa’a Petthe Parjanjiyanna PANGERAN paneka? Manabi epabaliya ka kennengngan se asal, kadi ponapa carana?"
3Saodda mam-imam ban kang-tokang seher jareya, "Petthe Parjanjiyanna Allahna Isra’il jareya ja’ gun pera’ pabali malolo, kodu etoro’e tor-ator menangka tebbusanna dusana ba’na. Kalaban cara se kantha jareya ba’na tanto pas baras, ban ba’na bakal taowa arapa Allahna Isra’il me’ ros-terrosan apareng okoman ka ba’na."
4"Tor-ator ponapa se ebadhiya panebbussa dusa gapaneka?" ca’na reng-oreng jareya. Saodda mam-imam gella’, "Dun-babudunan dhari emmas lema meggi’ ban kos-tekosan emmas lema meggi’ keya, padha ban bannya’na rato Filistin. Sabab ba’na kabbi, ra’yat ban ratona, padha ekenneng balai, katebanan panyaket bu-tombu ban tekos.
5Daddi, ba’na kodu agabay terowanna bu-tombu ban tekos se teppa’na nyeksa reng-oreng e nagarana ba’na reya. Kalaban cara se kantha jareya ba’na ahormadi Allahna Isra’il. Pola Allahna Isra’il jareya pas ambu se ngokom ba’na, ba-diba ban nagarana ba’na.
6Apa gunana ba’na macengkal akantha rato ban reng-oreng Messer lamba’? Ja’ kaloppae baramma carana rato ban reng-oreng Messer jareya bi’ Allah ekagabay en-maenan sampe’ dhi-budhina oreng Isra’il epanneng ondur dhari Messer.
7Daddi, mara sadhiya’agi jikar se gi’ anyar ban sape dhadhuwa’; sape jareya kodu se gi’ nyosowe ban se gi’ ta’ tao epanarek jikar. Sape jareya pasang ka jikarra, budhu’na pabali ka kandhangnga.
8Saellana jareya, Petthe Parjanjiyanna PANGERAN jareya kala’, saba’ e jikar jareya, kothak se aesse rang-barang dhari emmas se egabaya tor-ator ka Pangeran menangka tebbusanna dusana ba’na saba’ e seddi’na Petthe jareya. Sape ban jikar jareya dina me’ olle ajalan dibi’.
9Abassagi ajalan dha’ emma jikar jareya; mon Petthe Parjanjiyan jareya egiba ka nagarana dibi’, iya areya ka kottha Bet-Semes, jareya artena Allahna Isra’il se madhateng calaka’ se nako’e reya. Tape mon jikar jareya ta’ nojju ka kottha jareya, balai reya banne dhari Allahna Isra’il asalla, coma kabendherran."
10Petodu jareya etoro’ kabbi bi’ reng-oreng Filistin; reng-oreng jareya ngala’ sape se gi’ nyosowe dhadhuwa’, epasang ka jikar, dhu’-budhu’na epamaso’ ka kandhangnga.
11Petthe Parjanjiyanna epaongga ka jikarra, bariya keya kothak se aesse dun-babudunan emmas ban kos-tekosan emmas.
12Sape se dhadhuwa’ jareya terros ajalan nojju ka Bet-Semes, ta’ luk-bilugan sakale. Sambi ajalan sape jareya amonye terros. Rato Filistin se kalema terros noro’ bunte’ sampe’ ka batessa Bet-Semes.
13E bakto jareya reng-oreng Bet-Semes teppa’na anye gandum e cora. E bakto reng-oreng jareya nangale’e Petthe Parjanjiyan jareya atena ce’ peragga, pas padha nyander ka jikar jareya.
14Jikar jareya ambu e seddi’na bato se raja e teggalla oreng Bet-Semes se anyama Yusak. Reng-oreng kottha jareya thok-ngetthok jikar gella’, sapena se dhadhuwa’ esambelli ekagabay kurban obbaran ka PANGERAN.
15Bi’ reng-oreng Lewi Petthe Parjanjiyan jareya epatoron, bariya keya kothak se aesse rang-barang dhari emmas gella’, jareya kabbi esaba’ e attassa bato se raja gella’. Saellana jareya oreng Bet-Semes ngatorragi kurban obbaran ban ban-kurban laenna ka PANGERAN.
16E bakto rato Filistin se kalema gella’ ngoladi jareya kabbi, pas padha gubar ka Ekron e are jareya keya.
17Daddi oreng Filistin la ngeba tor-ator ka PANGERAN menangka tebbusanna dusana oreng e tha-kotthana se eparenta rato Filistin se kalema. Tha-kottha jareya iya areya kottha Asdod, Gaza, Askelon, Gat ban Ekron. E antarana tha-kottha jareya badha se badha bintengnga, badha se tadha’. Sabban kottha settong ngerem dun-budunan ban kos-tekosan emmas settong ebang. Menangka buktena kadaddiyan jareya iya areya bato se raja se egabay panyaba’anna Petthe Parjanjiyanna PANGERAN gella’. Sampe’ sateya bato jareya gi’ badha e teggalla Yusak, oreng Bet-Semes rowa.
18(6:17)
19Tape e antarana reng-oreng Bet-Semes jareya badha oreng pettong polo nyongngo’ ka dhalem Petthe Parjanjiyan jareya; reng-oreng jareya bi’ PANGERAN epamate. Ra’yat pas padha sossa polana PANGERAN madhateng balai se ce’ rajana jareya.
20Reng-oreng Bet-Semes pas ngoca’, "Sapa se kowadda neng e ajunanna PANGERAN, Allah Se Socce rowa? Eaterragiya dha’ emma Petthe jareya sopaja jauwa dhari ba’na ban sengko’?"
21Reng-oreng Bet-Semes jareya pas nyoro oreng entar ka Kiryat-Yearim, esoro manapa’ pessen kantha reya, "Petthe Parjanjiyan ampon epabali sareng oreng Filistin. Ngereng pondhut Petthe gapaneka dhari Bet-Semes, pas bakta ka kalenggiyanna sampeyan."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel