1 Tawarikh 11 (MADURA)

[VER] : [MADURA] [PL] [PB]

<< 1 Tawarikh 11 >>

1Pin-pamimpinna bangsa Isra’il padha ngadhep ka Daud e Hebron, laju mator, "Abdidalem sadaja ka’dhinto gi’ sabala’an sareng junandalem.

2Ngabidi gi’ dhimen, la’-mala’ e bakto Saul gi’ marenta abdidalem sadaja, junandalem se mimpin tantara Isra’il sabban maju aperrang. Sarengngan pole Guste Allahepon junandalem ampon ajanji ja’ junandalem se badhi mimpina ommadda sareng daddiya ratona."

3Daddi Daud laju mabadha parjanjiyan ban pin-pamimpinna Isra’il jareya. Bi’ reng-oreng jareya Daud laju elanti’ epajumenneng rato Isra’il akantha se la edhabuwagi bi’ PANGERAN kalaban parantara’anna Samuwel.

4E settong bakto Rato Daud ban sakabbinna tantara Isra’il alorok kottha Yerusalim. E bakto jareya kottha Yerusalim gi’ anyama Yebus, ban gi’ ekennengnge oreng Yebus, oreng asli kottha jareya.

5Reng-oreng Yebus ngoca’ ka Daud ja’ Daud ta’ kera bisa maso’ ka kotthana. Tape Daud ahasel arebbu’ bintengnga se anyama Siyon. E bakto jareya Daud la ngomommagi ka reng-orengnga, ja’ pa’-sapa’a se dha’-adha’ kadibi’ bisa mate’e oreng Yebus epadaddiya panglima. Sarrena Yowab se dha’-adha’ kadibi’ nyerbu oreng Yebus, daddi Yowab jareya laju epadaddi panglima. (Ebuna Yowab iya areya Zeruya.) Saellana arebbu’ binteng Siyon, Daud laju alenggi e jadhiya. Lantaran jareya molae dhari bakto jareya binteng gella’ enyamae "Kottha Daud".

6(11:5)

7(11:5)

8Kottha jareya bi’ Daud laju epateppa’ pole molae dhari kennengngan se epatenggi etembuk ban tana e bagiyan temorra gumo’; saellana jareya se mateppa’ kottha buru epaterros bi’ Yowab sampe’ mare.

9Daud sajan abit sajan kowat, lantaran etolong bi’ PANGERAN Se Mahakobasa.

10Areya’ ma-nyamana para parwirana Daud se kalonta. Ra-parwira jareya abareng ban reng-oreng Isra’il padha aperrang sopaja Daud bisa’a jumenneng rato menorot se edhabuwagi PANGERAN. Ban salanjangnga reng-oreng jareya paggun abanto pamarenta’anna Daud.

11Parwira se nomer settong iya areya Yasobam oreng Hakhmoni, se mimpin "Triwira". Tao e dhalem settong paperrangan Yasobam jareya ngadhebbi oreng tello ratos; oreng jareya epate’e kabbi ban tombagga.

12Oreng se nomer dhuwa’ e dhalem Triwira jareya iya areya Eleyazar pottrana Dodo dhari kaom Ahohi.

13E dhalem paperrangan e Pas-Damim Eleyazar jareya aperrang nolonge Daud ngadhebbi oreng Filistin. E bakto tantara Isra’il molae buru, Eleyazar ban reng-orengnga paggun alaban e nga’-tengnga’anna settong teggal kennengnganna oreng namen gandum, sarta aperrang ngadhebbi reng-oreng Filistin jareya. Bi’ PANGERAN Eleyazar jareya laju eparenge kamennangan se raja.

14(11:13)

15E settong are e antarana parwirana Daud se kalonta se bannya’na tello polo oreng rowa badha katello se entar nyabis ka Daud se teppa’na alenggi e settong kennengngan se ebintenge e settong gunong bato e seddi’anna Guwa Adulam. E bakto jareya oreng Filistin akemah e Cora Refa’im, ban sapasukan e antarana ngobasane sarta ngennengnge Betlehem.

16(11:15)

17Daud ce’ kerrongnga ka kampongnga, laju adhabu, "Ja’ sakenga badha oreng ngala’agi sengko’ aeng enom dhari somor e seddi’na labang saketheng Betlehem!"

18Ngedhing dhabuna Daud buru, parwira se katello gella’ narabas parkemahanna oreng Filistin, pas nemba aeng dhari somor jareya, saellana laju eatorragi ka Daud. Tape Daud ta’ kasokan adha’ar aeng enom jareya, la’-mala’ aeng jareya laju etotta’ menangka tor-ator ka PANGERAN.

19Dhabuna, "Bit asmana Allah, sengko’ ta’ ngenoma aeng reya! Mon sengko’ ngenom aeng reya, rassana sengko’ padha ban se ngenom dharana reng-oreng se abandha nyabana!" Daddi Daud ta’ kasokan sakale adha’ar aeng enom jareya. Jareya lalakon se noduwagi kabangalanna parjurit katello se kalonta gella’.

20Parwira se kalonta se tello polo oreng gella’ enyamae keya "Tridasawira" se epimpin bi’ Abisai ale’na Yowab. Abisai jareya tao matebas oreng tello ratos ngangguy tombagga, ban lantaran jareya daddi kasohor. Tape ta’ pate kasohor akantha Triwira.

21(11:20)

22Parwira laenna se kalonta iya areya Benaya pottrana Yoyada, oreng Kabze’el. Orengnga ce’ bangalanna, la mate’e pahlawan raja dhari Mo’ab kadhuwa. E settong are, teppa’na ojan salju, Benaya maso’ ka dhalem settong lobang sarta mate’e macan e jadhiya.

23Tao keya mate’e oreng Messer se raja badanna, se tenggina lebbi dhari dhu meter. Oreng jareya asanjata tombak se ce’ rajana, tape bi’ Benaya elaban ngangguy thong-penthong. Tombak se eteggu’ oreng Messer jareya erebbu’, pas eangguy mate’e oreng jareya.

24Jareya sa-jasana Benaya, sala settong dhari Tridasawira.

25E dhalem Tridasawira jareya Benaya se paleng kalonta, tape ta’ saapa mon ebandhingngagi ban Triwira. Bi’ Daud Benaya jareya laju epadaddi pangawal pribadhina.

26Areya’ ra-parwira laenna se kalonta keya nyamana: Asa’el ale’na Yowab, Elhanan pottrana Dodo oreng Betlehem, Samot oreng Harod, Heles oreng Peloni, Ira pottrana Ikes oreng Tekowa, Abiyezer oreng Anatot, Sibkhai oreng Husa, Ilai oreng Ahohi, Maharai oreng Netofa, Heled pottrana Ba’ana oreng Netofa, Itai pottrana Ribai oreng Gibeya e dhaerana suku Benyamin, Benaya oreng Piraton, Hurai oreng ra-cora Ga’as, Abiyel oreng Araba, Azmawet oreng Bahurim, Elyahba oreng Sa’albon, Hasyem oreng Gizon, Yonatan pottrana Sage oreng Harari, Ahiyam pottrana Sakhar oreng Harari, Elifal pottrana Ur, Hefer oreng Mekherati, Ahiya oreng Peloni, Hezrai oreng Karmel, Na’arai pottrana Ezbai, Yowël taretanna Natan, Mibhar pottrana Hagri, Zelek oreng Amon, Naharai oreng Be’erot, tokang gibana sanjatana Yowab, Ira ban Gareb oreng Yetri, Uriya oreng Het, Zabad pottrana Ahlai, Adina pottrana Siza (sala settong dhari pamimpin e dhalem suku Ruben se andhi’ pasukan tello polo oreng), Hanan pottrana Ma’akha, Yosafat oreng Mitni, Uziya oreng Asytarot, Syama ban Yeiyel, tra-pottrana Hotam, oreng Aroër, Yediyael ban Yoha, tra-pottrana Simri, oreng Tizi, Eliyel oreng Mahawim, Yeribai ban Yosawiya, tra-pottrana Elna’am, Yitma oreng Mo’ab, Eliyel, Obed ban Ya’asiyel oreng Mezobaya.

27(11:26)

28(11:26)

29(11:26)

30(11:26)

31(11:26)

32(11:26)

33(11:26)

34(11:26)

35(11:26)

36(11:26)

37(11:26)

38(11:26)