1E bakto Daud la ce’ seppona, laju ngangkat Sulaiman epajumenneng rato Isra’il.
2Rato Daud makompol sakabbinna pamimpin Isra’il, mam-imam ban reng-oreng Lewi,
3pas ngetong sakabbinna lalake’an Lewi se aomor tello polo taon ka attas. Kabbi badha tello polo ballu’ ebu oreng.
4Saellana jareya, se pa’ lekor ebu oreng e antarana epassrae lalakon e Padalemman Socce, se nem ebu oreng epangoros administrasi ban ra-parkara pangadilan,
5se pa’ ebu epadaddi panjaga, ban pa’ ebu epanabbu pakakassa mosik se la esadhiya’agi, menangka panghormadan ka PANGERAN.
6Bi’ Daud reng-oreng Lewi ebagi epatello menorot kaomma bang-sebang, iya areya kaom Gerson, Kehat ban Merari.
7Gerson andhi’ ana’ lalake’ kadhuwa, iya areya: Ladan ban Simei.
8Ana’ lalake’anna Ladan katello, iya areya: Yehiyel, Zetam ban Yowël.
9Jareya la-kapalana kaom toronanna Ladan. (Selomit, Haziyel ban Haran reya ana’ lalake’anna Simei.)
10Ana’ lalake’anna Simei se kaempa, menorot toro’ gilirra omorra iya areya: Yahat, Ziza, Yeus ban Beriya. Toronanna Yeus ban Beriya ta’ bannya’, daddi eanggep settong kaom.
11(23:10)
12Kehat andhi’ ana’ lalake’ kaempa, iya areya: Amram, Yizhar, Hebron ban Uziyel.
13Amram reya ramana Harun ban Mosa. (Harun ban toronanna salanjangnga la eteptebbagi malolo epangoros pakakassa kabakteyan, ngobbar dupa e dhalem abakte ka PANGERAN, aladine PANGERAN ban aberkadi ra’yat bit asmana PANGERAN.
14Pottra lalake’anna Mosa abdina Allah rowa emaso’agi ka dhalem suku Lewi.)
15Mosa kaagungan pottra lalake’ kadhuwa, iya areya Gersom ban Eliyezer.
16Se daddi pamimpin e antarana tra-pottrana Gersom iya areya Sebuwel.
17Eliyezer kaagungan pottra lalake’ pera’ settong, iya areya Rehabiya. Tape Rehabya ce’ bannya’na pottrana.
18Yizhar, ana’na Kehat se nomer dhuwa’, andhi’ ana’ lalake’ se anyama Selomit, se daddi kapalana kaom.
19Hebron, ana’na Kehat se nomer tello’, andhi’ ana’ lalake’ kaempa, iya areya: Yeriya se sareyang, salanjangnga iya areya Amarya, Yehaziyel ban Yekameyam.
20Uziyel, ana’na Kehat se nomer empa’, andhi’ ana’ lalake’ kadhuwa, iya areya: Mikha se sareyang, ban Yisiya.
21Merari andhi’ ana’ lalake’ kadhuwa, iya areya Mahli ban Mosi. Mahli andhi’ ana’ lalake’ kadhuwa, iya areya Eleyazar ban Kis.
22tape Eleyazar seda ta’ andhi’ ana’ lalake’; pera’ ana’ babine’anna, se epalake’e po-sapopona dibi’, iya areya na’-ana’na Kis,
23Mosi, ana’na Merari se nomer dhuwa’, andhi’ ana’ lalake’ katello, iya areya. Mahli, Eder ban Yeremot.
24Jareya ma-nyamana toronanna Lewi se ecathet menorot kapalana kaomma ban kalowargana bang-sebang. Omorra dhu polo taon ka attas ban epassrae lalakon e Padalemman Socce.
25Dhabuna Daud, "PANGERAN, Guste Allahna Isra’il la apareng kataremtemman ka ommadda, sarta alenggi e Yerusalim kaangguy salanjangnga.
26Daddi, Kemah Socce ban sakabbinna pakakas se eangguy e dhalem kabakteyan ta’ parlo epekol bi’ oreng Lewi pole."
27Adhasar ka papakonna Daud se dhi-budhi, sakabbinna oreng Lewi, mon la aomor dhu polo taon, kodu edhaftarragi kaangguy narema tugas.
28Reng-oreng Lewi jareya kodu abanto mam-imam toronanna Harun e dhalem ajalannagi kabakteyan e Padalemman Socce, meyara sakabbinna taneyan ban mar-kamar e Padalemman Socce jareya, sarta ajaga sopaja sabarang se la eatorragi malolo ka PANGERAN ta’ sampe’ epanajjis.
29Reng-oreng Lewi jareya kodu ngoros bagiyan reya: roti se eatorragi ka Allah, teppong se egabay tor-ator ka PANGERAN, jajan se tepes se ta’ eragi’i, kurban panggangan, ban teppong se ecampor ban mennya’ jaitun; kodu nembang ban naker tor-ator se egiba ka Padalemman Socce.
30Laen dhari jareya gi’ kodu anyanye amolja’agi PANGERAN sabban laggu ban sabban malem;
31bariya keya sabban badha kurban se eobbar kaangguy PANGERAN e are Sabat, e bakto paraya’an-paraya’an Bulan Anyar, ban e bakto paraya’an-paraya’an laenna. Parkara bannya’na oreng Lewi se kodu atugas to-sabakto, la badha atoranna dibi’ keya. Oreng Lewi kodu ngalakone tugas jareya salanjangnga.
32Reng-oreng Lewi jareya epassrae keya lalakon laen, iya areya meyara Kemah Socce ban Padalemman Socce ban abanto la-balana, iya areya para imam toronanna Harun, e dhalem ajalannagi kabakteyan e kennengngan jareya.
<< 1 Tawarikh 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel