1Rato Ahab kaagungan na’ poto e kottha Samaria bannya’na pettong polo oreng. Daddi Yehu ngerem sorat ka Samaria, ka para ballina na’ potona Ahab, ka sa-pangobasana kottha ban ka para pamimpinna masarakat. Monyena sorat jareya,
2"Ba’na se ngoros na’ potona Ahab, ba’na andhi’ kareta perrang, jaran, sanjata ban kottha se badha bintengnga. Daddi, saellana narema sorat reya,
3ba’na kodu duli mele settong se paleng becce’ dhari na’ potona Ahab, oreng jareya padaddi rato, ban ba’na kodu abilla rato jareya."
4Sa-pangobasana Samaria laju padha tako’. Oca’na, "Rato Yoram ban Rato Ahaziya sakale ta’ bisa alaban ka Yehu, ponapa pole sampeyan sareng kaula!"
5Daddi kapalana karaton ban walikota sarta para pamimpinna masarakat ban para ballina na’ potona Ahab ngerem kabar kantha reya ka Yehu, "Abdidalem sadaja atellok ka junandalem sareng alampa’agiya ponapa saos se epakonnagi junandalem. Namong abdidalem sadaja ta’ ngangkada pasera’a saos daddi rato. Ngereng ponapa kasokannepon junandalem."
6Yehu laju ngerem sorat pole ka reng-oreng jareya, monyena kantha reya, "Mon ba’na noro’a sengko’, sarta endha’ atoro’ ka tang parenta, pate’e na’ potona Ahab jareya, ban lagguna baja reya cethagga reng-oreng jareya giba ka sengko’ e Yizre’el." Na’ potona Ahab se pettong polo oreng jareya apolong ban pamimpinna masarakat e kottha Samaria, epeyara ban eparaja bi’ reng-oreng jareya.
7Saellana narema serradda Yehu, pamimpinna masarakat e kottha Samaria jareya mate’e na’ potona Ahab se pettong polo oreng jareya; cethagga laju padha epamaso’ ka budhak, pas ekeremmagi ka Yehu e Yizre’el.
8Saellana eatore oneng parkara jareya, Yehu laju makon sopaja thak-cethak jareya esoson epadaddi dhu tompo’an e labang sakethengnga kottha, sarta sopaja epanneng e jadhiya sampe’ kalagguwanna.
9Kalagguwanna gu-laggu Yehu kalowar ka labang saketheng jareya, pas adhabu ka reng-oreng se akompol e jadhiya, "Sengko’ se asakongkel ngamoso ban mate’e Rato Yoram; ba’na ta’ sala pa-apa. Tape reng-oreng reya banne sengko’ se mate’e.
10Areya buktena ja’ sabarang se edhabuwagi PANGERAN parkara na’ potona Ahab bakal kalakona. PANGERAN la alampa’agi pa-apa se edhabuwagi kalaban parantara’anna Eliya abdina."
11Saellana jareya Yehu mate’e la-balana Ahab se laen se badha e Yizre’el, bariya keya sakabbinna ponggaba, ca-kanca kenthella, ban mam-imamma; tadha’ karena settonga se gi’ odhi’.
12Yehu pas meyos dhari Yizre’el ka Samaria. E tengnga lorong, e kennengngan se anyama Bet-Eked se artena "Kampongnga Oreng Ngowan,"
13apanggi ban la-balana Ahaziya rato Yehuda. Yehu mareksane, "Ba’na reya sapa?" "Abdidalem la-balana Ahaziya," saodda reng-oreng jareya. "Badhi ka Yizre’el ka compo’na la-balana rato se gi’ odhi’ sareng na’ potona Rato Izebel."
14"Pega’ dhi-odhi’ reng-oreng reya!" dhabuna Yehu. Daddi reng-oreng jareya epega’, pas epate’e e seddi’na somor se la kerreng, bannya’na kabbi pa’ polo dhuwa’ oreng. Tadha’ karena settonga se gi’ odhi’.
15Yehu nerrossagi parjalananna. E tengnga jalan eamba’ bi’ Yonadab ana’na Rekhab. Yehu nyapa oreng jareya, dhabuna, "Atena ba’na ban sengko’ gu ta’ padha? Apa ba’na endha’ nolonge sengko’?" "Dalem," saodda Yonadab. "Mon bariya, mara asalaman," dhabuna Yehu. Se kadhuwa jareya asalaman, Yehu nolonge Yonadab ongga ka karetana,
16sambi adhabu, "Mara noro’, abassagi dibi’ saapa bajengnga sengko’ kaangguy PANGERAN." Yehu pas mangkat netene kareta ka Samaria asareng ban Yonadab.
17Sanapa’na ka jadhiya Yehu mate’e sakabbinna la-balana Ahab, epatadha’ karena settong balakka’. Kadaddiyan jareya cocok ban se edhabuwagi PANGERAN ka Eliya.
18Yehu makompol reng-oreng Samaria laju adhabu, "Rato Ahab korang barenteng se ngabdi ka Ba’al; sengko’ epabajengngana dhari Ahab.
19Daddi mara soro akompol dha’ enna’ kabbi bi-nabbina Ba’al ban reng-oreng se nyemba Ba’al sarta mam-imamma; ja’ sampe’ badha settonga se ta’ dhateng. Sengko’ ngatorragiya kurban se raja ka Ba’al. Sapa se ta’ hadir bi’ sengko’ eokoma mate." Tape jareya pera’ akkalla Yehu se mateyana sakabbinna oreng se nyemba Ba’al.
20Yehu adhabu kantha reya, "Tantowagi settong are se malolo kaangguy nyemba Ba’al!" Daddi reng-oreng laju nantowagi are jareya;
21bi’ Yehu eomommagi ka saantero Isra’il. E are jareya reng-oreng se nyemba Ba’al dhateng kabbi, tadha’ settong se nyeccer. Kabbi padha maso’ ka kowella Ba’al mossa’e geddhong jareya dhari adha’ sampe’ ka budhi.
22Yehu makon reng-oreng se ngoros pangangguyya kabakteyan magi guy-pangangguy jareya ka reng-oreng se dhateng nyemba’a Ba’al. Saellana papakon jareya ejalannagi,
23Yehu maso’ ka kowella Ba’al jareya asareng ban Yonadab ana’na Rekhab, pas adhabu ka reng-oreng se badha e jadhiya, "Mara pareksa patete apa reng-oreng se badha e dhinna’ reya pera’ reng-oreng se nyemba Ba’al malolo. Ja’ sampe’ badha oreng se nyemba PANGERAN e dhinna’ reya."
24Yehu ban Yonadab laju ngatorragi kurban ka Ba’al. E lowarra geddhong jareya Yehu la nyaba’ pangawal ban parwira ballung polo oreng bannya’na. Reng-oreng jareya eparenge dhabu kantha reya, "Ba’na kodu mate’e reng-oreng rowa kabbi. Mon sampe’ badha se buru, se maburu bi’ sengko’ epateyana!"
25Saellana ngatorragi kurban jareya Yehu duli kalowar, laju adhabu ka para pangawal ban ra-parwira jareya, "Mara maso’, pate’e oreng jarowa kabbi. Ja’ sampe’ badha se buru!" Para pangawal ban parwira jareya maso’ ngeba peddhang se eonos, laju mate’e reng-oreng jareya kabbi, mayyidda eeret kalowar kabbi. Saellana jareya reng-oreng jareya maso’ ka dhalem kowel,
26arcana Ba’al epakalowar laju eobbar.
27Arca jareya epamosna ban geddhongnga ban kennengngan jareya laju ekagabay kennengnganna oreng akopadhang sampe’ sateya.
28Kantha jareya carana Yehu mamosna panyemba’an ka Ba’al e Isra’il.
29Daddi PANGERAN adhabu ka Yehu, "Sabarang se eparenta’agi Sengko’ ka ba’na sopaja ejalannagiya ka toronanna Ahab bi’ ba’na la elakone kabbi. Daddi Sengko’ ajanji ka ba’na ja’ na’ potona ba’na sampe’ toronan se kapeng empa’ bakal daddiya rato Isra’il." Tape Yehu ta’ gu-onggu atoro’ ka hokomma PANGERAN, Allahna Isra’il. Yehu nero tengkana Yerobeyam se daddi lantaranna oreng Isra’il dusa ka PANGERAN kalaban nyemba sape emmas se epaddek Yehu e Betel ban Dan.
30(10:29)
31(10:29)
32E bakto jareya PANGERAN molae makene’ dhaera kakobasa’anna Isra’il. Hazael rato Siria arebbu’ sakabbinna dhaera Isra’il
33e temorra Songay Yordan sampe’ ka lao’ gan kottha Aroër e seddi’na Songay Arnon, tamaso’ dhaera Gileyad ban Basan, kennengnganna suku Gad, Ruben ban Manasye Temor.
34Careta laenna parkara Yehu, tamaso’ kapahlawananna, ecathet e dhalem ketab Sajarana To-rato Isra’il.
35Yehu jumenneng rato marenta Isra’il ballu lekor taon abidda. Saellana seda laju esareyagi e Samaria, sarta pas egante pottrana, Yowahas.
36(10:35)
<< 2 Raja-raja 10 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel