1Manasye yuswana gi’ buru dhubellas taon e bakto jumenneng rato Yehuda, sarta marenta e Yerusalim saeket lema’ taon abidda. Asmana ebuna Hefzibah.
2Manasye dusa ka PANGERAN, sabab nerowe sabarang kabiyasa’an jahadda sa-bangsa se eojuk PANGERAN dhari Kana’an e bakto oreng Isra’il maso’ ka nagara jareya.
3Kennengnganna panyemba’anna diba neng e man-dhimman se la epamosna bi’ Hizkiya, ramana, epaddek pole. Manasye maddek ba-mezba kaangguy nyemba Ba’al, sarta abadhi arcana Dewi Asyera, akantha se elampa’agi Ahab rato Isra’il. Laen dhari jareya Manasye gi’ nyemba ka tang-bintang.
4PANGERAN la adhabu ja’ Yerusalim kennengnganna kahadiranna ban kodu ekagabay kennengnganna oreng abakte ka Salerana tape e Padalemman Socce jareya Manasye maddek ba-mezba se eangguy nyemba ba-diba.
5E taneyan se dhadhuwa’ e Padalemman Socce jareya epaddek ba-mezba kaangguy nyemba tang-bintang.
6Pottrana ekagabay kurban obbaran. Laen dhari jareya Manasye gi’ alampa’agi sabarang lalakonna dhukon, nojum, elmo seher, ban menta petodu ka roh-erroh. Salerana ce’ dusana ka PANGERAN sampe’ PANGERAN duka.
7Lambangnga Dewi Asyera esaba’ e Padalemman Socce, mangkana parkara kennengngan jareya PANGERAN la adhabu ka Daud ban Sulaiman pottrana, "Tang padalemman ban kottha Yerusalim reya, se bi’ Sengko’ la epele dhari antarana dhaerana suku Isra’il se dhubellas, bi’ Sengko’ la etantowagi menangka kennengnganna oreng abakte ka Sengko’.
8Ban mon ommat Isra’il atoro’ ka sakabbinna Tang parenta sarta atoro’ ka kom-hokom se eajarragi bi’ Mosa Tang abdi, bi’ Sengko’ etolonga sopaja ta’ sampe’a eojuk dhari nagara se bi’ Sengko’ la ebagi ka bangatowana."
9Tape oreng Yehuda ta’ atoro’ ka dhabuna PANGERAN, ban Manasye la’-mala’ daddi lantaranna reng-oreng Yehuda jareya agabay sa-dusa se lebbi jahat dhari sa-dusana sa-bangsa se bi’ PANGERAN eojuk dhari Kana’an e bakto ommat Isra’il maso’ ka nagara jareya.
10Lantaran jareya kalaban parantara’anna para nabbi, di-abdina PANGERAN, PANGERAN adhabu,
11"Rato Manasye ce’ jahadda. Lalakonna ajahadan dhari lalakonna oreng Kana’an. La-brahala gabayanna daddi lantaranna oreng Yehuda alako dusa.
12Daddi Sengko’, PANGERAN, Allah se esemba oreng Isra’il, madhatengnga balai se ce’ rajana ka Yerusalim ban Yehuda, sampe’ sapa’a bai se ngedhing parkara jareya bakal takerjada.
13Yerusalim bi’ Sengko’ eokoma akantha Sengko’ se ngokom Samaria ban Ahab rato Isra’il sarta katoronanna. Yerusalim bi’ Sengko’ epaberseya tadha’ karena akantha pereng se ekorae ban epakorong.
14Karena pandhudhu’na bi’ Sengko’ edina’a me’ olle ekakan so-mosona se bakal arampasa sanjatana ban dhi’-andhi’na kabbi.
15Tang ommat jareya bi’ Sengko’ epakantha’a jareya lantaran dusana ka Sengko’ ban mapeggel Sengko’ molae dhari bangatowana kalowar dhari Messer sampe’ sateya reya."
16Manasye banne pera’ daddi lantaranna oreng Yehuda agabay dusa ka PANGERAN kalaban nyemba brahala, tape gi’ ngalakone kajahadan laenna iya areya mate’e oreng se ta’ andhi’ sala talebat bannya’na sampe’ dhara agili e man-dhimman e Yerusalim.
17Careta laenna parkara Rato Manasye ban sa-dusana, ecathet e dhalem ketab Sajarana To-rato Yehuda.
18Manasye seda laju esareyagi e kebbunna karaton, iya areya kebbun Uza, sarta pas egante Amon, pottrana.
19Yuswana Amon dhu lekor taon e bakto jumenneng rato Yehuda ban marenta e Yerusalim dhu taon abidda. Asmana ebuna Mesulemet pottrana Harus, oreng Yotba.
20Padha ban ramana, Amon dusa keya ka PANGERAN,
21nerowe pa-apa se elampa’agi ramana, sarta nyemba la-brahala se esemba ramana.
22Amon ta’ atoro’ ka kasokanna PANGERAN, la’-mala’ mongkore PANGERAN, Allah se esemba bangatowana.
23Ba-ponggabana Rato Amon asakongkel, Amon ekamoso laju epate’e e karaton.
24Tape reng-oreng se mate’e Amon jareya epate’e bi’ ra’yat Yehuda, se laju ngangkat Yosiya, pottrana Amon, epajumenneng rato.
25Careta laenna parkara Rato Amon ecathet e dhalem ketab Sajarana To-rato Yehuda.
26Amon esareyagi e pasareyan e kebbun Uza, sarta laju egante Yosiya, pottrana.
<< 2 Raja-raja 21 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel