1E taon se kapeng ballu bellas pamarenta’anna Yosafat rato Yehuda, Yoram pottrana Ahab jumenneng rato Isra’il ban marenta e Samaria dhubellas taon abidda.
2Yoram alampa’agi barang se juba’ menorot pangoladanna PANGERAN, tape kajuba’anna ta’ saapa mon ebandhing ban dusana oreng towana, iya areya Ahab ban Izebel. Arca se ebadhi ramana kaangguy nyemba Ba’al eparosak.
3Tape, akantha Rato Yerobeyam pottrana Nebat se marenta sabellunna, rato jareya keya daddi lantaranna oreng Isra’il alako dusa ban ta’ kasokan ambu se kantha jareya.
4Rato Mesa dhari Mo’ab kaagungan paternaganna dumba. Menangka pajek ka rato Isra’il, sabban taonna rato jareya ngatorragi budhu’na dumba saratos ebu ban buluna dumba se ekaolle dhari dumba lake’ saratos ebu.
5Tape sasedana Rato Ahab, Mesa aberonta’ ka Isra’il.
6Daddi Rato Yoram duli meyos dhari Samaria nyadhiya’agi angkadan perrangnga kabbi.
7Yoram ngerem pessen kantha reya ka Rato Yosafat dhari Yehuda, "Rato Mo’ab aberonta’ ka kaula; ponapa sampeyan kasokan nolonge kaula merrange bangsa gapaneka?" "Sae," saodda Rato Yosafat. "Kaula sareng baba’an kaula, jugan sareng pasukan jaran kaula ngerenga sampeyan.
8Se nyerranga lebada ka’imma?" "Mondhut jalan se lebat e ra-ara beddhi Edom," saodda Yoram.
9Daddi Rato Yoram laju mangkat abareng ban Rato Yehuda sarta Rato Edom. Saellana olle pettong are abidda e dhalem parjalanan, aeng sangona reng-oreng jareya tadha’, daddi pasukan jareya sarta ban-kebanna se ngangko’ rang-barangnga ta’ nemmo aeng se eenoma.
10"Palang!" dhabuna Rato Yoram. "PANGERAN la arancana’agi massra’agiya sampeyan sareng kaula sadaja ka rato Mo’ab!"
11Dhabuna Rato Yosafat, "Ponapa e ka’iya tadha’ nabbi se kengeng nolong sampeyan sareng kaula atanya ka PANGERAN?" Badha settong parwirana tantarana Rato Yoram se mator, "Badha, Elisa, pottrana Safat! Gi’ dhimen se aladine Eliya."
12"Lerres! PANGERAN pajat abu-dhabu kalaban parantara’anna oreng gapaneka," dhabuna Rato Yosafat. Daddi rato se katello jareya laju manggi’i Elisa.
13"Aponapa me’ nyo’on tolong ka abdidalem?" atorra Elisa ka rato Isra’il. "Nyo’on saos partolonganna bi-nabbina oreng seppoepon junandalem!" "Bunten!" saodda Yoram. "Sabab PANGERAN se arancana’agi massra’agiya kaula sareng kanca kaula se kadhuwa paneka ka rato Mo’ab."
14Atorra Elisa, "Bit asmaepon PANGERAN se odhi’, se eladine abdidalem, rang-terrangan saos, ja’ sakenga banne lantaran Rato Yosafat se ehormadi sareng abdidalem, abdidalem ta’ poron aorosan sareng junandalem.
15Samangken bakta ka ka’dhinto tokang nabbu calempong kasorang." Sabatara oreng jareya nabbu calempong, Elisa ekobasae Errohna PANGERAN,
16laju adhabu, "Kadi ka’dhinto dhabuna PANGERAN: ‘Kassa’ agabay sellogan e wadi se kerreng reya.
17Maske ba’na ta’ nangale’e ojan toron otaba angen dhateng, tape aeng e wadi jareya bakal wa’-ngalowa’a. Ba’na ban bin-ebinna sarta ban-kebanna se ngangko’ rang-barangnga bakal cokoba olle aeng se eenoma sampe’ tobuk.’"
18Nabbi Elisa laju adhabu pole, "Namong ka’dhinto coma parkara kene’ monggu ka PANGERAN. Junandalem sareng PANGERAN badhi eparengngana jugan kamennangan ka bangsa Mo’ab.
19Tha-kotthana se abinteng sareng se gus-bagus badhi ekobasa’ana junandalem; ka-bungkana wa’-buwa’anna badhi epogerra sadaja, ber-somberra aengnga badhi esompedda, gal-teggalla se dhu-landhu badhi egarujuga sareng bato kantos rosak sadaja."
20Kalagguwanna, e bakto ngatorragi kurban gu-laggu, laju badha aeng agili dhari Edom sampe’ wadi jareya padha possa’ aesse aeng.
21E bakto oreng Mo’ab ngedhing ja’ rato se katello jareya dhateng aloroga, sakabbinna oreng — dhari se paleng towa sampe’ ka se paleng ngodha — se bisa mekol sanjata, epamangkat ban esaba’ e batessa kottha.
22Kalagguwanna, e bakto jaga tedhung, are nyonare aeng sampe’ katon mera akantha dhara.
23Reng-oreng jareya padha aera’, "Dhara! Rit-parjuridda pasukanna moso se tatello’ rowa tanto padha atokar ban saleng pate’e sakanca’an! Mara ja’ entara arampok parkemahanna!"
24Tape sanapa’na ka parkemahan jareya, reng-oreng Mo’ab buru eserrang bi’ reng-oreng Isra’il sampe’ padha nyorot; bi’ reng-oreng Isra’il terros eserser sambi epate’e,
25tha-kotthana epagujur. Saneyap teggal se landhu se elebadi, egarujuk ban bato. Dhi-budhina gal-teggal padha tatotop ban bato kabbi. Ber-somberra aeng esompet, bungkana wa’-buwa’an epoger kabbi. Se gi’ paggun coma kottha Kir-Hareset, ibu kotthana Mo’ab. Dhi-budhina kottha jareya ekeppong keya sarta egarujuk ban bato bi’ kang-tokang omban.
26Saellana apangrasa ja’ ta’ kera bisa atahan pole, rato Mo’ab laju ngeba parjurit se penter ngangguy peddhang bannya’na pettong atos oreng, pas aehteyar narabas partahananna rato Edom, tape ta’ ahasel.
27Daddi rato jareya laju mondhut pottra lake’na se sareyang, egabay kurban ka dibana Mo’ab e attassa pagar alassa kottha. Reng-oreng Isra’il tako’, daddi pasukanna laju epanyorot dhari kottha jareya, pas abali ka nagarana.
<< 2 Raja-raja 3 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel