Alkitab Mobile SABDA
[VER] : [MADURA]     [PL]  [PB] 
 <<  2 Raja-raja 5 >> 

1Na’aman reya panglimana angkadan perrangnga Siria se talebat ekataresnae ban ehormadi bi’ rato Siria, sabab kalaban parantara’anna Na’aman PANGERAN apareng kamennangan ka tantara Siria. Na’aman reya panglima se parjuga, tape nyandhang panyaket kole’ budhuk.

2E settong bakto Siria alorok Isra’il. E dhalem paperrangan jareya badha na’-kana’ bine’ Isra’il se ekenneng tangkep egiba egabay tawanan, sarta pas epadaddi pangladinna rajina Na’aman.

3E settong are kana’ jareya ngoca’ ka lora bine’na, "Din aju, ja’ sakenga guste nyabis ka nabbi se alenggi e Samaria, tanto sareng nabbi gapaneka guste epabaras."

4E bakto meyarsa parkara jareya, Na’aman laju ngadhep ka rato pas notorragi oca’na kana’ bine’ jareya.

5Dhabuna rato, "Iya, kassa’ ba’na entar ka rato Isra’il; bi’ sengko’ epagiba’ana sorat." Na’aman laju mangkat abakta tello polo ebu pesse salaka, nem ebu pesse emmas, ban sapolo settel kalambi se gus-bagus.

6Monyena sorat gella’ kantha reya, "Kalaban sorat paneka kaula ngennallagiya parwira kaula ka sampeyan, nyamaepon Na’aman. Nyo’ona tolong panyakedda pabarassagi."

7E bakto rato Isra’il maos sorat jareya, rasoganna laju ebit-sebbit polana tako’, sambi adhabu, "Palang! Arapa rato Siria me’ nyoro sengko’ mabaras panyakedda oreng reya? Sengko’ banne Allah se kobasa maodhi’ otaba mamate oreng! Tantona rato Siria reya coma nyare marga ka sengko’!"

8Nabbi Elisa meyarsa parkara jareya, pas apessennan ka rato Isra’il, "Aponapa junandalem me’ tako’? Pakon manggi’i abdidalem oreng gapaneka, me’ olle oneng ja’ e Isra’il badha nabbi!"

9Daddi Na’aman mangkat ka kalenggiyanna Elisa, pas ambu e adha’na labangnga.

10Elisa makon sarengnga abala kantha reya ka Na’aman, "Panjennengngan eatore aseram pettong kale e Songay Yordan, dhaggi’ tanto pas sae panyakettepon."

11Meyarsa jareya, Na’aman duka pas adhabu kantha reya, "Ca’na sengko’ Elisa jareya kalowara dibi’ nemmone sengko’, pas adu’a ka PANGERAN, Allahna, sarta maguli astana e attassa bagiyanna tang badan se sake’ daddi sengko’ pas baras.

12Songay Abana ban Songay Parpar e Damsyik abagusan dhari songay se kemma’a bai e Isra’il! Sengko’ bisa mandhi e dhissa’ pas baras!"

13Tape la-kabulana nyemma’e Na’aman pas ngoca’, "Guste, ompamaepon panjennengngan epakon alampa’agi barang se malarat, tanto sareng panjennengngan elampa’agi. Ponapa pole Elisa namong makon panjennengngan aseram e songay me’ olle baras!"

14Daddi Na’aman pas meyos ka Songay Yordan, laju acabbur nyellem ka songay jareya pettong kale akantha se edhabuwagi Elisa. Panyakedda pas baras. Badanna baras pole akantha oreng ngodha.

15Saellana jareya Na’aman ban para pangerengnga abali ka kalenggiyanna Elisa. Dhabuna Na’aman ka Elisa, "Samangken kaula oneng ja’ e dunnya paneka namong badha settong Allah, enggi paneka Allah se esemba oreng Isra’il. Daddi, kasokana panjennengngan narema tor-ator kaula paneka."

16Dhabuna Elisa, "Bit asmaepon PANGERAN se odhi’ se eladine abdina, abdina ta’ narema’a tor-ator ponapa’a saos." Na’aman maksa sopaja Elisa kasokana narema tor-atorra, tape Elisa paggun nolak.

17Na’aman pas adhabu, "Manabi panjennengngan ta’ kasokan narema tor-ator kaula, kaula nyo’ona edi abakta’a paleman tana se bannya’na kengeng eangko’ sareng sapasang jaran buwadan. Sabab, molae samangken kaula ngatorragiya kurban namong ka PANGERAN, banne ka la’-alla’an laenna.

18Manabi kaula kodu ngereng rato asalat ka kowella Rimon dibana Siria, moga-moga saos PANGERAN kasokana apareng sapora ka kaula."

19Dhabuna Elisa, "Moga-moga panjennengngan eparengngana salamet!" Na’aman pas mangkat dhari jadhiya. Ta’ saapa abidda saellana Na’aman mangkat,

20Gehazi, barengnga Elisa, apekker kantha reya, "Arapa Na’aman rowa me’ epamole ta’ epamajar sakone’a balakka’? Masthena tang lora narema tor-atorra oreng Siria rowa. Bit asmana PANGERAN se odhi’, sengko’ kodu nyerser oreng rowa ban kodu narema apa’a bai dhari oreng jareya."

21Daddi Gehazi laju nyerser Na’aman. E bakto Na’aman ngoladi badha oreng se nyerser, pas toron dhari karetana laju adhabu, "Badha apa?"

22Saodda Gehazi, "Ta’ langkong guste, abdina epakon mator ka panjennengngan ja’ gi’ buru ka’dhinto badha nabbi kadhuwa rabu dhari Pagunongan Efraim. Lora abdina nyo’ona pesse salaka tello ebu dhari panjennengngan sareng rasogan dhu settel se bagus eparengngagiya ka se kadhuwa gapaneka."

23"Reya’, mara," dhabuna Na’aman, Gehazi epaksa esoro ngeba pesse salaka nem ebu. Pesse jareya bi’ Na’aman ebundu’ ebaddhai kanthong dhadhuwa’, saellana jareya Na’aman pas mondhut kalambi se gus-bagus dhu settel. Jareya kabbi epakon giba ka sarengnga kadhuwa, sareng se kadhuwa jareya epakon mangkat kaadha’ ajangadha’i Gehazi.

24Sanapa’na ka gunong kalenggiyanna Elisa, Gehazi nampane pesse ban kalambi jareya dhari sarengnga Na’aman se kadhuwa, pas esempen e bengkona dibi’. Sarengnga Na’aman se kadhuwa rowa laju esoro mole.

25Gehazi pas maso’ ka dhalem bengkona. Dhabuna Elisa, "Ba’na dhari dhimma?" "Abdina ta’ ajalanan," saodda.

26Tape Elisa adhabu, "E bakto Na’aman toron dhari karetana nemmonana ba’na tang ate badha e jadhiya keya. Sateya reya gi’ banne baktona narema pesse polana melleya kebbun jaitun, kebbun anggur, dumba ban sape ban nor-dunor!

27Sarrena ba’na narema ri’-berri’ jareya, ba’na bakal narema’a keya panyakedda Na’aman. La’-mala’ salanjangnga odhi’na ba’na ban na’ potona bakal nyandhanga panyaket jareya!" E bakto Gehazi kalowar dhari jadhiya, kole’na la ekenneng panyaket jareya — kole’na laju ce’ potena.



 <<  2 Raja-raja 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel