1E settong are bi-nabbi se eburuk Elisa, aserrowan ka Elisa kantha reya, "Kennengngan e ka’dhinto ce’ cope’na!
2Kaula sakanca nyo’ona edi mogerra kajuwan e seddi’na Songay Yordan, epamaddegga compo’ e ka’dhissa’." "Iya, kassa’," saodda Elisa.
3Badha settong e antarana bi-nabbi jareya se maksa sopaja Elisa meyos keya. Elisa kasokan,
4daddi kabbi pas padha mangkat areng-bareng. Sanapa’na ka penggirra Songay Yordan, reng-oreng jareya molae moger kajuwan.
5O-tao kapagga sala settong e antarana reng-oreng jareya gaggar ka aeng. "Adhu, pa’," cerrengnga oreng jareya ka Elisa, "Ka’dhissa’ kapak enjaman!"
6"E dhimma pagaggarra?" dhabuna Elisa. Oreng jareya noduwagi kennengnganna, Elisa pas ngetthok kaju; thok-ketthoganna kaju jareya eontallagi ka kennengngan gella’. Kapak se gaggar gella’ pas mo’dul ka attassa aeng.
7Dhabuna Elisa, "Kala’!" Oreng jareya mangaceng tanangnga pas ngala’ kapak buru.
8E settong bakto Siria aperrang ban Isra’il. Saellana aparembagan ban para parwirana, rato Siria nantowagi neng e dhimma se maddegga kemah.
9Tape Elisa ngerem kabar ka rato Isra’il maenga’ sopaja ta’ meyos ka kennengngan jareya, sabab reng-oreng Siria ngaddhang e jalan jareya.
10Daddi rato Isra’il maemot reng-oreng se abengko ma’-semma’ e jadhiya sopaja aya-sadhiya. Daddi Elisa la pan-barampan kale maemot rato.
11Rato Siria ce’ dukana polana jareya, daddi para parwirana pas edikane sarta etanyae kantha reya, "Tanto e antarana ba’na badha se akiyanat ka sengko’. Se kemma orengnga? Mara kabala!"
12Badha settong parwira se nyaot, "Bunten, tadha’, guste. Se daddi sababba enggi ka’dhinto Nabbi Elisa se manapa’ ka rato Isra’il pa-ponapa se edhabuwagi junandalem, sanare junandalem adhabu e kamar pasareyan."
13"Sare e dhimma kennengnganna," dhabuna rato, "bi’ sengko’ etangkebba." Badha oreng se areppot ja’ Elisa badha e Dotan.
14Rato Siria pas ngerem pasukan se raja ka jadhiya etoro’e ran-jaran ban ta-kareta perrang. Pasukan jareya napa’ ka jadhiya e bakto malem; kottha jareya pas ekeppong.
15Kalagguwanna gi’ petteng, e bakto sarengnga Elisa ngedhing sarta kalowar, laju nangale’e tantara Siria ngeppong kottha jareya, genna’ ban jaran sarta kareta perrangnga. Daddi oreng jareya abali ka Elisa, pas ngoca’, "Palang, guste! Kadi ponapa ka’dhinto?"
16"Ella, ta’ osa tako’," saodda Elisa. "Se nolonge ba’na ban sengko’ abannya’an dhari se nolonge oreng Siria."
17Elisa pas adu’a ka Pangeran, "GUSTE, moga Junandalem kasokana mokka’ tengallepon sarengnga abdidalem me’ olle nengale!" PANGERAN ngabbullagi parnyo’onanna Elisa, daddi e bakto sarengnga Elisa jareya nyongngo’, nangale’e e gunong jareya possa’ ban jaran sarta kareta se kalowar apoy e sakalenglengnga Elisa.
18E bakto reng-oreng Siria nyerrang, Elisa adu’a, "GUSTE, kasokana Junandalem mabuta reng-oreng ka’dhinto!" Parnyo’onanna Elisa jareya bi’ PANGERAN ekabbuli, reng-oreng jareya laju buta kabbi.
19Elisa nyander ka reng-oreng jareya pas adhabu, "Ba’na posang. Areya banne kottha se esare ba’na. Mara noro’ sengko’, bi’ sengko’ ba’na eaterragiya ka oreng se esare ba’na." Elisa laju ngaterragi reng-oreng jareya ka Samaria.
20E bakto reng-oreng jareya maso’ ka kottha jareya, Elisa adu’a, "GUSTE, kasokana Junandalem mokka’ matana reng-oreng ka’dhinto me’ olle padha nengale." Parnyo’onanna Elisa jareya ekabbuli bi’ PANGERAN; reng-oreng jareya ebukka’ matana daddi laju padha nangale sarta padha heran polana aba’na padha badha e kottha Samaria.
21E bakto ngoladi reng-oreng Siria jareya, rato Isra’il adhabu, "Elisa, ponapa kaula kodu mate’e reng-oreng paneka sadajana?"
22"Ampon," saodda Elisa. "Tantara se etangkep e dhalem paperrangan saos sareng junandalem ta’ epate’e, ponapa pole ka’dhinto. Parenge neddha sareng ngenom, pas pakon paleman ka ratona."
23Rato Isra’il pas mabadha pesta raja kaangguy reng-oreng jareya saellana reng-oreng jareya la mare ngakan ban ngenom, bi’ rato Isra’il laju epakon mole ka rato Siria. Molae dhari jareya oreng Siria ta’ nyerrang nagara Isra’il pole.
24Ta’ abit saellana jareya Benhadad rato Siria abakta tantarana kabbi epanyerranga Isra’il. Kottha Samaria ekeppong,
25sampe’ reng-oreng e kottha jareya kalaparan ce’ sarana, argana cethagga hemar sampe’ ballung polo pesse salaka ban tamanco’na dara dhu on lema’ pesse salaka.
26E settong are e bakto rato Isra’il teppa’na alomampa e attassa pagar alassa kottha, badha oreng babine’ aera’, "Guste, tolong!"
27Saodda rato jareya, "Mon PANGERAN ta’ kasokan nolong ba’na, baramma sengko’ se bisa’a nolong? Sengko’ ta’ andhi’ gandum otabana aeng anggur!
28Arapa ba’na jareya?" Ca’na babine’ jareya, "Kanca abdidalem ka’dhinto ngajak abdidalem neddha ana’ abdidalem dhimen ekadhuwai, lagguna ana’epon se eteddha’a ekadhuwa’ana.
29Daddi ana’ abdidalem eola sareng eteddha ekadhuwai. Kalagguwanna e bakto abdidalem nyo’on sopaja ana’na eola pas eteddha ekadhuwai sareng abdidalem, ana’na laju eerrep!"
30Meyarsa careta jareya, rato laju nyebbit rasoganna polana sossa. Reng-oreng se manjeng e seddi’na pagar alassa kottha jareya padha nangale’e ja’ rasogan dhalem se eagem rato jareya karong.
31Rato adhabu epakaja, "Are teya keya Elisa kodu mate. Mandar sengko’ eparengngana okoman se paleng berra’ bi’ Allah mon Elisa ta’ epate’e bi’ sengko’!"
32Rato laju ngotos oreng mangkat kaadha’ ka compo’na Elisa. E bakto jareya Elisa badha e compo’na, e jadhiya teppa’na badha tamoy, iya areya para pamimpinna masarakat. Sabellunna otosanna rato jareya napa’ ka jadhiya, Elisa adhabu ka para pamimpinna masarakat jareya, "Abassagi, ra! Tokang mate’e oreng rowa nyoro oreng dha’ enna’ epamateyana sengko’. Mon oreng jareya la napa’ dhaggi’, labangnga kanceng ja’ bagi maso’. Rato dibi’ bakal dhatengnga jang budhiyan."
33Elisa gi’ ta’ mare se abu-dhabu, rato la napa’ ka jadhiya pas adhabu, "Kasossa’an paneka dhari PANGERAN asalla! Daddi ponapa gunana ngarebba partolonganna?"
<< 2 Raja-raja 6 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel