1Saodda Elisa, "Ngereng peyarsa’agi ponapa dhabuna PANGERAN! Lagguepon, ra-kera baja mangken, kalaban settong pesse salaka saos oreng bisa ngobange gandum se paleng sae tello kilo otabana gandum macem laennepon nem kilo."
2Ajudan pribadhina rato nyaot, "Ka’amma se bisa’a! Ta’ kera, maske samangken jugan PANGERAN matorona ojan derres dhari langnge’." "Abassagi bai dhaggi’, tape ba’na ta’ kera noro’ nyepcep kakanan jareya maske sakone’a," saodda Elisa.
3E are jareya badha lalake’ kaempa padha nyandhang panyaket kole’ budhuk; reng-oreng jareya badha e lowarra labang sakethengnga Samaria, laju padha saleng ngoca’ kantha reya, "Arapa’a ju’-toju’ e dhinna’ anante’ pate?
4Mon sengko’ ban ba’na maso’ ka kottha, tanto mate kalaparan; mon paggun neng e dhinna’, tanto gi’ mate keya. Mara ja’ entara ka parkemahanna oreng Siria bai. Paleng e dhissa’ epate’e. Tape olle daddi keya ta’ epama-baramma."
5Saellana are molae petteng reng-oreng jareya laju entar ka parkemahanna oreng Siria, tape e jadhiya etemmo tadha’ oreng settonga balakka’.
6Sabab bi’ PANGERAN oreng Siria epangedhing katon badha monyena serranganna pasukan raja se nompa’ jaran ban nompa’ kareta. Oreng Siria ngera rato Isra’il nyewa rato Het ban rato Messer ban tantarana epanyerrang bangsa Siria.
7Daddi e malem jareya keya oreng Siria padha buru nyare salamet, kemahna edina’agi, bariya keya jaran ban hemarra kabbi edina e parkemahanna.
8Oreng kaempa se nyandhang panyaket kole’ budhuk gella’ napa’ ka penggirra parkemahan jareya, pas maso’ ka settong kemah. Reng-oreng jareya ngakan ban ngenom, ngala’ emmas, salaka ban bi-kalambi, pas eerrep. Saellana jareya pas abali pole maso’ ka kemah laenna, pas ngalakone akantha se jang adha’an.
9Reng-oreng jareya padha saleng ngoca’, "Lalakon reya ta’ becce’. Kabar reya kabar becce’, masthena ekabala ka se laen. Mon sengko’ ban ba’na anante’ sampe’ lagguna, tanto eokom. Mara areppot sateya bai ka karaton."
10Daddi reng-oreng jareya abali ka Samaria pas aera’ ka panjagana labang sakethengnga kottha, "Kaula sakanca buru entar ka parkemahanna oreng Siria, e ka’issa’ tadha’ orengnga sakale. Jaran sareng hemarra gi’ padha epangger e kennengnganna, sadajana kemah edinggallagi."
11Para pangawal aera’ manapa’ kabar jareya, bi’ oreng laenna pas epaterros sampe’ ka karaton.
12E bakto jareya gi’ malem, tape rato kalowar dhari kamar pasareyanna pas adhabu ka ba-ponggabana, "Edhingngagi! Sengko’ tao apa maksodda reng-oreng Siria rowa! Oreng Siria tao ja’ tang bangsa padha kalaparan, daddi padha adina’agi parkemahanna terros ngetek e lon-talon mancenga sengko’ ban ba’na sopaja kalowar nyare kakanan. Mon sengko’ ban ba’na la kalowar tanto kabbi pas padha epega’, dineng kottha reya tanto pas edhudhugi."
13Badha ponggabana rato se mator, "Guste, abdidalem sadaja se gi’ badha e kottha ka’dhinto padha saos sareng reng-oreng se ampon adinggal omor. Daddi saena junandalem makon oreng ka ka’dhissa’. Pakon netene jaran, meleyagi e antarana ran-jaran se gi’ badha, pakon nalektegi ba’ badha ponapa salerressepon e ka’dhissa’."
14Daddi rato jareya pas mele pan-barampan oreng, reng-oreng jareya bi’ rato epakon nompa’ kareta perrang dhadhuwa’ pas epakon nalektegi arapa sanyatana tantara Siria jareya.
15Otosan jareya napa’ ka Songay Yordan. E salanjangnga lorong reng-oreng jareya nangale’e bi-kalambi ban kas-pakakas car-kalacer. Jareya kabbi eontallagi ban-saromban bi’ oreng Siria e baktona buru. Para otosan jareya abali areppot ka rato.
16Daddi pandhudhu’ Samaria padha berka’ kalowar kottha ajara parkemahanna oreng Siria. Cocok ban se edhabuwagi PANGERAN, kalakon onggu badha gandum se paleng bagus tello kilo, otabana gandum macem laenna nem kilo, argana coma settong pesse salaka.
17Kabendherran e bakto jareya ajudan pribadhina rato ajaga labang sakethengnga kottha. E jadhiya laju mate enyek-enyek ra’yat. Parkara jareya cocok ban se edhabuwagi Elisa ka rato e bakto rato manggi’i salerana.
18Elisa adhabu ja’ kalagguwanna ra-kera baja jareya tello kilo gandum se paleng bagus otabana nem kilo gandum macem laenna e Samaria bakal ejuwala argana coma settong pesse salaka.
19Ban e bakto jareya ajudan pribadhina rato jareya ngoca’, "Ka’amma se bisa’a! Ta’ kera, maske samangken jugan PANGERAN matorona ojan derres dhari langnge’!" Elisa pas nyaot, "Abassagi bai dhaggi’! Tape ba’na ta’ kera noro’ nyepcep kakanan jareya maske sakone’a."
20Daddi la kalakon ka oreng jareya — aba’na mate ecapo’ nyek-enyek ra’yat e labang saketheng.
<< 2 Raja-raja 7 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel