1Absalom pottrana Daud kaagungan ale’ babine’ se raddin, asmana Tamar. Amnon pottrana Daud dhari rajina se laen, kapencot atena
2sarta terro apolonga tedhung ka Tamar jareya. Pangaterrona ka Tamar talebat rajana sampe’ Amnon jareya songkan, lantaran ta’ kera bisa se ngaandhi’a Tamar. Sarrena gi’ paraban, Tamar ta’ olle atemmo ban lalake’.
3Tape Amnon kaagungan kanca se talebat salenter, asmana Yonadab pottrana kaka’na Daud se anyama Simeya.
4Yonadab mator ka Amnon, "Panjennengngan pottrana rato, namong sabban are abdina nengale panjennengngan katon sossa. Badha ponapa?" Saodda Amnon, "Sengko’ terro ka Tamar, ale’na Absalom tang taretan rowa."
5Atorra Yonadab, "Gampang! Ngereng panjennengngan marobbu e ranjang, kanmasongkan. Manabi ramana panjennengngan rabu ngoladi panjennengngan, mator sapaneka, ‘Rama, Tamar pakonnagi ka ka’dhinto, pona, kaula me’ olle eparenge neddha. Manabi kaula nengale Tamar se aola teddha’an gapaneka, sareng se nyadhiya’agi ka kaula, kaula poron neddha.’"
6Amnon laju ke’-masake’ e katedhunganna. E bakto Rato Daud rabu ngoladana pottrana jareya, Amnon mator, "Rama, Tamar pakonnagi ka ka’dhinto, pona, pakon, aola’agi jajan e ka’dhinto; dhaggi’ manabi Tamar se ngangka’agi, kaula neddha’a."
7Daud laju makon oreng ka karaton epakon manapa’ pessen ka Tamar kantha reya, "Kassa’ ba’na entar ka bengkona kaka’na Amnon, pas la’-ola’agi e dhissa’."
8Tamar pas meyos ka compo’na kaka’na. E jadhiya Amnon etemmo ren-sarenan e ranjangnga. Tamar mondhut adun sakone’, laju ekagabay jajan e adha’anna Amnon, terros epanggang.
9Saellana jareya jajanna epakalowar dhari pancina laju eangka’agi. Tape Amnon ta’ kasokan adha’ar. Dhabuna, "Soro kalowar kabbi reng-oreng jareya."
10Saellana reng-oreng jareya kalowar kabbi, Amnon adhabu ka Tamar, "Giba’agi dha’ enna’ jajan jareya, dulangngagi ka sengko’!" Tamar atoro’ ka dhabuna Amnon jareya.
11Tape e bakto Tamar adulangngagiya jajan jareya, bi’ Amnon laju eteggu’ sambi adhabu, "Le’, mara tedhung ban sengko’!"
12"Adhu, ampon ka’!" saodda paraban jareya. "Kaula ja’ paksa alako cemmer kantha paneka! Ta’ oneng badha oreng alako sapaneka e Isra’il.
13Manabi kantos kadaddiyan sapaneka, eerrebba ka’ amma mowa kaula paneka? Ban pole, sampeyan tanto eya-seya jugan sareng oreng Isra’il. Rembak saos sareng rato, tanto sampeyan eedine araji kaula."
14Tape Amnon ta’ kasokan meyarsa’agi, ban sarrena badanna akowadan, ale’na jareya epaksa, laju erosak kaparabananna.
15Tape saellana jareya Amnon laju ce’ baji’na ka Tamar; kabaji’anna sateya araja’an dhari pangaleburra sabellunna. Daddi laju adhabu ka ale’na jareya, "Mara, ondur!"
16Saodda Tamar, "Ba, aponapa me’ sapaneka ka’? Mon sampeyan nondhung kaula, kajahadanna sampeyan araja’an dhari se elakone sampeyan gi’ buru paneka!" Tape Amnon ta’ kasokan meyarsa’agi,
17sarta laju ngolok pangladin pribadhina, dhabuna, "Pakalowar babine’ reya, labangnga pas konci!"
18Pangladinna jareya ajalannagi papakonna. Tamar e bakto jareya ngagem kalambi korong se lanjang lengngenna. E jaman jareya babine’an se gi’ ta’ alake biyasana ngangguy kalambi kantha jareya.
19Tamar laju mondhut abu eburburragi ka serana, rasoganna esebbit, sarta laju ondur dhari jadhiya, raena etotobi ban astana se dhadhuwa’ sambi molar ce’ ngennessa.
20E bakto Absalom ngoladi se kantha jareya laju mareksane, "Apa Amnon gella’ arosak kaparabananna ba’na? Ella, le’, dina, la ja’ pekkere pole. Amnon jareya gu ta’ kaka’na ba’na dibi’, daddi ja’ kabala ka pa-sapa." Tamar laju neng e compo’na Absalom, ta’ apolong ban oreng, panggaliyanna ce’ ngennessa sarta arassa seppe.
21Rato Daud meyarsa parkara jareya, laju ce’ dukana.
22Absalom talebat sake’ ate ka Amnon ban ta’ kasokan pole abu-dhabu ban kaka’na jareya polana kaka’na jareya la arosak kaparabananna Tamar ale’na.
23Saellana olle dhu taon dhari jareya Absalom mabadha paraya’an ketthoganna buluna dumbana e Ba’al-Hazor, e seddi’anna kottha Efraim; tra-pottrana rato padha eonjang kabbi.
24Absalom ngadhep ka Rato Daud laju mator, "Rama, abdidalem mabadha’a paraya’an ketthoganna buluna dumba. Junandalem eatore rabu asareng para kaom oreng agung karaton."
25Tape rato adhabu, "Ella, na’, sabab mon sengko’ ban om-kaom oreng agung karaton padha dhateng dhaggi’ pera’ marepot ka ba’na." Absalom terros maksa, tape ramana teptep ta’ kasokan rabu. Absalom laju epakon mangkat, dineng rato coma apareng edi.
26Absalom pas mator, "Enggi ampon, namong sakone’na ka’ Amnon saos pakon meyos." Dhabuna rato, "Ella, Amnon ta’ osa soro dhateng."
27Tape sarrena Absalom maksa terros, dhi-budhina Daud ngedine Amnon ban tra-pottrana se laen noro’ Absalom. [Absalom nyadhiya'agi ka'-angka' se man-nyaman],
28sarta adhabu ka para abdina, "Edhingngagi pateppa’, mon Amnon la mabu’ ban anggur, sengko’ aberri’a tandha parenta, pas pate’e oreng jareya. Ta’ osa tako’, jareya orosanna sengko’. Ba’na pabangal ban ta’ osa mangmang!"
29Para abdi jareya ajalannagi papakonna Absalom, Amnon epate’e. E bakto ngoladi jareya, tra-pottrana Daud se laen padha netene jaranna, laju padha buru.
30Sabatara tra-pottrana jareya gi’ badha e dhalem parjalanan, badha se areppot ka Daud, "Tra-pottrana junandalem epate’e sadaja sareng Absalom — tadha’ karena settonga!"
31Rato ngadek, nyebbit rasoganna lantaran sossa, sarta laju marobbu e palesteran. Ba-ponggabana se badha e jadhiya padha nyebbit kalambina bang-sebang.
32Tape Yonadab pottrana Simeya kaka’na Daud mator, "Guste, bunten ta’ sadajana pottrana junandalem se epate’e. Namong Amnon se seda, sabab ampon terrang ka junandalem ja’ Absalom pajat mateyana Amnon lantaran arosak kaparabananna Tamar, ale’epon.
33Daddi junandalem ja’ parcaja ka kabar se nerrangngagi ja’ pottrana junandalem ampon seda sadaja, sabab se seda namong Amnon."
34Sabatara jareya Absalom la buru. Panjagana karatonna Daud nangale’e bannya’ oreng toron dhari gunong dhari Horona’im. Parjurit se ajaga karaton jareya areppot ka rato.
35Yonadab laju mator ka Daud, "Ka’dhissa’ tra-pottrana junandalem, guste! Lerres akadi pamator abdidalem gella’."
36Gi’ buru mare se mator kantha jareya, tra-pottrana Daud maso’. Kabbi padha molar, Daud molar keya ce’ ngennessa bariya keya ba-ponggabana.
37Absalom buru ka karatonna rato nagara Gesur, iya areya Talmai pottrana Amihur, pas alenggi e jadhiya tello taon abidda. Daud sampe’ abit se ros-terrosan noduwagi kasossa’anna lantaran sedana Amnon,
38(13:37)
39tape saellana sossana la elang, laju ce’ kerrongnga ka Absalom.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel