Alkitab Mobile SABDA
[VER] : [MADURA]     [PL]  [PB] 
 <<  2 Samuel 17 >> 

1Ta’ abit saellana jareya, Ahitofel mator pole ka Absalom, "Abdidalem nyo’ona edi meleya oreng dhubellas ebu. Dhaggi’ lem-malem abdidalem mangkada nyerserra Daud.

2Sareng abdidalem eserranga e baktona Daud lesso sareng ta’ gadhuwan samangat. Sareng abdidalem epatakerjada, daddi sadaja pangerengngepon ta’ kera sempat buru. Namong Rato Daud se epateyana sareng abdidalem.

3Namong sadajana pangerengngepon sareng abdidalem epabaliya ka junandalem kadi pangantan bine’ se abali ka lakena. Se daddi kasokanna junandalem gu ta’ namong nyabana oreng kasorang saos, ta’ enggi? Daddi se laen diggal saos, panneng."

4Petodu jareya bi’ Absalom eanggep becce’, bariya keya panemmona para pamimpin Isra’il.

5Sanajjan kantha jareya, Absalom adhabu, "Kodda’ Husai olok gallu sateya, mara tenggu baramma panemmona."

6E bakto Husai napa’ ka jadhiya, bi’ Absalom eparenge oneng baramma rancanana Ahitofel; samarena jareya Absalom pas adhabu, "Baramma, apa petoduna Ahitofel jareya etoro’a? Mon enja’, baramma panemmona ba’na?"

7Saodda Husai, "Petoduepon Ahitofel ka’dhinto ta’ sae.

8Junandalem tanto ngagali ja’ Daud sareng tantaraepon tamaso’ parjurit se talebat bangalan. Galagga akadi baruwang bine’ se kaelangan budhu’epon. Laen dhari ka’dhinto Daud ka’dhinto parjurit se bannya’ pangalamanna e dhalem perrang sarengngan ta’ oneng asaren apolong sareng tantarana.

9Olle daddi samangken ka’dhinto Daud kalerressan ngetek e dhalem settong guwa otaba kennengngan laen. Daddi, saompama tantaraepon junandalem eserrang Daud, pas badha se mate, pasera’a saos se mereng parkara ka’dhinto tanto padha ngoca’ ja’ tantaraepon junandalem epakala sareng Daud.

10Manabi kadi ka’dhinto sanare oreng se ce’ bangalanna akadi macan sakale, tanto pas kercet atena. Sabab sadajana oreng Isra’il oneng ja’ ramaepon junandalem ka’dhinto pahlawan, sarengngan tantaraepon kaetong parjurit se bangalan sadaja.

11Menorot pamanggi abdidalem kadi ka’dhinto saos: Sadajaepon oreng Isra’il sanagara ka’dhinto pakon akompol, kantos bannya’epon padha sareng beddhi e paseser. Saamponna ka’dhinto, junandalem dibi’ se ngapalae reng-oreng Isra’il gapaneka entar aperrang.

12Daud tanto epanggi e kennengnganna, manabi ampon epanggi pas serrang sabellunnepon Daud ngagali ja’ badha moso. Daud sareng tantaraepon ta’ kera badha se bisa’a lolos.

13Manabi Daud buru ka settong kottha, sadajana ra’yat Isra’il tanto ngala’ tale, pas ngeret kottha gapaneka ka cora se paleng semma’. Ta’ kera badha bato settonga balakka’ se gi’ ceccer e attassa gumo’epon."

14Saellana meyarsa petodu jareya, Absalom adhabu, "Panemmona Husai ateppa’an dhari panemmona Ahitofel." Panemmona oreng Isra’il laenna kantha jareya keya. Pajat iya, PANGERAN la nantowagi petoduna Ahitofel jareya epabuddhuwa, me’ olle Absalom calaka’.

15Saellana jareya Husai abala ka Imam Zadok ban Imam Abyatar parkara petoduna Ahitofel ban petoduna dibi’ ka Absalom ban ka para pamimpin Isra’il.

16Ca’na Husai, "Duliyan! Daud atore oneng sopaja ja’ kelem e palengka’anna songay e ra-ara ka’issa’. Atore oneng sopaja duliya alengka ka temorra Songay Yordan. Manabi bunten tanto Daud sareng pasukanna epaancor sadaja."

17Sabatara jareya Yonatan pottrana Abyatar ban Ahima’as pottrana Zadok teppa’na anante’ e seddi’anna somber En-Rogel, e penggirra kottha Yerusalim. Se kadhuwa jareya ta’ bangal maso’ ka dhalem kottha, tako’ etangale’e oreng. Biyasana badha dunor babine’ se ngeba kabar ka se kadhuwa jareya, iya areya kabar se kodu epanapa’ ka Rato Daud.

18Tape e bakto jareya badha na’-kana’ lake’ kasorang kabendherran nangale’e reng-oreng jareya; na’-kana’ jareya areppot ka Absalom. Daddi se kadhuwa jareya duli buru, ngetek e bengkona oreng e disa Bahurim. E seddi’anna bengkona oreng jareya badha somorra. Oreng se kadhuwa buru pas ngetek ka dhalem somor jareya.

19Binena se andhi’ bengko jareya nyaba’ kaen etopowagi ka somor jareya, e attasanna kaen gella’ etaburi gandum, daddi somor jareya ta’ etangale’e oreng.

20Reng-oreng se eotos Absalom entar ka bengko jareya, pas atanya ka babine’ gella’, "Badha e dhimma Ahima’as ban Yonatan?" "Gi’ buru alengka ka temor songay," sambidda. Reng-oreng jareya nyare oreng ngodha se kadhuwa gella’, tape ta’ etemmo, daddi pas padha abali ka Yerusalim.

21Ahima’as ban Yonatan kalowar dhari somor pangetegganna, pas duli ngadhep ka Rato Daud manapa’ sakabbinna kabar se ekaedhing. Ca’na atorra se kadhuwa jareya, "Ahitofel apareng petodu sopaja nyerranga junandalem. Ngereng, guste, junandalem enggala alengka ka temor songay ka’dhinto samangken jugan."

22Daddi Daud ban sakabbinna pangerengnga pada alengka Songay Yordan, e bakto pajjar kabbi la padha ongga ka temorra Songay Yordan.

23E bakto tao ja’ petoduna ta’ etoro’, Ahitofel pas masang pa-kapana jaranna pas terros mole ka kotthana dibi’. Saellana mamare sakabbinna orosanna Ahitofel jareya pas agantong sampe’ mate, jinazana ekoburragi e koburanna la-balana.

24Daud la napa’ ka kottha Mahana’im e bakto Absalom alengka Songay Yordan, eerengngagi reng-oreng Isra’il.

25(Absalom la ngangkat Amasa epadaddi kapalana pasukanepagante Yowab. Amasa jareya ana’na Yitra oreng Isma’il; nyamana ebuna Abigail ana’na Nahas, taretan bine’na Zeruya ebuna Yowab.)

26Absalom ban reng-orengnga akemah e tana Gileyad kabbi.

27E bakto Daud napa’ ka Mahana’im, e jadhiya eamba’ bi’ Sobi ana’na Nahas dhari kottha Raba e Amon, bariya keya bi’ Makhir ana’na Amiyel dhari Lodebar, sarta bi’ Barzilai dhari Rogelim e Gileyad.

28Reng-oreng jareya ngeba kobugan, bajan ban kasor kaangguy Daud ban pangerengnga, bariya keya gandum, jaba, teppong, gandum sangngar, kacang mera, kacang mera se raja, maddu, keju, ceng-keccengnga susu ban pan-barampan dumba. Reng-oreng jareya tao ja’ Daud ban pangerengnga tantona padha lapar kabbi, pelka’ ban lesso polana se alomampa e ra-ara.

29(17:28)



 <<  2 Samuel 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel