1Saellana jareya Daud makompol rit-parjurit se paleng bagus e Isra’il, bannya’na kabbi badha tello polo ebu oreng.
2Bi’ Daud reng-oreng jareya ebakta ka Ba’ale e Yehuda, ngoneyana Petthe Parjanjiyan se ngangguy asmana PANGERAN Se Mahakobasa se alenggi e attasanna rub-kerub.
3Petthe Parjanjiyan jareya ekone’e dhari bengkona Abinadab e attassa gumo’, pas esaba’ e jikar se anyar. Jikar jareya eerengngagi bi’ Uza ban Ahio, na’-ana’na Abinadab; Uza ajalan e erenganna,
4ban Ahio ajalan e adha’anna.
5Daud alomampa e adha’na Petthe jareya, eerengngagi sakabbinna bangsa Isra’il; kabbi padha atangdang ban anyanye salar-kellarra kaangguy ngormat PANGERAN. Reng-oreng jareya amaen calempong, gambus, terbang, kalentengan ban simbal.
6Sanapa’na reng-oreng jareya ka kennengnganna pagebba’anna gandum andhi’na Nakhon, pe-sape se narek jikar jareya tatandhung, Uza nyandhak Petthe Parjanjiyan jareya me’ olle ta’ gaggar.
7E bakto jareya keya PANGERAN duka ka Uza sabab se ejalannagi Uza jareya nyamana panyeya’an ka PANGERAN. Uza epamate e jadhiya keya, e seddi’anna Petthe Parjanjiyan gella’.
8Daddi kennengngan jareya sajjegga kadaddiyan jareya enyamae Peres-Uza. Daud peggel polana Uza epate’e bi’ PANGERAN.
9Tape Daud tako’ ka PANGERAN, daddi laju adhabu, "Baramma sateya sengko’ se ngeba’a Petthe Parjanjiyan reya?"
10Daddi Daud ta’ kasokan abakta Petthe Parjanjiyan jareya ka Yerusalim; Petthe jareya pas esaba’ e bengkona Obed-Edom oreng Gat.
11Petthe Parjanjiyan jareya terros badha e jadhiya sampe’ tello bulan abidda, ban PANGERAN aberkadi ka Obed Edom ban ana’ binena.
12Rato Daud meyarsa ja’ PANGERAN aberkadi kalowargana Obed-Edom ban sakabbinna dhi’-andhi’na polana Petthe Parjanjiyan jareya; daddi Daud pas meyos ka bengkona Obed-Edom, Petthe Parjanjiyan jareya epondhut pole, pas ebakta ka Yerusalim ngangguy men-rammen raja.
13E bakto reng-oreng se ngosong Petthe Parjanjiyan jareya ajalan olle nem tendak, ban Daud epakon ambu. Daud pas ngatorragi kurban ka PANGERAN, iya areya sape lake’ ban budhu’na sape se la epalempo.
14Daud pas atangdang salar-kellarra kaangguy ngormat PANGERAN. E bakto jareya salerana pera’ ngagem sarong linen pandha’ se etaleyagi ka tengngana.
15Daddi Daud ban sakabbinna ommat Isra’il la ngalle Petthe Parjanjiyan jareya ka Yerusalim, eerenge soragga oreng ban monyena tarompet.
16E bakto Petthe Parjanjiyan jareya egiba maso’ ka kottha, Mikhal pottra bine’na Saul nyongngo’ dhari candhela; Mikhal ngoladi Rato Daud ca’-lonca’an sambi dang-tangdangan ngormadi PANGERAN. Ngoladi Daud jareya Mikhal arassa ngalennyer.
17Petthe Parjanjiyan jareya esaba’ e kennengnganna e dhalem kemah se la epasang bi’ Daud. Saellana jareya Daud pas ngatorragi kurban obbaran ban kurban karokonan ka PANGERAN.
18Samarena jareya Daud pas aberkadi ra’yat Isra’il kalaban asmana PANGERAN Se Mahakobasa.
19Saellana jareya reng-oreng se badha e jadhiya, lalake’ otaba babine’ eparenge kakanan, iya areya daging panggang sakerra’ ebang, roti ban jajan kismis settong ebang. Samarena jareya reng-oreng gella’ pas mole kabbi ka bengkona bang-sebang.
20E bakto Daud gubar ka karaton ban nyapa’a ana’ bine’na, Mikhal kalowar ngamba’ Daud pas adhabu, "Are teya Rato Isra’il ngalakone barang se andaddiyagi aba’na ehormat oreng! Abangkang padha ban oreng gendheng se ta’ tao malo e adha’na nor-dunor bine’na ba-ponggaba karaton!"
21Saodda Daud, "Sengko’ atangdang ngormadi PANGERAN, se ta’ kasokan ka ramana ba’na ban la-balana, sarta mele sengko’ epadaddi pamimpinna Isra’il, ommadda. Daddi sengko’ terrosa atangdang ngormadana PANGERAN.
22Dina tekka’a sengko’ eya-seya lebbi dhari jareya. Ta’ arapa tekka’a ba’na ya-nyeya ka sengko’, tape nor-dunor se ekoca’agi ba’na gella’, tanto ngargai sengko’!"
23Mikhal, pottra bine’na Saul jareya saomorra ta’ kaagungan pottra.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel