Alkitab Mobile SABDA
[VER] : [MADURA]     [PL]  [PB] 
 <<  2 Samuel 9 >> 

1E settong are Daud mareksane, "Ba’ gi’ badha’a la-balana Saul se odhi’, ya? Mon gi’ badha, sengko’ terro aberri’a kabecce’an, polana sengko’ enga’ ka kabecce’anna Yonatan."

2Kalowargana Saul kaagungan dunor se anyama Ziba, oreng jareya esoro ngadhep ka Rato Daud. Rato mareksane, "Ba’na reya Ziba, ya?" "Lerres, guste," saodda.

3Dhabuna rato pole, "Ba’ gi’ badha’a, ya, balana Saul se gi’ odhi’? Sengko’ terro aberri’a kabecce’an ka oreng jareya, akantha se la ejanjiyagi sengko’ ka Allah." Saodda Ziba, "Gi’ badha pottrana Yonatan kasorang. Orengngepon dippang."

4"Badha e dhimma sateya?" dhabuna rato. "E Lodebar, e compo’epon Makhir pottrana Amiyel," sambidda Ziba.

5Daud makon oreng ngone’e pottrana Yonatan jareya.

6Pottrana Yonatan jareya nyamana Mefiboset. E bakto napa’ ka ajunanna Daud, Mefiboset pas asojut ngormadi Daud. Bi’ Daud esapa, dhabuna, "Mefiboset," ban pottrana Yonatan jareya nyaot, "Ka’dhinto, guste."

7Dhabuna Daud, "Ba’na ta’ osa tako’. Sengko’ aberri’a kabecce’an ka ba’na polana kabecce’anna Yonatan ramana ba’na. Tanana agungnga ba’na Saul, bi’ sengko’ epabaliya kabbi ka ba’na, ban salanjangnga ba’na olle ngakan e karaton."

8Mefiboset asojud pole pas mator, "Abdidalem ka’dhinto ponapa? Aponapa junandalem me’ ce’ saena ka abdidalem?"

9Rato pas adikane Ziba dunorra Saul jareya, pas adhabu, "Sakabbinna dhi’-andhi’na Saul ban kalowargana bi’ sengko’ ebagiya ka kompoyya lorana ba’na reya.

10Ba’na ban na’-ana’na sarta reng-barengnga kodu agarap tana jareya kaangguy kaparlowanna balana Saul, lorana ba’na jareya, hasella tana jareya bagi ka lorana ba’na jareya, kaangguy notobi kabutowanna. Tape Mefiboset olle ngakan e karaton salanjangnga." (Ziba andhi’ ana’ lalake’ lema bellas oreng ban dunorra dhu polo oreng.)

11Saodda Ziba ka rato, "Sadajana papakonnepon junandalem badhi elampa’agiya sareng abdidalem, guste." Daddi Mefiboset adha’ar sameja ban rato, pada ban tra-pottrana Daud dibi’.

12Mefiboset kaagungan pottra lalake’ gi’ kana’ nyamana Mikha. Ziba saana’ binena daddi barengnga Mefiboset.

13Daddi Mefiboset se dippang dhu kalaja jareya alenggi e Yerusalim ban ros-terrosan adha’ar e karaton.



 <<  2 Samuel 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran