Alkitab Mobile SABDA
[VER] : [MADURA]     [PL]  [PB] 
 <<  2 Tawarikh 1 >> 

1Sulaiman pottrana Rato Daud jumenneng rato se kowat kadhudhuganna e karaja’an Isra’il. Bi’ GUSTE Allahna eberkadi sarta eparenge kakobasa’an se talebat rajana.

2Para kapalana pasukan saebu ban pasukan saratos, para kaom oreng agungnga pamarenta, ban para kapala kalowarga e Isra’il bi’ Rato Sulaiman epakon

3ngereng salerana ka kennengnganna kabakteyan e Gibeyon. Rato Sulaiman meyos ka jadhiya, bariya keya reng-oreng gella’ kabbi, polana e jadhiya badha Kemah Socce se ekagabay bi’ Mosa, abdina PANGERAN, e bakto badha e ra-ara beddhi.

4(Tape Petthe Parjanjiyanna PANGERAN badha e Yerusalim e dhalemkemah se epaddek Rato Daud kaangguy kennengnganna Petthe Parjanjiyan e bakto ealle dhari Kiryat-Yearim.)

5Mezba paronggu gabayanna Bezale’el ana’na Uri, kompoyya Hur, badha e Gibeyon keya, e adha’na Kemah Socce. Rato Sulaiman ban ra’yadda kabbi padha abakte ka PANGERAN e jadhiya.

6E adha’na kemah jareya, e attas mezba paronggu, rato ngatorragi kurban obbaran ka PANGERAN, aropa keban saebu meggi’.

7E malem jareya Allah ngaton ka Sulaiman, laju adhabu, "Sulaiman, mara ba’na menta apa se ekaterro, bi’ Sengko’ ekabbulana!"

8Atorra Sulaiman, "Ya, Allah, Junandalem ampon noduwagi ja’ Junandalem ce’ taresnana ka Daud, rama abdidalem, sarengngan pole Junandalem ampon ngangkat abdidalem epadaddi rato, agante rama.

9Samangken, GUSTE Allah, moga-moga Junandalem neptebbana janji se edhabuwagi ka rama abdidalem. Sareng Junandalem abdidalem ampon epadaddi rato se marenta bangsa se raja se ta’ kaetong bannya’epon ka’dhinto.

10Daddi abdidalem nyo’ona, kasokana Junandalem marenge abdidalem kabicaksana’an sareng pangataowan se ekaparlo abdidalem kaangguy mimpin ra’yat ka’dhinto. Manabi ta’ saka’dhinto, kadi ponapa abdidalem se kengenga marenta ommattepon Junandalem se saka’dhinto bannya’epon?"

11Dhabuna Allah ka Sulaiman, "Parnyo’onanna ba’na jareya bagus. Ba’na ta’ menta kasogiyan otabana dunnya otaba terro kalonta’a nyamana, otabana sopaja so-mosona ba’na padha’a mate kabbi, otabana sopaja ba’na dibi’ lanjanga omor; ba’na pera’ nyo’on kabicaksana’an ban pangataowan kaangguy marenta Tang ommat se bi’ Sengko’ eparcaja’agi ka ba’na reya.

12Daddi, ba’na bi’ Sengko’ eberri’ana kabicaksana’an ban pangataowan jareya. Laen dhari jareya bi’ Sengko’ ba’na epalebbiya ma’mor, epalebbiya sogi ban lebbi kalonta dhari rato se kemma’a bai se marenta sabellunna ba’na ban se marenta samarena ba’na saterrossa e jaman se bakal dhatengnga."

13Saellana jareya Sulaiman abali ka Yerusalim, dhari kennengnganna kabakteyan e Gibeyon kennengnganna Kemah Socce rowa. Dhari Yerusalim jareya salerana ajalannagi pamarenta’anna ka Isra’il.

14Angkadan perrangnga epagenna’ ban kareta perrang se bannya’na saebu pa’ ratos meggi’ sarta jaran perrang se bannya’na dhubellas ebu meggi’. Sabagiyan badha se esaba’ e Yerusalim, karena esaba’ e tha-kottha laenna.

15E jaman pamarenta’anna Sulaiman, emmas ban salaka kaetong barang se biyasa e Yerusalim, tadha’ bidana ban bato. Kaju comara Libanon bannya’na padha ban kaju biyasa.

16Kalaban parantara’anna gang-dagang se abanto rato, jaran epadhateng dhari Messer ban Kewe,

17ban ta-kareta perrang epadhateng dhari Messer. Ran-jaran ban ta-kareta perrang jareya ejuwal pole ka to-rato Het ban to-rato Siria, argana jaranna settong saratos saeket pesse salaka, ban kareta perrang settong argana nem atos pesse salaka.



 <<  2 Tawarikh 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel