1Manasye yuswana dhubellas taon e bakto jumenneng rato Yehuda, ban salerana marenta e Yerusalim saeket lema’ taon abidda.
2Manasye dusa ka PANGERAN sabab nerowe kabiyasa’anna sa-bangsa se eojuk PANGERAN dhari Kana’an e bakto oreng Isra’il maso’ ka nagara jareya, iya areya kabiyasa’an se hat-jahat.
3Kennengnganna panyemba’anna brahala e man-dhimman se la epamosna bi’ Hizkiya, ramana, laju epaddek pole. E man-dhimman epaddek ba-mezba kaangguy abakte ka Ba’al; laen dhari jareya salerana abadhi ca-arcana Dewi Asyera sarta nyemba ka tang-bintang.
4PANGERAN la adhabu ja’ Yerusalim reya salanjangnga epadaddi kennengnganna oreng abakte ka Salerana, tape e jadhiya, e Padalemman Socce jareya, Manasye maddek ba-mezba kaangguy ba-diba.
5E palataran se dhadhuwa’ e Padalemman Socce epaddeggi ba-mezba kaangguy panyemba’an ka tang-bintang.
6Tra-pottrana ekagabay kurban obbaran e Cora Hinom, ngangguy kon-dhukon, jum-nojum, elmo gaib, ban nyo’on petodu ka roh-erroh. Dusana ka PANGERAN ce’ rajana, sampe’ PANGERAN duka ka salerana.
7Arcana brahala esaba’ e Padalemman Socce, mangkana Pangeran la adhabu kantha reya ka Daud ban Sulaiman, pottrana, parkara Padalemman Socce jareya, "Tang bengko e Yerusalim reya, se bi’ Sengko’ la epele e antarana dhubellas suku Isra’il, areya kennengngan se bi’ Sengko’ la etantowagi menangka kennengnganna oreng abakte ka Sengko’ salanjangnga.
8Mon ommat Isra’il atoro’ ka sakabbinna Tang parenta ban atoro’ ka kom-hokom se epanapa’ ka bangsa jareya bi’ Mosa, Tang abdi rowa, bi’ Sengko’ ommat Isra’il ejaga’a sopaja ta’ sampe’a eojuk dhari nagara se bi’ Sengko’ la ebagi ka bangatowana."
9Manasye daddi lantaranna ra’yat Yehuda agabay sa-dusa se ajahadan dhari dusana sa-bangsa se eojuk PANGERAN dhari Kana’an e bakto ommadda PANGERAN maso’ ka nagara jareya.
10PANGERAN maenga’ Manasye ban ra’yadda, tape kabbi padha ta’ ngedhingngagi.
11Daddi PANGERAN madhateng para panglimana tantara Asyur epalorok Yehuda. Manasye etangkep ngangguy e’-kae’, pas etalekong, laju egiba ka Babil.
12E dhalem kasangsara’anna jareya Manasye marendha e ajunanna GUSTE Allahna, sarta adu’a nyo’on partolonganna.
13Allah ngabbuli parnyo’onanna Manasye; rato jareya epabali ka Yerusalim, epamarenta’a pole. Lantaran kadaddiyan jareya Manasye yakin ja’ PANGERAN reya Allah.
14Saellana jareya Manasye matenggi geddhung e lowar e bagiyan temorra Kottha Daud. Emolae dhari settong kennengngan e cora e seddi’na somber Gihon, epaterros ka dhaja sampe’ gan Labang Saketheng Juko’ ban bagiyanna kottha se esebbut Ofel. E saneyap kottha se ebintenge e Yehuda, esaba’i panglima kasorang.
15Ca-arcana dibana bangsa laen epanyengla, bariya keya la-brahala se la esaba’ e Padalemman Socce. Ba-mezbana brahala se badha e gumo’ Padalemman Socce, ban e kennengngan en-laenna e Yerusalim, ebungkar kabbi. Jareya egiba ka lowar kottha kabbi, laju ebuwang.
16Saellana jareya, mezba kennengnganna oreng abakte ka PANGERAN epateppa’, ban e jadhiya laju ngatorragi kurban salameddan ban kurban sokkor. Oreng Yehuda epakon abakte ka GUSTE Allahna Isra’il kabbi.
17Ra’yat gi’ ngatorragi kurban e kennengngan en-laenna se eangguy oreng ngatorragi tor-atorra, tape tor-ator jareya eatorragi ka PANGERAN.
18Careta laenna parkara Manasye, ban parkara du’ana ka Allah, sarta bu-dhabuna Allah se epessennagi ka salerana bi’ para nabbi kalaban asmana PANGERAN, Allahna Isra’il, kabbi la ecathet e dhalem ketab Sajarana To-rato Isra’il.
19E dhalem ketab Sajarana Bi-nabbi la ecathet keya du’ana Manasye ban jawabanna Allah ka du’a jareya, sarta caretana sa-dusana sabellunna salerana atobat, sakabbinna kennengnganna panyemba’anna brahala ban ca-arcana Dewi Asyera se ebadhi salerana, sarta la-brahala se esemba salerana.
20Manasye seda ban esareyagi e karaton. Se agante jumenneng rato iya areya Amon pottrana.
21Amon yuswana dhu lekor taon e bakto salerana jumenneng rato Yehuda ban marenta e Yerusalim dhu taon abidda.
22Amon akantha ramana, dusa ka PANGERAN; nyemba la-brahala se esemba ramana ban abakta kurban ka la-brahala jareya.
23Tape bida ban ramana, Amon ta’ marendha ban ta’ abali ka PANGERAN; la’-mala’ dusana alebbiyan dhari ramana.
24Ba-ponggabana Rato Amon asakongkel ngamoso salerana, laju mate’e rato jareya e karatonna.
25Tape reng-oreng se mate’e Rato Amon jareya epate’e bi’ ra’yat Yehuda, se pas ngangkat Yosiya, pottrana, epajumenneng rato.
<< 2 Tawarikh 33 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel