1Sengko’ narema pangaton dhari GUSTE Allah Se Mahatenggi. Sengko’ nangale’e Salerana nyepta’agi balang saambalan ce’ bannya’na e baktona oreng buru mare ngare’agi rebba kaagem rato, ban rebbana buru molae tombu pole.
2Lang-balang jareya ngakan bu-tombuwan se badha e tana, para’ epatadha’a. Sengko’ pas ngoca’, "GUSTE Allah Se Mahatenggi, kasokana Junandalem apareng sapora ka ommadda! Ommattepon Junandalem ka’dhinto talebat kene’na sareng ta’ gadhuwan kakowadan, kadi ponapa se kowada ngadhebbi kabadha’an ka’dhinto?"
3PANGERAN ngoba sajjana jareya, pas adhabu, "Se etangale’e ba’na jareya ta’ kera kadaddiyan."
4Sengko’ olle pangaton pole dhari GUSTE Allah Se Mahatenggi. Sengko’ nangale’e Salerana aya-sadhiya se ngokoma ommadda kalaban apoy. Apoy jareya lap-ngolap sampe’ tase’ raja se badha e babana bume epatadha’ karena ban molae makatonon teggal.
5Sengko’ mator, "Adhu, GUSTE Allah Se Mahatenggi, paambuwagi apoy ka’dhinto! Ommattepon Junandalem talebat kene’na sareng ta’ gadhuwan kakowadan, kadi ponapa se kowada ngadhebbi kabadha’an ka’dhinto?"
6PANGERAN ngoba sajjana pole, pas adhabu, "Jareya ta’ kera kadaddiyan keya."
7Sengko’ olle pangaton pole dhari PANGERAN. Sengko’ nangale’e Salerana ngadek e erenganna settong geddhung se epaddek ngangguy tale okoran se loros ka baba. Salerana ngastane tale jareya terro ngagaliya loros enja’na geddhung jareya.
8Salerana mareksane ka sengko’, "Apa se etangale’e ba’na, Amos?" Sengko’ nyaot, "Tale okoran se loros ka baba, GUSTE." Pangeran pas adhabu, "Sengko’ ngangguy tale okoran reya kaangguy noduwagi ja’ Tang ommat padha ban geddhung se ta’ loros. Sengko’ ta’ ngoba’a Tang sajja pole, Sengko’ masthe ngokom Tang ommat jareya.
9Kennengngan se eangguy toronanna Ishak kaangguy ajalannagi kabakteyan padha epaancora kabbi. Ngan-kennengngan se socce monggu ka oreng Isra’il epagujura kabbi. Sengko’ mamosna’a toronanna Rato Yerobeyam."
10Amaziya, imam e Betel, ngerem reppodan ka Yerobeyam rato Isra’il, "Amos parappa’epon asakongkel sareng ra’yat alabana ka junandalem. Ca’-oca’epon se mapanas ra’yat bakal daddiya sababba ancorrepon nagara ka’dhinto.
11Amos ngoca’ ca’epon junandalem badhi seda’a e dhalem paperrangan, sarengngan pole oreng Isra’il tanto eangko’ ka pambuwangan, jau dhari nagaraepon dibi’."
12Amaziya pas adhabu ka Amos, "He, nabbi, kassa’ ba’na mole ka Yehuda! Akotbah e dhissa’. Dina me’ olle reng-oreng jareya se aberri’ kakan ka ba’na!
13Ja’ akotbah e Betel pole. Kottha reya kaangguy rato malolo, sarta kaangguy kabakteyan nasional."
14Amos nyaot, "Abdidalem ka’dhinto banne nabbi polana jabatan. Salerressa abdidalem lakona meyara ebin sareng molong buwana ara.
15Namong PANGERAN mondhut abdidalem dhari lalakon gapaneka, sareng makon abdidalem manapa’ sen-pessennepon se edhabuwagi Salerana ka oreng Isra’il.
16Daddi ngereng peyarsa’agi ponapa se edhabuwagi PANGERAN ka junandalem. Sarrena junandalem alarang abdidalem akotbah nangtang bangsa Isra’il,
17PANGERAN adhabu ja’ rajiepon junandalem badhi daddiya sondel e rong-lorong kottha, dineng tra-pottraepon junandalem bakal seda’a e dhalem paperrangan. Tanaepon junandalem badhi egi-bagiya ka reng-oreng laen, dineng junandalem dibi’ badhi seda’a e nagarana oreng se ta’ kennal ka Pangeran. Pandhudhu’ Isra’il masthe eangko’ ka pambuwangan, jau dhari nagaraepon dibi’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel