1Lebbi becce’ nase’ saompa’an e dhalem kataremtemman, etembang kakanan nyaman ta’ sakera-kera tape atokaran.
2Kabula se penter bakal ngobasa’ana ana’ se matodhusan, ban bakal narema’a sangkolan abareng ban tan-taretanna kana’ jareya.
3Emmas ban salaka eoji e apoy se panas, tape atena manossa eoji bi’ PANGERAN.
4Oreng jahat atoro’ ka babala’an se juba’, oreng se lecegan lebur ngedhingngagi petenna.
5Sapa se ya-nyeya oreng mesken se nespa, padha ban se ya-nyeya Allah Panceptana. Sapa se perak polana oreng laen palang, tanto narema okoman.
6Se magumbira oreng se la towa reya na’ potona, se magumbira ana’ iya areya oreng towana.
7Oreng se molja ta’ patot acaca lecek; oreng budhu ta’ pantes makalowar ca’-oca’ se aji.
8Badha se nyangka pesse go’-sogo’ bisa madhateng kaajiban; kalaban pesse go’-sogo’ apa’a bai bisa kalakon.
9Mon terro ekaleburana oreng, ba’na kodu nyapora kasala’anna. Nga’-ngenga’e kasala’an marosagan se akanca’an.
10Settong parengeddan lebbi raja artena monggu ka oreng penter etembang saratos peccodan ka oreng se budhu.
11Oreng jahat mabaridhuwan malolo, tape maot dhateng ka oreng jareya akantha otosan se kejjem.
12Lebbi becce’ tatemmo ban korbina baruwang se kaelangan budhu’na, etembang ban oreng budhu se repot ban kabudhuwanna.
13Sapa se males kabecce’an ban kajahadan, kajahadan ta’ kera kalowar dhari bengkona.
14Amolae tokar padha ban abeddhul tanggulla aeng; daddi duli nyorot sabellunna tokar molae.
15PANGERAN baji’ ka oreng se abendherragi oreng daraka, ban se nyala’agi oreng se ta’ sala.
16Parcoma oreng budhu matadha’ pesse kaangguy nyare hekmat, sabab aba’na ta’ andhi’ pekkeran sehat.
17Kanca kodu esto ka kancana, tape taretan noro’ nanggung kasossa’an.
18Oreng se ajanji nanggunga otangnga sasamana jareya oreng budhu nyamana.
19Oreng se lebur ka dusa, dujan atokar, oreng se raja caca, nyare kaancoran.
20Tokang tepo ta’ kera senneng odhi’na, oreng se acangka jilana tanto calaka’.
21Andhi’ ana’ se gendheng artena nemmo kasossa’an, daddi eppa’na oreng budhu ta’ masenneng ate.
22Ate se gumbira masehat badan; ate se sossa mapotongan samangat.
23Hakim se ta’ jujur tek-ngetek narema go’-sogo’, ban ta’ ajalannagi kaadilan.
24Tojjuwanna oreng se penter nyareya hekmat, tape tojjuwanna oreng budhu ta’ etemmo karowanna.
25Ana’ se budhu masossa eppa’na, ban masossa atena ebuna.
26Ta’ patot adhindha oreng se ta’ sala; ta’ pantes nendhes oreng se bagus buddina.
27Oreng se tajem pekkerra ta’ bannya’ cacana. Oreng se bicaksana terros ayem gulina.
28Oreng budhu sakale tanto esangka penter ban bicaksana mon oreng jareya neng-enneng ta’ bannya’ caca.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel