1E lao’na nagara Kana’an badha kottha se anyama Arad. E bakto ratona meyarsa ja’ bangsa Isra’il lebat e jalan Atarim, bangsa Isra’il laju eserrang, reng-orengnga badha se etangkep.
2Oreng Isra’il laju asompa ka PANGERAN, "Manabi sareng Junandalem bangsa Isra’il epamennang ka bangsa ka’dhinto, bangsa ka’dhinto sareng tha-kotthana sareng abdidalem epatompessa."
3Parnyo’onanna bangsa Isra’il jareya ekabbuli bi’ PANGERAN; bangsa Isra’il epamennang ka bangsa Kana’an. Bangsa Kana’an sarta tha-kotthana epatompes kabbi bi’ bangsa Isra’il. Daddi kennengngan jareya enyamae Horma.
4Reng-oreng Isra’il mangkat dhari Gunong Hor lebat lorong se nojju ka Tellok Akaba moterre nagara Edom. Tape e tengnga jalan reng-oreng jareya ta’ sabbar pole,
5pas ango’ngo’an ka Allah ban ka Mosa, oca’na, "Aponapa bi’ sampeyan kaula me’ egiba nyengla dhari Messer? Epamateya e ra-ara beddhi paneka? Sabab e ka’iya tadha’ pa-ponapa se ekennenga teddha, tadha’ aeng se ekennenga enom. Kaula ampon busen ngakan kakanan se tadha’ rassana paneka!"
6PANGERAN pas madhateng lar-olar se mandhi opassa, epangekke’ reng-oreng Isra’il, sampe’ bannya’ reng-oreng Isra’il se padha mate.
7Reng-oreng Isra’il pas padha nyabis ka Mosa, atorra, "Kaula paneka dusa, ango’ngo’an ka PANGERAN sareng ka sampeyan. Tore nyo’onnagi ka PANGERAN sopaja lar-olar paneka epatadha’a." Daddi Mosa laju adu’a nyo’onnagi bangsa jareya ka PANGERAN.
8Dhabuna PANGERAN ka Mosa, "Kassa’ ba’na agabay lar-olaran dimbaga, pacangke’ ka cangga. Reng-oreng se ekekke’ olar gella’ mon ngabas ka olar dimbaga jareya tanto pas baras."
9Daddi Mosa abadhi lar-olaran dimbaga; lar-olaran jareya epacangke’ ka cangga. Reng-oreng se ekekke’ olar gella’, mon ngabas ka lar-olaran jareya, laju baras.
10Oreng Isra’il mangkat pole, laju akemah e kottha Obot.
11Samarena mangkat dhari kennengngan jareya, laju akemah e jur-gujuran Abarim e ra-ara beddhi e temoranna baba Mo’ab.
12Laju terros sampe’ gan Cora Zered pas akemah e jadhiya.
13Dhari jadhiya pas mangkat pole laju akemah e penggirra Songay Arnon, e ra-ara beddhi se malanjang ka babana oreng Amori. Songay Arnon jareya daddi batessa babana oreng Mo’ab ban babana oreng Amori.
14Lantaran jareya e dhalem ‘Buku Paperranganna PANGERAN’ esebbuttagi, "… Disa Waheb, e baba Sufa ban ra-corana; Songay Arnon
15ban bung-lambungnga ra-cora se malanjang sampe’ ka disa Ar nojju ka batessa babana oreng Mo’ab."
16Dhari jadhiya reng-oreng jareya mangkat, pas napa’ ka kennengngan se anyama Be’er, artena mor-somor. E jadhiya PANGERAN tao adhabu ka Mosa, "Soro ommat akompol; bi’ Sengko’ eberri’ana aeng."
17E bakto jareya bangsa Isra’il anyanye lagu reya, "He, mor-somor, pakalowar aengnga ba’na, bi’ sengko’ eamba’a ban nyanyeyan.
18Somor se ekale bi’ sa-pangobasa ban pin-pamimpinna bangsa ekale ban tongket kapamimpinanna sarta tongket tandha kobasana." Dhari ra-ara beddhi reng-oreng jareya ngalle ka Matana,
19ban dhari jadhiya ka Nahaliyel, terros ka Bamot
20saellana laju terros ka cora e babana oreng Mo’ab, e babana konco’na Gunong Pisga se ngadhep ka ra-ara beddhi.
21Bangsa Isra’il pas ngerem reng-oreng otosan ka Sihon, rato Amori, esoro manapa’ pessen kantha reya,
22"Bangsa abdidalem nyo’ona edi lebada e nagarana junandalem. Bangsa abdidalem sareng bin-ebinna ta’ nyalethong dhari lorong sareng ta’ maso’a ka gal-teggal otabana ka bun-kebbunna anggur, sareng ta’ ngenoma aeng dhari mor-somor e ka’dhinto. Bangsa abdidalem ta’ nyalethong dhari lorong raja kantos kalowar dhari nagaraepon junandalem."
23Tape Rato Sihon ta’ kasokan ngedine reng-oreng Isra’il lebat e nagarana. Rato jareya makompol pasukanna, pas meyos ka Yahas e ra-ara beddhi laju nyerrang oreng Isra’il e jadhiya.
24Tape e dhalem perrang jareya bannya’ tantara Amori epate’e bangsa Isra’il. Bangsa Isra’il laju ngobasane sarta ngennengnge nagarana reng-oreng jareya molae dhari Songay Arnon sampe’ ka Songay Yabok, iya areya batessa babana oreng Amon, sabab bates jareya ce’ kowadda partahananna.
25Kalaban cara se kantha jareya oreng Isra’il arebbu’ sakabbinna kotthana oreng Amori, tamaso’ Hesybon ban sakabbinna kottha kene’ e sakalenglengnga, sarta laju neptep e jadhiya.
26Hesybon reya ibu kottha se ekennengnge Sihon, Rato Amori. Rato jareya tao aperrang ban rato Mo’ab sarta arebbu’ bagiyanna nagarana sampe’ ka Songay Arnon.
27Lantaran jareya bujangga asyi’ir kantha reya, "Mara entar ka Hesybon, ka kotthana Rato Sihon. Sengko’ kabbi padha terro nangaleyana kottha jareya epaddek pole akantha molana.
28E settong bakto e kottha Hesybon reya pasukan Sihon maju akantha apoy. Se maancor kottha Ar e Mo’ab, ban ngobasane nong-gunong e salanjangnga Arnon.
29Adhu, bangsa Mo’ab, palang onggu ba’na! Ba’na se mojja Kamos, ba’na la epatompes kabbi! Bi’ Allahna ba’na epanneng epadaddi oreng ngongse, babine’anna ba’na epadaddi tahananna rato Amori.
30Tape sateya toronanna bangsa jareya padha mate tadha’ karena, e salanjangnga lorong se dhari Hesybon ka Dibon, dhari Nasyim ka Nofah e seddi’anna Medeba."
31Daddi bangsa Isra’il laju ngennengnge babana oreng Amori.
32Saellana jareya Mosa laju makon reng-oreng nyare jalan se paleng bagus nyerrangnga kotthana Yaezer. Oreng Isra’il laju arebbu’ kottha jareya ban tha-kottha e ma’-semma’na sarta ngojuk oreng Amori se ngennengnge tha-kottha jareya.
33Saellana jareya oreng Isra’il abiluk lebat e lorong se ka Basan. Rato Og dhari Basan maju ban pasukanna nyerrang oreng Isra’il e kottha Edrei.
34Dhabuna PANGERAN ka Mosa, "Ella, ja’ tako’. Ba’na epamennanga bi’ Sengko’. Ba’na bakal makala’a rato jareya, ra’yadda ban nagarana. Rato Og jareya papadha ban Rato Sihon se marenta e Hesybon rowa."
35Daddi oreng Isra’il mennang ka rato Og. Rato jareya epate’e, bariya keya tra-pottra ban ra’yadda, kabbi epatadha’ karena. Saellana jareya nagarana pas ekobasae sarta ekennengnge.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel