Alkitab Mobile SABDA
[VER] : [MADURA]     [PL]  [PB] 
 <<  Daniel 1 >> 

1Tello taon saellana Rato Yoyakim marenta Yehuda, Nebukadnezar rato Babil, nyerrang kottha Yerusalim ban ngeppong kottha jareya.

2Pangeran ngedine rato jareya makala Rato Yoyakim ban arampas sabagiyan dhari rang-barang se aji e Padalemman Socce. Reng-oreng se etawan ebakta ka kowella dibana e Babil, ban rang-barang se aji se erampas esempen e dhalem dhang-gudhangnga kowel jareya.

3Saellana jareya rato makon Aspenas, kapalana roma tatanggana karaton, mele e antarana para tawanan jareya ngangodhadan toronanna rato otabana se tamaso’ toronanna oreng agung.

4Reng-oreng jareya kodu ngangodhadan se tadha’ calena. Kodu gantheng, tenggi sakola’anna, penter ban lebar pangataowanna sarta patot epalako e karaton. Aspenas kodu ngajari ngangodhadan jareya maca ban noles basa Babil.

5Rato nantowagi keya ja’ kakan ban nom-enomanna reng-oreng jareya kodu padha ban se esadhiya’agi kaangguy anggotana kalowargana rato. Mon la elate tello taon abidda, ngangodhadan jareya kodu ngadhep ka rato kaangguy epalakowa e karaton.

6E antarana ngangodhadan jareya tamaso’ keya Daniyel, Hananya, Misa’el ban Azariya, kabbi padha dhari suku Yehuda.

7Bi’ kapalana roma tatanggana karaton nyamana reng-oreng jareya eoba epadaddi: Beltsazar, Sadrakh, Mesakh ban Abednego.

8Kalaban partolonganna Allah, Daniyel ekaneserre bi’ Aspenas. Daniyel nekat ta’ manajjisa salerana bi’ kakanan ban nom-enoman anggur dhari karatonna rato, daddi mator ka Aspenas sopaja eatore teddha’an laen.

9(1:8)

10Sarrena tako’ ka rato, Aspenas mator, "Rato dibi’ se neptebbagi se kodu edha’ar sareng se kodu eenom sampeyan, daddi manabi noro’ pangoladanna rato sampeyan katon korang sehat manabi ebandhing sareng ngangodhadan laenna, tanto kaula pas epate’e."

11Saellana jareya Daniyel laju arembak ban pangawal se bi’ Aspenas epassrae kaangguy ngoros Daniyel ban kancana se katello. Dhabuna Daniyel,

12"Tore kaula sakanca paneka oji sapolo are abidda; parenge ngan-ganganan saos se eteddha’a ban aeng se eenoma.

13Saamponna olle sapolo are, bandhingngagi mowa kaula sakanca paneka bi’ mowana ngangodhadan se neddha teddha’an se eteptebbagi rato, pas potose adhasar ponapa se etengale sampeyan ganeka."

14Pangawal jareya saroju’ ban ajalannagi parcoba’an jareya sapolo are abidda.

15Saellana bakto jareya lebat, se kaempa jareya katon abarasan ban akowadan dhari sakabbinna ngangodhadan se olle kakanan dhari rato.

16Sajjegga jareya bi’ pangawal jareya reng-oreng se kaempa jareya ta’ eberri’i kakanan ban nom-enoman se etantowagi rato pole, tape pera’ eberri’i ngan-ganganan ban aeng malolo.

17Oreng ngodha se kaempa jareya bi’ Pangeran eparenge hekmat ban kaadilan e dhalem kasusastra’an ban elmo. Laen dhari jareya Daniyel eparenge keya kapenterran kaangguy nerrangngagi pangaton ban mempe.

18Saellana baktona pandhidhigan se tello taon se etantowagi rato jareya la mare, sakabbinna ngangodhadan jareya bi’ Aspenas egiba ngadhep ka Rato Nebukadnezar.

19Saellana abu-dhabu bi’ reng-oreng ngodha jareya kabbi, rato ngagali ja’ Daniyel, Hananya, Misa’el ban Azariya andhi’ kalebbiyan e dhalem parkara apa’a bai katembang ban reng-oreng laenna. Daddi reng-oreng jareya pas molae epalako e karaton.

20Sabban rato ngotara’agi parkara se marlowagi panerrangan ban partembangan, salerana ngoladi ja’ babala’an ban panemmona oreng ngodha se kaempa gella’ sapolo kale lebbi bagus dhari babala’an ban pamekkeranna sakabbinna tokang ramal ban kon-dhukon seher saantero karaja’anna.

21Daniyel paggun epalako e karaton sampe’ Rato Kores dhari Persiya makala Babil.



 <<  Daniel 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel