1E settong are Nebukadnezar abadhi arca emmas tenggina petto lekor meter ban lebarra para’ tello meter. Arca jareya epaddek e Tana Lapang Dura e propinsi Babil.
2Saellana jareya rato ngonjang sakabbinna rato dhaera, para gubennor, bupati, panasehadda nagara, bendahara, hakim, ahli hokom ban sakabbinna kapala dhaera kaangguy hadir e dhalem opacara paresmeyanna arca se la epaddek jareya.
3Saellana kabbi la dhateng ban manjeng e adha’na arca jareya,
4ajudanna rato aera’ epakaja, "Tan-taretan dhari sadajana bangsa, dhari sadajana suku sareng basa! Peyarsa’agi dhabuna rato paneka:
5Manabi tarompet amonye, etoro’e monyena soleng, calempong, rebab, gambus, serdam sareng pakakas mosik laenna, sampeyan kodu padha asojud nyemba ka arca emmas se ampon epaddek Rato Nebukadnezar.
6Ra’-pasera’a se ta’ atoro’ ka dhabuna rato gapaneka, bakal eontallagiya e bakto gapaneka jugan ka dhalem apoy se rabbang."
7Daddi e bakto ngedhing kas-pakakas mosik jareya epamonye, reng-oreng dhari sakabbinna bangsa, suku ban basa jareya pas padha asojud ban nyemba ka arca emmas jareya.
8Badha reng-oreng Babil se ngala’ kasempadan jareya kaangguy macalaka’ oreng Yahudi.
9Atorra reng-oreng jareya ka Nebukadnezar, "Moga-moga junandalem eparengngana molja salanjangnga!
10Junandalem dibi’ apareng dhabu ja’ manabi kas-pakakas mosik ampon epamonye, sadajaepon oreng kodu asojud nyemba ka arca emmas ka’dhinto,
11ban pasera se ta’ atoro’ ka dhabu gapaneka badhi eontallagiya ka apoy se rabbang.
12Namong badha reng-oreng Yahudi se sareng junandalem epassrae pamarenta’an e propinsi Babil ta’ marduli dhabuepon junandalem gapaneka. Reng-oreng gapaneka enggi ka’dhinto Sadrakh, Mesakh sareng Abednego. Reng-oreng gapaneka ta’ poron nyemba ka ba-dibaepon junandalem sarengngan pole ta’ poron nyemba ka arca emmas se epaddek junandalem."
13Meyarsa jareya rato ce’ dukana, pas makon se katello jareya epangadhep ka salerana.
14Rato mareksane ka se katello jareya, "Sadrakh, Mesakh ban Abednego! Ba’ bendherra ba’na ta’ endha’ nyemba ka tang ba-diba ban ta’ endha’ asojud ka tang arca emmas se epaddek sengko’ rowa?
15Sateya, apa ba’na endha’ asojud nyemba ka arca jareya mon mosik amonye? Mon ba’na ta’ endha’, bi’ sengko’ ba’na eontallagiya ka dhalem apoy se rabbang e bakto jareya keya. Ban diba se kemma se bisa’a masalamet ba’na?"
16Sadrakh, Mesakh ban Abednego nyaot, "Guste se molja, abdidalem ta’ alabana kaangguy abillai aba’.
17Manabi Allah se esemba abdidalem sadaja sanggup masalamet abdidalem sadaja dhari apoy se rabbang gapaneka ban dhari kobasaepon junandalem, tanto Salerana alampa’agi gapaneka.
18Namong, saompamaepon Salerana ta’ alampa’agi sapaneka, moga junandalem ngagaliya ja’ abdidalem sadaja ta’ poron nyemba ka dibaepon junandalem jugan ta’ poron nyemba’a ka arca emmas se epaddek junandalem gapaneka."
19Rato Nebukadnezar ce’ dukana ka Sadrakh, Mesakh ban Abednego, sampe’ raena mera ngadarbang. Salerana laju makon sopaja apoy eparaja pettong kalena se biyasana.
20Saellana jareya salerana makon reng-oreng se talebat kowat dhari tantarana nale’e Sadrakh, Mesakh ban Abednego, ban ngontallagi se katello jareya ka dhalem apoy se rabbang gella’.
21Oreng se katello jareya duli etale’e epaserret e dhalem kabadha’an akalambi genna’, iya reya kameja, juba, songko’ ban angguy laenna, pas eontallagi ka dhalem apoy se rabbang gella’.
22Sarrena papakonna rato jareya ce’ kerrassa, apoy jareya la epace’panassa sampe’ reng-oreng se ngangka’ Sadrakh, Mesakh ban Abednego ka seddi’na apoy jareya ekello’ sampe’ mate.
23Daddi oreng katello se etale’e epaserret jareya gaggar ka dhalem apoy se rabbang jareya.
24O-tao Nebukadnezar ce’ takerjadda. Salerana ngadek duliyan pas aera’ ka ba-ponggabana, "Se etale’e ban eontallagi ka apoy gella’ gu ta’ katello, ta’ iya?" Saodda reng-oreng jareya, "Lerres, guste."
25Dhabuna rato, "Tape arapa sengko’ me’ nangale’e oreng kaempa lan-jalanan e dhalem apoy rowa? Kabbi padha ta’ etale’e ban padha ta’ apa-rapa. Ban oreng se nomer empa’ rowa robana akantha diba."
26Nebukadnezar laju nyemma’e labangnga kennengnganna apoy gella’ pas aera’, "Sadrakh, Mesakh ban Abednego, para abdina Allah Se Mahatenggi! Mara kalowar dhari apoy jareya!" Se katello jareya pas kalowar.
27Sakabbinna bakkella rato, para gubennor, bupati ban ba-ponggaba laenna agaribbung e sakalenglengnga oreng se katello jareya ban kabbi padha nangale’e ja’ se katello jareya ta’ ekenneng apoy sakale. Obu’na ta’ katonon, kalambina ta’ potthon, la’-mala’ ta’ bau okos balakka’.
28Rato laju adhabu, "Molja’agi Allah se esemba Sadrakh, Mesakh ban Abednego. Salerana la ngotos malaekadda kaangguy masalamet abdina se katello se parcaja ka Salerana. Reng-oreng jareya alaban ka tang parenta ban asoka’an mate etembang nyemba diba se kemma’a bai kajabana Allahna dibi’.
29Daddi sengko’ marenta’agi ja’ sepat oreng dhari bangsa, suku bangsa otaba basa apa’a bai, se ca’-ngoca’e ya-nyeya Allah se esemba Sadrakh, Mesakh ban Abednego, bi’ sengko’ ethok-ketthoga ban bengkona epagujura epadaddiya tombuganna jur-gujuran. Sabab tadha’ diba se bisa ngalakone apa se la elampa’agi Allah jareya."
30Saellana jareya rato maongga pangkadda Sadrakh, Mesakh ban Abednego, sampe’ se katello jareya daddi ja-pangraja tenggi e propinsi Babil.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel