Alkitab Mobile SABDA
[VER] : [MADURA]     [PL]  [PB] 
 <<  Daniel 6 >> 

1(6-2) Karaja’an jareya bi’ Darius ebagi epadaddi saratos dhu polo propinsi, sabban propinsi eparenta settong gubennor.

2(6-3) Daniyel ban oreng laen kadhuwa epadaddi pangawassa para gubennor jareya sopaja ta’ marogi rato.

3(6-4) Ta’ abit dhari jareya la etemmo ja’ lakona Daniyel abagusan dhari lakona para gubennor ban pangawas en-laenna. Daddi bi’ rato laju terro epadaddiya pangobasana saantero karaja’an.

4(6-5) Tape para gubennor ban para pangawas laenna aehteyar nyare kasala’anna Daniyel e dhalem orosan pamarenta’an, tape ta’ ahasel, sabab Daniyel esto ban jujur sarta ta’ tao entheng ban ta’ tao agabay sala apa’a bai.

5(6-6) Reng-oreng gella’ pas ngoca’, "Daniyel reya coma ekenneng sare salana e dhalem orosan agamana."

6(6-7) Saellana jareya reng-oreng buru areng-bareng entar ngadhep ka rato, laju mator, "Adhu Guste, Rato Darius, moga-moga junandalem eparengngana molja salanjangnga!

7(6-8) Abdidalem sadaja se ngoros karaja’annepon junandalem, enggi ka’dhinto para pangawas, para gubennor, kel-bakkellepon gubennor sareng ja-pangraja laenna, ampon mopakat ngusullagiya ka junandalem sopaja junandalem makalowara sorat papakon se kodu eta’adi gu-onggu. Ngereng junandalem makalowar papakon sopaja e dhalem bakto tello polo are tadha’ oreng se eedine ngajuwagi parnyo’onan ka sala settongngepon diba otaba manossa, kajabana ka junandalem dibi’. Pasera se ta’ atoro’ ka papakon gapaneka bakal eontallagiya ka rongkangnga macan.

8(6-9) Abdidalem sadaja nyo’ona sopaja junandalem kasokana alabeddi sorat papakon gapaneka sopaja daddiya dhang-ondhang Mediya sareng Persiya se ta’ kengeng ecabut pole."

9(6-10) Daddi Rato Darius alabeddi sorat parenta jareya.

10(6-11) E bakto Daniyel meyarsa parkara jareya, laju gubar ka compo’na. Kamarra se badha e loteng attas badha la-candhelana; la-candhela jareya addhep ka Yerusalim. Ban akantha biyasana, Daniyel adu’a ka Allahna ban amolja’agi Salerana tello kale saare sambi adekkong e adha’na la-candhela se abukka’ jareya.

11(6-12) E bakto so-mosona Daniyel nangale’e Daniyel adu’a ka Allahna,

12(6-13) laju padha ngadhep ka rato kabbi, areppottagiya Daniyel. Atorra reng-oreng jareya, "Junandalem gu ta’ ampon alabeddi sorat papakon se alarang sadajana oreng e dhalem bakto tello polo are ngajuwagi parnyo’onan ka sala settongngepon diba otaba manossa kajabana ka junandalem saos? Sarengngan, pasera se ta’ atoro’ ka papakon gapaneka badhi eontallagiya ka rongkangnga macan?" Dhabuna rato, "Pajat iya, ban parenta jareya daddi dhang-ondhang Mediya ban Persiya se ta’ bisa ecabut pole."

13(6-14) Reng-oreng jareya pas mator ka rato, "Daniyel, sala settong dhari oreng buwangan dhari Yehuda, ta’ marduli ka dhabuepon junandalem. Oreng gapaneka adu’a terros tello kale saare."

14(6-15) Meyarsa jareya rato laju sossa ban kobater, daddi laju nyare akkal baramma carana se masalamedda Daniyel. Sampe’ asar rato gi’ terros mekker parkara jareya.

15(6-16) Reng-oreng gella’ laju ngadhep ka rato pole, pas mator, "Guste, junandalem kodu emot ja’ menorot dhang-ondhang Mediya sareng Persiya, dhabuna rato ta’ kengeng eba-oba."

16(6-17) Daddi dhi-budhina rato makon oreng mega’ Daniyel se pas kodu eontallagi ka rongkangnga macan. Dhabuna rato ka Daniyel, "Moga ba’na epasalamedda bi’ Allah se esemba ba’na kalaban esto."

17(6-18) Saellana jareya lobangnga rongkangnga macan gella’ etotobi bato se raja, ban bato jareya bi’ rato eeccap bi’ eccabba karaja’an sarta eccabba para pangraja, daddi tadha’ oreng se bisa mabebas Daniyel dhari can-macan jareya.

18(6-19) Saellana jareya rato pas gubar ka karaton. Salerana ta’ kasokan adha’ar otabana elepor. Samalem benteng ta’ bisa asaren.

19(6-20) E baja sobbu rato abungo, laju meyos ru-kaburu ka rongkangnga macan rowa.

20(6-21) Sanapa’na ka jadhiya rato laju aera’, sowarana kobater, "Daniyel, abdina Allah se odhi’! Apa Allah se esemba ba’na kalaban esto rowa la sanggup masalamet ba’na dhari can-macan jareya?"

21(6-22) Pas badha sowarana Daniyel nyaot, "Moga-moga junandalem eparengngana molja salanjangnga, guste!

22(6-23) Allah abdidalem ampon ngotos malaekadda epanotobi colo’epon can-macan ka’dhinto, daddi ta’ bisa apa-ponapa ka abdidalem. Allah masalamet abdidalem sabab Salerana ngagali ja’ abdidalem ta’ alako sala ka Salerana ban ka junandalem."

23(6-24) Rato ta’ kaocap peragga sarta pas makon oreng makalowar Daniyel dhari rongkangnga macan jareya. Saellana papakon jareya ejalannagi, nyata ja’ Daniyel tadha’ lokana sakale, sabab Daniyel parcaja ka Allah.

24(6-25) Saellana jareya rato laju makon nangkep reng-oreng se agugat Daniyel gella’. Reng-oreng jareya ban ana’ binena laju eontallagi ka rongkangnga macan rowa. Gi’ ta’ napa’ ka dhasarra rongkangnga balakka’ reng-oreng jareya la eceppa’ bi’ can-macan jareya, eremmek sampe’ ka lang-tolangnga.

25(6-26) Saellana jareya Rato Darius ngerem serrat ka reng-oreng dhari sakabbinna bangsa, suku bangsa ban basa sadunnya. Monyena sorat jareya kantha reya, "Salam!

26(6-27) Sengko’ marenta’agi ka sakabbinna oreng se badha e dhaerana tang karaja’an sopaja padha tako’ ban hormat ka Allah se esemba Daniyel! Salerana jareya Allah se odhi’ salanjangnga, marenta sampe’ aher jaman. Karaja’anna ta’ kera ancor saterrossa. Kakobasa’anna tadha’ ambuna.

27(6-28) Salerana masalamet ban mabebas, alampa’agi mo’jijat ban kaajiban e langnge’ bariya keya e bume. Daniyel la epasalamet nyabana ta’ epaceppa’ ka can-macan."

28(6-29) Daddi Daniyel paggun apangkat tenggi saabidda pamarenta’anna Darius ban pamarenta’anna Kores, oreng Persiya rowa.



 <<  Daniel 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel