1E malem jareya rato ta’ bisa asaren. Daddi laju makon oreng ngala’agi ketab catheddanna sajarana karaja’an, pas makon oreng maca’agi buku jareya.
2E dhalem catheddan jareya rato manggi’i ja’ Mordekhai tao areppottagi parkara Bigtan ban Teres, oreng kobiriyan se ajaga kamarra rato, se agabay rancana mateyana Rato Ahasyweros.
3Rato mareksane, "Panghormadan ban babales apa se etarema Mordekhai polana jareya?" Para pangladinna mator, "Ta’ narema pa-ponapa."
4Rato pas mareksa pole, "Sapa tang ponggaba se badha e karaton sateya reya?" Kabendherran e bakto jareya Haman gi’ buru maso’ ka palataranna karaton; maksodda nyo’ona edi ka rato agantonga Mordekhai e cangga se la epaddek rowa.
5Para pangladinna rato mator, "Haman badha e palataran, nyo’ona ngadhep ka ajunanna." "Soro maso’," dhabuna rato.
6Saellana Haman maso’, rato mareksane, "Badha oreng se bi’ sengko’ eberri’ana panghormadan se raja. Epabaramma’a oreng jareya bi’ sengko’?" Pekkerra Haman, "Sapa pole se eparengngana panghormadan se raja bi’ rato, mon banne sengko’!"
7Daddi Haman nyaot, "Oreng gapaneka saena mondhuddagi pangangguy kabessaran se biyasaepon eagem junandalem dibi’, sareng jaran se biyasaepon etetene junandalem dibi’; jaran gapaneka parenge rarenggan lambangngepon karaja’an.
8(6:7)
9Sala settong e antaraepon kaom oreng agungnga nagara dhari kaom bangsawan pakon ngagemmagi pangangguy gapaneka ka oreng se badhi ehormadi junandalem gapaneka; oreng gapaneka panetene jaran teteyannepon junandalem gella’, pas arak palebat e lon-alon kottha. Pangraja gella’ pakon alomampa e adha’epon oreng gapaneka, sambi ra’-era’an, ‘Kantha reya mon rato apareng pangarga’an ka oreng se ehormadi salerana!’"
10Rato pas adhabu ka Haman, "Kassa’ duliyan kala’agi pangangguy ban jaran jareya, pas jalannagi panghormadan jareya kabbi ka Mordekhai, oreng Yahudi rowa. Lakone pakantha se ekoca’agi ba’na gella’ ja’ sampe’ badha se ekorange. Mon esareya, sateya Mordekhai teppa’na ju’-toju’ e adha’na labang sakethengnga karaton."
11Haman laju mondhut pangangguyya rato ban jaran teteyanna; pangangguy jareya pas epasangngagi ka Mordekhai. Saellana Mordekhai nompa’ jaran jareya, bi’ Haman laju earak lebat e lon-alon kottha, sambi ra’-era’an, "Abas, kantha reya mon rato apareng pangarga’an ka oreng se ehormadi salerana!"
12Saellana jareya Mordekhai abali ka labang sakethengnga karaton. Tape Haman ru-kaburu gubar, serana eko’-buko’e tako’ etangale’e oreng.
13Haman laju notorragi ka rajina ban ka ca-kancana sabarang se ealame salerana. Saellana jareya rajina ban ca-kancana se bicaksana jareya mator kantha reya, "Sampeyan kala kowat ka Mordekhai. Sarrena Mordekhai gapaneka oreng Yahudi, sampeyan ta’ kera bisa makala oreng gapaneka, la’-mala’ sampeyan tanto epakala sareng oreng gapaneka."
14Sabatara reng-oreng jareya gi’ acaca ban Haman, reng-oreng kobiriyan se aladine e karaton dhateng ru-kaburu, ngaterragiya Haman ka dhadha’aran se ebadha’agi bi’ Ester.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel