1Kabar ja’ reng-oreng bekkas buwangan jareya parappa’na mateppa’ Padalemmanna PANGERAN, Allahna Isra’il, ekaedhing bi’ mosona oreng Yehuda ban Benyamin.
2Reng-oreng jareya laju entar ka Zerubabil ban para kapalana kaom, pas ngoca’ kantha reya, "Kaula sadaja nyo’ona edi noro’a malerres Padalemman Socce ka’dhissa’, sabab kaula sadaja padha abakte ka Allah se esemba sampeyan. Kaula padha ngatorragi ban-kurban ka Salerana molae e bakto Esarhadon, rato Asyur, abakta kaula sadaja ka’dhinto."
3Tape Zerubabil, Yesuwa ban para kapalana kaom jareya adhabu, "Sengko’ ta’ parlo bantowanna ba’na kaangguy maddek Padalemmanna PANGERAN, tang Allah. Bi’ sengko’ elakonana dibi’ menorot dhabuna Kores, rato Persiya."
4Saellana jareya, reng-oreng se la abit neng e nagara jareya molae nyacae oreng Yahudi sopaja padha’a ta’ andhi’ samangat; reng-oreng Yahudi jareya eko’-tako’e sopaja se maddek Padalemman Socce jareya ta’ epaterros.
5Om-kaom oreng agung Persiya esogo’ sopaja rancanana oreng Yahudi jareya buddhu. Se kantha jareya ros-terrosan tadha’ ambuna saabidda pamarenta’anna Rato Kores sampe’ ka pamarenta’anna Rato Darius.
6E bakto Rato Ahasyweros buru marenta, so-mosona pandhudhu’ Yerusalim ban Yehuda noles sorat gugadan.
7Bariya keya e jaman pamarenta’anna Artahsasta, kaisar Persiya, kadaddiyan jareya eolange pole: Bislam, Mitredat, Tabe’el ban ca-kancana akerem sorat ka rato. Sorat jareya etoles ngangguy oca’ Aram, ban kodu esalen ka oca’ Ibrani e bakto ebaca’agi
8Artahsasta narema sorat keya parkara Yerusalim. Sorat jareya dhari Gubennor Rehum ban Simsai sekettarissa propinsi ban ebanto bi’ ca-kancana, iya areya para hakim ban sakabbinna kaom oreng agung Persiya se laen se asalla dhari Erekh, Babil, ban Susan e nagara Elam,
9(4:8)
10bariya keya bi’ sa-bangsa laen se la eangko’ bi’ Asnapar Se Agung ban esoro neptep e kottha Samaria ban tha-kottha laen e dhalem propinsi Efrat Bara’.
11Monyena sorat jareya kantha reya: "Kaatora ka Rato Artahsasta, dhari para abdina se badha e Efrat Bara’. Salam.
12Tantoepon junandalem ngagali, Guste, ja’ oreng Yahudi se ngalle dhari ra-dhaera laen e dhalem karaja’annepon junandalem, samangken neptep e Yerusalim sareng parappa’na malerres pole kottha se jahat sareng dujan aberonta’ ka’dhissa’. Reng-oreng gapaneka ampon molae maddek pole dhung-geddhungnga, ta’ abit pole lalakon gapaneka tanto lastare.
13Manabi kottha gapaneka ahasel epaddek pole sarengngan dhung-geddhungnga ampon epalastare, reng-oreng gapaneka tanto ta’ kera poron majar pajek, pamaso’annepon karaja’an tanto ngorange.
14Abdidalem sadaja padha kaparotangen ka junandalem, sarengngan ta’ terro nengalana junandalem eparogi. Daddi abdidalem sadaja ngatore rembak
15sopaja junandalem makon mareksa pole arsippepon para bangatowana junandalem. Dhari essena junandalem bakal ngagaliya ja’ kottha Yerusalim pajat dujan aberonta’, sarengngan ngabidi gi’ dhimen ros-terrosan marogi para rato sareng pangobasana propinsi. Reng-oreng Yerusalim malarat ta’ ekenneng parenta. Ka’dhinto lantarannepon aponapa kottha gapaneka me’ epaancor.
16Daddi, abdidalem sadaja yakin, manabi kottha gapaneka epaddek pole, sareng dhung-geddhungnga epajaga pole, junandalem ta’ kera kengeng ngobasane propinsi Efrat Bara’ ka’dhinto pole."
17Rato akerem jawaban kantha reya: "Ka Gubennor Rehum ban Simsai sekettaris propinsi, ban ca-kancana se badha e Samaria ban e tha-kottha laenna e propinsi Efrat Bara’. Salam.
18Soradda ba’na la esalen ka basa Ibrani ban la ebaca’agi ka sengko’.
19Sengko’ laju marenta’agi sopaja ebadha’agi pamareksa’an, ban pajat badha buktena ja’ molae jaman lamba’ Yerusalim reya ros-terrosan alaban ka kakobasa’anna to-rato ban e antarana reng-oreng Yerusalim jareya bannya’ se daddi pamberonta’ ban madhateng kasossa’an ka oreng bannya’.
20To-rato se kowat kobasa marenta e dhissa’ ban ngobasane sakabbinna propinsi Efrat Bara’, sarta narek pajek ban pesse opet.
21Daddi, mara pakalowar parenta kaangguy maambu lalakonna reng-oreng jareya, sopaja kottha jareya ta’ epaddek pole, sampe’ sengko’ makalowar parenta laen.
22Duli lakone tang parenta reya sopaja tang karogiyan ta’ sajan atamba raja!"
23Saellana soradda Artahsasta jareya ebaca’agi ka Rehum, Simsai ban ca-kancana, reng-oreng jareya laju mangkat ka Yerusalim; reng-oreng Yahudi epaksa maambu lalakonna se maddek pole kottha jareya.
24Lalakon mateppa’ Padalemman Socce ta’ epaterros sampe’ e taon se kapeng dhuwa’ pamarenta’anna Darius, rato Persiya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel