1Saellana jareya kabbi la mare elakone, laju badha pin-pamimpinna oreng Isra’il entar ka sengko’; nyareta’agi ja’ ra’yat Isra’il, tamaso’ para imam ban reng-oreng Lewi ta’ ajauwi sa-bangsa se badha e sabingkerra, iya areya sa-bangsa Amon, Mo’ab, Messer, Kana’an, Het, Feris, Yebus ban Amori. La’-mala’ para imam ban reng-oreng Lewi jareya padha kantha jareya keya. Reng-oreng jareya ngalakone lalakon se juba’ se elakone sa-bangsa jareya.
2Lalake’an Yahudi abine babine’an manca, daddi ommat se malolo kaagunganna PANGERAN la ta’ morne pole. La’-mala’ se alako kantha jareya kaadha’ para pamimpin ban om-kaom oreng agung Isra’il.
3Ngedhing parkara se kantha jareya sengko’ ce’ peggella, sampe’ sengko’ nyebbit tang kalambi ban adabu’ tang obu’ ban tang janggu’; saellana jareya sengko’ laju toju’, tang ate ce’ sompegga.
4Sengko’ terros toju’ kantha jareya sampe’ napa’ baktona kaangguy ngatorragi kurban asar. Pas dhateng reng-oreng agaribbung e seddi’na sengko’. Reng-oreng jareya katako’en polana enga’ ka Allahna Isra’il se ngara reng-oreng se la abali dhari pambuwangan polana sa-dusana.
5E bakto kurban asar jareya molae eatorragi, sengko’ jaga dhari tang kennengngan se toju’ bi’ pekkeran sompek rowa, gi’ paggun ngangguy kalambi se la esebbit gella’, sengko’ pas asojud ngangka’ tang tanang se dhadhuwa’ ka GUSTE Allah.
6Sengko’ mator, "Adhu, Guste Allah, abdidalem todhus se adhanga’a ka Junandalem. Dusana abdidalem sadaja apo’-tompo’ e attassa cethak, tenggina kantos napa’ ka langnge’.
7Ngabidi dhari jamanna para bangatowa abdidalem sadaja kantos samangken, ommattepon Junandalem ka’dhinto dusa ka Junandalem. Lantaran dusa gapaneka abdidalem sadaja, para rato sareng para imamma ommattepon Junandalem epakala sareng to-rato manca. Ommat ka’dhinto epate’e, erampok sareng eangko’ etawan ka ra-nagara laen; eya-seya tadha’ karena, akadi kabadha’an e are mangken ka’dhinto.
8Namong samangken, GUSTE Allah, Pangeran kaula, Junandalem gi’ buru saos nolong ommat ka’dhinto, lantaran kamora’annepon Junandalem. Sabagiyan dhari abdidalem sadaja sareng Junandalem epabebas dhari odhi’ se ekadunor oreng, sopaja odhi’a aman taremtem e kennengngan se kusus ka’dhinto. Junandalem apareng odhi’ se anyar ka abdidalem sadaja.
9Junandalem ta’ mongkore abdidalem sadaja e bakto ekadunor oreng; Junandalem atolong kantos abdidalem sadaja ekaneserre sareng to-rato Persiya, eedine odhi’ terros, sareng eedine maddek pole Padalemmannepon Junandalem se namong kare jur-gujuranna ka’dhinto. Junandalem apareng parlindhungan ka abdidalem sadaja e ka’dhinto, e Yehuda sareng e Yerusalim.
10Namong samangken, GUSTE Allah, saamponna sadaja kadaddiyan gapaneka, ngoca’a ponapa pole samangken abdidalem sadaja ka’dhinto? Abdidalem sadaja padha ngenthengngagi pole papakonna Junandalem,
11se edhabuwagi Junandalem kalaban parantara’annepon para nabbi, di-abdiepon Junandalem. Bi-nabbi gapaneka ampon adhabu ka abdidalem sadaja ja’ tana se ekenenganna abdidalem sadaja ka’dhinto ta’ berse, sabab dhari konco’ se settong ka konco’ settongnga ekennengnge reng-oreng se lalakonna kotor sareng juba’.
12Bi-nabbi gapaneka ta’ marengngagi abdidalem sadaja akabin campor sareng reng-oreng gapaneka, otabana abanto reng-oreng gapaneka sopaja odhi’na ma’mor sareng taremtem. Manabi dhabuna para nabbi gapaneka etoro’, tanto odhi’epon abdidalem sadaja kowat, sareng kengeng arassa’agi kobassana hasella tana ka’dhinto, se pas tanto kengeng esangkollagi ka na’ poto salanjangnga.
13Abdidalem sadaja dusa ka Junandalem, ta’ atoro’ ka hokommepon Junandalem, daddi sareng Junandalem eparenge okoman. Namong abdidalem sadaja oneng, Guste, ja’ okoman se eparengngagi Junandalem berra’na ta’ saponapa manabi sabandhing sareng se kodu etanggung abdidalem sadaja, la’-mala’ Junandalem gi’ nolong masalamet abdidalem sadaja.
14Daddi kadi ponapa abdidalem sadaja me’ ngenthengngagi pole papakonna Junandalem, laju akabin campor sareng reng-oreng jahat ka’dhissa’? Manabi kadi ka’dhinto, tanto Junandalem ce’ dukana, ban tanto abdidalem sadaja sareng Junandalem laju epaancor epatadha’ karena ban tadha’ se eedinana odhi’.
15GUSTE Pangeran, Allahna Isra’il, Junandalem adil, namong sareng Junandalem abdidalem sadaja gi’ eedine odhi’ terros. Abdidalem ngakone sadajana kasala’an ka Junandalem; abdidalem sadaja ta’ gadhuwan ha’ ngadhep ka ajunanna Junandalem."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel